Iquiiñenu ca tratadu ca para gucheechenu ca diidxaʼ nacubi ne galán
1. Ximodo huaquiiñeʼ ca xpinni Dios ca tratadu ca.
1 Maʼ xadxí nga riquiiñeʼ ca testigu stiʼ Jiobá ca tratadu ca para gusiidicaʼ binni de Dios. Lu iza 1880, C. T. Russell né ca xcompañeru bizulú guleecaʼ tratadu para quiʼziʼ cani ruundaʼ revista Watch Tower cani. Ne lu iza 1884 C. T. Russell guyé nezalú ti juez para quixhe lá grupu ra nuu que sicaríʼ: Zionʼs Watch Tower Tract Society (yanna runibiáʼcabe ni casi Watch Tower Bible and Tract Society of Pennsylvania). Cumu biquiiñebe diidxaʼ tract («tratadu») ra gudíxhebe lá ca la? nga rusihuinni nabé risaca ca tratadu ca. Dxi gunda iza 1918, mápeca gudiiziʼ Cani Ruundaʼ Biblia 300 millón tratadu. Ne dede yanna nabé riquiiñeʼ ca tratadu ca para gucheechenu diidxaʼ.
2. Xiñee nabé risaca ca tratadu ca.
2 Xiñee nabé risaca cani. Cumu de color nga ca tratadu ca la? riuulaʼdxiʼ binni cani. Ne riuulaʼdxiʼ binni guʼndaʼ cani purtiʼ né huaxiéʼ diidxaʼ rusiénecani stale cosa risaca. Ne jma ruquiinde binni guicaa cani que guicaa ti libru o ti revista, purtiʼ huaxiéʼ yaza nápacani. Dede cani nacubi cucheeche diidxaʼ ne cani nahuiiniʼ zanda gusaanané cani binni. Ne cumu cadi naroʼbaʼ cani la? ra tiisi zanda chinenu cani.
3. Guníʼ xiixa ni bizaacaluʼ o ni bizaaca sti binni ni rusihuinni pabiáʼ risaca ca tratadu ca.
3 Stale binni biziidiʼ ni dxandíʼ de Dios ora biindacaʼ ti tratadu. Zacá bizaaca ti gunaa de Haití. Laabe bidxélabe tobi de ca tratadu ca lu neza, ne ora biindabe ni guniʼbe: «¡Maʼ bidxelaʼ ni dxandíʼ!». De raqué guyebe ra Yoo stiʼ Reinu, ne bizulú biindanécabe laabe Biblia ne despué guyuunísabe. ¡Guiráʼ nga bizaaca pur ti tratadu ni cusiene de Stiidxaʼ Dios!
4. Xi naquiiñeʼ gúninu beeu gusaananenu binni ca tratadu ca.
4 Ora maʼ cucheechenu diidxaʼ de yoo pur yoo. Cumu nabé riquiiñenu ca tratadu ca para gucheechenu diidxaʼ la? nga runi ra guiuʼnu beeu noviembre zusaananenu ni binni, ne gatigá zúninu ni zacá xcaadxi beeu. Qué zusaananésinu cani binni, sínuque zaquiiñenu cani para guzulú guinínenu binni de Dios. Pa binni ni guinínenu ca gusihuinni riuulaʼdxiʼ guiziidiʼ dede primé yegánnanu laabe o ra guiropa la? zanda gusiénenu laabe ximodo rúʼndanenu binni libru Xipeʼ ndiʼ cusiidiʼ Biblia o sti guiʼchiʼ ni rúʼndanenu binni. Ximodo zanda gusaananenu binni ca tratadu ca ora maʼ ziuunu de yoo pur yoo yaʼ. Yanna, cumu gadxé gadxé nga ni cusiene ca tratadu ca la? primeru naquiiñeʼ gánnanu xidé caníʼ cani chigusaananenu binni.
5. Ximodo zanda gusaananenu binni tratadu ora chigucheechenu diidxaʼ de yoo pur yoo.
5 Naquiiñeʼ gánnanu tuu nga ca binni ni nabeza neza ra chigucheechenu diidxaʼ ne xi tratadu zanda gusaananenu laacabe ti gánnanu xidé guininu. Ne zanda gudiʼnu binni ti tratadu para guzulú guinínenu laa. Zándaca ora gúʼyabe ni chuuláʼdxibe gánnabe xi nani. Laaca zanda guluinu laabe chupa chonna de laacani ne gábinu laabe cuibe tobi ni chuuláʼdxibe. Pa chigucheechenu diidxaʼ ra qué ruxheleʼ binni puertaʼ stiʼ la? zanda guyúbinu modo guluinu ni laabe o guinabadiidxanu laabe pa zanda cuʼnu ni ñee puertaʼ stibe para gábibe laanu ximodo ruuyabe ni cá luni. Pa ti guendarinabadiidxaʼ nga tema ca la? zanda gábinu laabe xi riníʼ íquebe de laani, o zanda guinabadiidxanu laabe xiixa ni gucaa laabe gucaadiágabe laanu. De racá zanda guidúʼndanu ti párrafo lu tratadu ca, ne gábinu laabe guicábibe ca guendarinabadiidxaʼ ni zeeda luni o guinábanu laabe guiniʼbe xi riníʼ íquebe de laani. Laaca galán guidúʼndanu lu Biblia ca textu ni jma cusiene ni na párrafo ca. Ne ora maʼ biluxe guinínenu laabe la? gábinu laabe padxí ne pora zanda guibiguétanu sti biaje. Pa rusaana ca binni ridagulisaa xiixa guiʼchiʼ ra puertaʼ yoo neca qué guinni binni ralidxi la? laaca zanda gusaananu ti tratadu ra cadi guuyaʼ binni.
6. Ximodo zanda gusaananu ca tratadu ca ora gucheechenu diidxaʼ lu calle.
6 Ora chigucheechenu diidxaʼ lu calle. Ñee huaquiiñeluʼ ca tratadu ca para gucheecheluʼ diidxaʼ lu calle la? Nuu binni nagueenda zeʼ ne qué racaláʼdxicaʼ guzuhuaadxicaʼ para güínenu laacaʼ diidxaʼ, nga runi nagana zaca para gánnanu pa dxandíʼ riuuláʼdxicabe guiziidicabe jma. Cumu qué gánnanu pa zuundacabe revista ni gudiʼnu laacabe la? galán gudiʼnu laacabe ti tratadu. Cumu sicarú rihuinni nezalú cani ne cadi stale diidxaʼ zeeda lu cani la? zándaca zuquiinde laacabe gúʼndacabe ni ora maʼ gápacabe ti tiempu huiiniʼ. Peru pa guzuhuaadxícabe la? zanda gábinu laacabe xi cayeeteʼ luni.
7. Bizeeteʼ xiixa ejemplu ni gusihuinni ximodo zanda iquiiñenu ca tratadu ca ra tiica nuunu.
7 Ora gucheechenu diidxaʼ ra tiica nuunu. Qué zaca nagana para laanu guinínenu binni de Dios ra tiica nuunu pa iquiiñenu ca tratadu ca. Ti xpinni Cristu riguu chupa chonna tratadu cueʼ ante cheʼ paxaraa. Ora guiníʼnebe tuuxa, casi ni runi dxiiñaʼ ndaaniʼ ti tienda la? rudiibe laa xiixa guiʼchiʼ guʼndaʼ ne laaca rudiibe laa ti tratadu. Ti guendaxheelaʼ ni yezá ndaaniʼ guidxi Nueva York yené folletu Naciones ne chupa chonna tratadu lu gadxé gadxé diidxaʼ, purtiʼ nánnacabe raqué zuuyacabe binni ni zeeda de stale guidxi. Guiráʼ cani gunadiágacabe guiníʼ sti diidxaʼ, casi cani cutoo lu calle, cani caziilaʼdxiʼ ra parque o cani cayó ndaaniʼ ti restaurán, rudiicabe laacaʼ ti tratadu lu stiidxacaʼ.
8. Ximodo nga zeeda gaca ca tratadu ca casi biidxiʼ.
8 «Bidxiibaʼ biidxiʼ stiluʼ.» Ca tratadu ca zeeda gácacani casi biidxiʼ. Ora maʼ cusaba binni biidxiʼ lu layú stiʼ dxiqué, rusaba ni ra tiica si purtiʼ qué ganna paraa guindánini. Nga runi Eclesiastés 11:6 na: «Bidxiibaʼ biidxiʼ stiluʼ siadóʼ, ne cadi guiaanadxí naluʼ dede ora gaca huadxí; purtiʼ qué gánnadiluʼ paraa zandánini, pa raríʼ o pa raricaʼ, o guiropaʼ lugar ca». Nga runi, cadi gusaananu de iquiiñenu ca tratadu ca para gucheechenu stiidxaʼ Dios (Prov. 15:7).
[Ni caníʼ yaza 3]
Cumu nabé riquiiñenu ca tratadu ca para gucheechenu diidxaʼ la? nga runi ra guiuʼnu beeu noviembre zusaananenu ni binni, ne gatigá zúninu ni zacá xcaadxi beeu.