Gápanu laanu para cadi gúninu casi biʼniʼ ca israelita que
CA ISRAELITA que gunna dxíchicaʼ xi canabaʼ Jiobá gúnicaʼ ora guiuucaʼ lu layú ni chigudiibe laacaʼ que. Ximodo gúnnacabe ni yaʼ. Jiobá gudxi Moisés gabi laacabe ca diidxaʼ riʼ: «Nápatu xidé guiládxitu guiráʼ ca binni nuu lu layú ca ne gunitilutu guiráʼ ca bidóʼ de guié stícabe; ne guiráʼ ca bidóʼ de guiibaʼ stícabe naquiiñeʼ gunitilutu cani, ne guiráʼ lugar nasoo ra runi adorárcabe naquiiñeʼ gunidetu cani» (Núm. 33:52).
Ca israelita que cadi naquiiñeʼ diʼ chuʼnécabe ca binni ni nabeza lu layú que tobi si para cadi tindenécabe laacaʼ, ne cadi naquiiñeʼ gucheelacabe ca xiiñicabe ca xiiñiʼ ca binni que (Deu. 7:2, 3). Ne maca gudxi Jiobá laacabe ca diidxaʼ riʼ: «Gupa lii para cadi gunineluʼ ca binni ni nabeza lu layú ra cheluʼ ca ti pactu, para cadi gácacabe ti trampa para lii» (Éxo. 34:12). Neca gúnnacabe cani, qué nuzuubacabe stiidxaʼ Dios ne biábacabe lu trampa stiʼ ca binni que. Xi bicaa laacabe gucheenécabe Dios yaʼ. Xi zanda guizíʼdinu de cani bizaaca ca israelita que yaʼ (1 Cor. 10:11).
Biʼniʼ adorárcabe sti dios ra bidxaagacabe ca binni que
Qué nindaa gulee ca israelita que ca binni nabeza lu Layú ni Bizabiruaa Dios gudii laacabe que. Peru, qué ñúnicabe cásipeʼ gudxi Jiobá laacabe, purtiʼ qué niládxicabe guiráʼ xixé ca enemigu que (Jue. 1:1–2:10). Cumu qué ñúnicabe ngue la? dxi bizulú gulézacabe ndaaniʼ ca «gadxe guidxi roʼ» que, bidxaagacabe ca binni de raqué ne qué nindaa guca xhamígucabe laacaʼ (Deu. 7:1). Xi bicaani laacabe gúnicabe yaʼ. Biblia cusiene: «Bizulú gucuaacabe ca xiiñidxaapaʼ ca binni que para bichaganácabe laacaʼ, ne bidiicabe xiiñidxaapacabe ca xiiñiʼ ca binni que, ne biʼniʼ adorárcabe ca dios sticaʼ. Zaqué ca israelita que bíʼnicaʼ ni cadi jneza nezalú Jiobá, ne chaahuidugá bizulú bisiaandacabe Jiobá Dios stícabe ne biʼniʼ adorárcabe ca Baal que ne ca yaga ni runi adorar ca binni que» (Jue. 3:5-7). Bidxaaga si ca israelita que ca binni nabeza ndaaniʼ guidxi que, bidiicabe xiiñicabe guichaganáʼ ca binni que ne gucuaacabe ca xiiñiʼ ca cananeu que bichaganácabe laacaʼ ne biʼniʼ adorárcabe dios sticaʼ. Bichaganasícabe ca binni que, jmaruʼ si qué ñanda nibeecabe laacaʼ ndaaniʼ guidxi que. Ca israelita que maʼ qué ñuni adorarcaʼ Jiobá jneza ne bíʼnicaʼ ni na xcaadxi dios ni cadi dxandíʼ.
Dxi guca ca cananeu que enemigu stiʼ ca israelita la? gúpacabe guendanagana purtiʼ zándaca tíndenecaʼ laacabe, peru ra bidxaagacabe ca binni que jma nagana gúcani para laacabe purtiʼ ca cananeu que biʼniʼ dxabaʼ xquendabiaanicabe ne bixheleʼ laacabe de Dios. Yanna, guidúʼyanu ximodo bisihuinni ca israelita que maʼ qué ñuni adorarcaʼ Jiobá jneza.
Bizulú bíʼnicabe dxiiñaʼ lu layú peru qué nindaa biʼniʼ adorárcabe Baal
Dxi guyuucabe lu Layú ni Bizabiruaa Jiobá, ca israelita que maʼ qué nindézacabe cheríʼ chericaʼ ne stale de laacabe biʼniʼ dxiiñaʼ lu layú. Zándaca modo bíʼnicabe dxiiñaʼ lu layú que bisihuínnini bíʼnicabe casi biʼniʼ ca cananeu que. Peru cadi modo si biʼniʼ ca binni que dxiiñaʼ nga yenanda ca israelita que, sínuque ra bidxaagacabe ca cananeu que biʼniʼ crécabe ni biʼniʼ crecaʼ ne yenándacabe cani.
Ca cananeu que biʼniʼ adorarcaʼ stale Baal, para laacabe ca dios que nga cani racané layú stícabe para gudii xiixa ni gudxíbacabe. Ca israelita que bidxiibacaʼ layú sticaʼ ne gundísacaʼ ni bidiini, peru chaahuidugá bizulú bisisácacabe ca dios stiʼ ca cananeu que casi ora pur laacaʼ nga bidii layú que stale. Ngue runi, neca ruluíʼ cayuni adorárcabe Jiobá peru bidxiidéchecabe laabe.
Naquiiñeʼ gápanu laanu
Dxi bizulú bidxaaga ca israelita que ca binni ni nabeza lu Layú ni Bizabiruaa Jiobá que la? qué niníʼ íquecabe pa ñuni adorárcabe ca dios stiʼ ca binni que. Peru ra bidxaagacabe ca binni que bicaani laacabe guni adorárcabe Baal. Ñee cadi zacaca zazaacanu pa guidxaaganu binni ni ruluíʼ nachaʼhuiʼ peru qué runi cré ni runi crenu, cadi nabani casi modo na Dios ne cadi zinanda ca conseju ni zinándanu la? Zacaca pue. Nga runi, naquiiñeʼ gápanu laanu ra dxiiñaʼ, ra scuela ne dede ndaaniʼ lídxinu purtiʼ zándaca guidxaaganu binni ni cadi naca xpinni Cristu. Ni bizaaca ca israelita que cusiidiʼ ni laanu pa guyúbinu gaca xhamígunu binni ni cadi naca xpinni Cristu la? cuyúbinu chuʼnu lu guendanagana. Biblia caguixhená laanu, pa guidxaaganu binni ni runi ni nadxabaʼ la? zacani laanu (1 Cor. 15:33).
Tiempu riʼ laaca ridxaagalunu stale guendanagana casi cani bidxaagalú ca israelita que. Ndaaniʼ guidxilayú nabáninu riʼ, runi adorárcabe stale cosa dede ne binni. Guzéʼtenu chupa chonna de laacani. Nuu tu laa rusisaca bidxichi stiʼ, ca binni risaca ni ridiʼdiʼ lu tele o ni riguite xiixa, ca grupu políticu, ca xaíque yuʼduʼ ne nuu tu dede rusisaca binnilidxi. Nga runi, naquiiñeʼ gápanu laanu pacaa zanda gusisácanu tobi de ca cosa riʼ jma lu xquendanabáninu. Pa gaca xhamígupenu tuuxa ni cadi nadxii Jiobá la? zuxhélebe laanu de Jiobá.
Ni jma biʼniʼ ca cananeu que ora biʼniʼ adorarcaʼ Baal nga guyuunecaʼ ni cadi xheelacaʼ ne stale israelita guyuuláʼdxicaʼ zaqué, ngue runi laaca bíʼnicaʼ zaqueca. Tiempu riʼ laaca nuu caadxi cosa ni cagubayú ne cusaba ca xpinni Dios. Xi laacani yaʼ. Nagasi stale tu maʼ napa Internet lu computadora stiʼ. Ora maʼ nuube laasibe ra lídxibe zanda quiñenabe ti botón stini ne gúʼyabe cani nadxabaʼ nuu luni ne zacá guni biidibe xquendabiaanibe. Nabé triste nga pa ti xpinni Cristu guʼyaʼ ca cosa dxabaʼ nuu lu Internet.
Nayecheʼ nga riuu cani runi ni na ca conseju stiʼ Dios
Cada tobi de laanu nga naquiiñeʼ guʼyaʼ pa zuzuubaʼ stiidxaʼ Jiobá o pa coʼ ora guyubi tu guidxaaga (Deu. 30:19, 20). Nga runi, galán guinabadiidxanu ndiʼ: «Tu ridxaagaʼ ora maʼ gastiʼ cayuneʼ pue. Ñee nabánicabe casi modo ná ca conseju stiʼ Dios la? Runi adorárcabe Jiobá la? Zacanebe naa guneʼ ni na Jiobá jma jneza la?».
Hombre ni bicaa salmo riʼ na: «Nayecheʼ nga cani gastiʼ donda lu neza sticaʼ, cani canazá lu ley stiʼ Jiobá. Nayecheʼ nga ziuu cani qué rusiaandaʼ ca conseju stibe; ruyúbicaʼ laabe de guidubi ladxidoʼcaʼ» (Sal. 119:1, 2). Dxandíʼ, «nayecheʼ nga guiráʼ tu ridxibi Jiobá, ne canazá lu ca neza stibe» (Sal. 128:1). Ora guyúbinu tu guidxaaganu, galán guizíʼdinu de ni bizaaca ca israelita que ne guzúʼbanu stiidxaʼ Jiobá lu guiráʼ xixé cosa (Pro. 13:20).
[Dibuju/foto ni zeeda lu yaza 26]
Guidxaaganu tuuxa ni cadi nadxii Jiobá zanda chineni laanu guni adorarnu sti dios