5 Ndaa

Ndaaniʼ Paraisu ca zabani ca xhamigu Dios

Paraisu ca maʼ qué zaca diʼ ni casi nabáninu yanna. Dios qué ñuu dxi niná nidiʼdiʼ binni ra nagana, ñapa yuubaʼ ne guendananá. Nga runi, mayaca Dios zuni Guidxilayú riʼ ti paraisu. Ximodo zaca ni yaʼ. Guidúʼyanu xi na Biblia.

Binni nachaʼhuiʼ. Lu Paraisu ca zabani ca xhamigu Dios. Zacanésaacabe ne zabánicabe casi na lu neza stiʼ Jiobá (Proverbios 2:21).

Stalepeʼ guendaró. Ndaaniʼ Paraisu ca, guirutiʼ zadiʼdiʼ guendarindaana. Biblia na: «Ziuu stale biidxiʼ [o guendaró] lu guidxilayú» (Salmo 72:16, NM).

Yoo galán ne dxiiñaʼ galán. Ndaaniʼ Paraisu ca, guiráʼ binni zapa lidxi, ne guiráʼ binni zapa ti dxiiñaʼ ni gusiecheʼ laa (Isaías 65:21-23).

Guendariuudxi lu guidubi naca Guidxilayú. Binni maʼ qué ziuu dxi gucaalú ne maʼ qué zátiruʼ lu guendaridinde stiʼ ca guidxi ca. Stiidxaʼ Dios na: «[Dios] runduuxeʼ guendaridinde stiʼ ca guidxi ca» (Salmo 46:8, 9, NM).

Guendanazaaca. Biblia na: «Guirutiʼ tu cueza racá [ndaaniʼ Paraisu] zaníʼ: huaraʼyaʼ» (Isaías 33:24, NM). Laaca maʼ qué ziuu cani qué rizá, qué ruuyaʼ, qué runadiaga, qué riníʼ (Isaías 35:5, 6).

Qué ziuu guendananá nin yuubaʼ nin guendaguti. Stiidxaʼ Dios na: «Ma qué ziuu ru enda guti nin enda ruuna nin enda racaná ladxidóʼ nin yuubaʼ, purti ma udiʼdi irá ni uyuu chiqué» (Apocalipsis 21:4).

Maʼ qué ziuu binni malu. Jiobá cuzabiruaa: «Peru ca binni malu ca la? zaruugucaʼ de lu guidxilayú; ne cani rudxii deche, ziaaxhacaʼ luni» (Proverbios 2:22, NM).

Binni zannaxhiisaa ne zapasaacaʼ respetu. Maʼ qué ziuu ni cadi jneza nin guendaruquichináʼ nin guendarachelú nin guendaracananalaʼdxiʼ. Binni ziuu tobi si ne zabánicabe casi na lu neza stiʼ Dios (Isaías 26:9).