Ca apóstol que bicheechecaʼ diidxaʼ ne guendanadxibalú

CHII gubidxa de bibiguetaʼ Jesús guibáʼ, guca saa stiʼ Pentecostés lu iza 33, ca dxi cayácani que bidagulisaa biaʼ ti gayuaa gande xpinni Cristu ndaaniʼ ti yoo ni nuu Jerusalén. Málasi binadiágacabe guxidxi xiixa casi ora rundubi ti bi yooxhoʼ, ne ca discípulo que bizulú guniʼcaʼ gadxé gadxé diidxaʼ ni qué runibiaʼcaʼ. Xiñee caníʼcabe gadxé gadxé diidxaʼ yaʼ. Purtiʼ bidii Dios laacabe espíritu santu stiʼ.

Ndaaniʼ guidxi que beeda stale binni de gadxé gadxé guidxi para gápacaʼ saa que. Guirácabe bidxagayaacabe ora bíʼyacabe caniʼné ca xpinni Cristu que laacabe diidxaʼ gulenécabe. Para gánnacabe xii ngue bizaaca raqué la? bisietenalaʼdxiʼ Pedru laacabe maca guníʼ profeta Joel zusaba Dios espíritu santu stiʼ luguiáʼ ca xpinni ne zudiibe laacaʼ caadxi dxiiñaʼ nabé risaca (Joel 2:28, 29). Guiráʼ ca milagru que bisihuinni dxíchicani maʼ neza binni ridagulisaa que nga napa ndaayaʼ stiʼ Dios ne cadi guidxi Israel. Ngue runi, dede dxiqué, guiráʼ tu gapa gana guni ni na Dios la? napa xidé gaca xpinni Cristu.

Peru guiráʼ ca xhenemigu Cristu bizulú guzanándacaʼ ca xpínnibe. Ti dxi biseguyoocabe chupa chonna de ca xpinni Cristu, peru huaxhinni que beeda ti ángel gulee laacabe ne gudxi laacabe cadi gusaana de gucheechecabe diidxaʼ. Cásipeʼ birá gueelaʼ guyuucabe ndaaniʼ yuʼduʼ ne bizulú bisiidicabe de Jesús. Ca xaíque yuʼduʼ que nabé bidxiichicaʼ ne gúdxicaʼ laacabe gusaanacabe de gucheechecabe diidxaʼ. Peru ca apóstol que bicábicaʼ laacabe ne guendanadxibalú: «Jma naquiiñe uzuʼba du stiidxa Dios que stiidxa binni» (Hechos 5:28, 29).

Lugar de niree ca xhenemígucabe que gana la? laga jmaruʼ si bicaalucaʼ laacabe. Guyuu caadxi de ca judíu que nacaʼ caníʼ discípulo Esteban mal de Dios ne bichacaʼ guié laabe dede gútibe. Lade ca binni ni biʼyaʼ biiticabe Esteban que guyuu Saulo de Tarso, ti hombre nahuiinigaruʼ ni guca nanalaʼdxiʼ ca xpinni Cristu. Gudiʼdiʼ si ngue, biree Saulo zeʼ Damasco para guinaazeʼ guiráʼ xpinni Cristu ni guidxela. Peru neza zebe que málasi bisicheepaʼ ti biaaniʼ ni zeeda de guibáʼ lube. Óraque binadiágabe ti ridxi ni na: «Saulo, Saulo, xiñee canazabi nanda lu naa». Saulo cadi cayene xi cazaaca ne na: «Tu lii yaʼ». Para na ni caníʼ que: «Naa nga Jesús» (Hechos 9:3-5).

Chonna gubidxa despué, biseendaʼ Jesús ti discípulo stiʼ ni láʼ Ananías para gacané laabe guibiguetaʼ gúʼyabe. Guyuunisa Saulo ne bizulú bicheeche diidxaʼ ne stale gana. Despué beeda gunibiáʼcabe laabe casi apóstol Pablu, ti misioneru ni qué nusaana de nucheeche diidxaʼ.

Dxi nacubi bizulú bicheeche ca discípulo stiʼ Jesús diidxaʼ, ca judíu ne ca samaritanu que si nga guniʼnécabe de Reinu stiʼ Dios. Peru ti dxi guniʼné ti ángel stiʼ Dios Corneliu, ti xaíque stiʼ ca soldadu stiʼ Roma, ni runi cré Dios ni dxandíʼ, ne ángel que gudxi laabe guseendacaabe apóstol Pedru. Laa yené xhupa xhonna de ca discípulo que ne guniʼnécabe Corneliu ne guiráʼ cani nuu ndaaniʼ lidxi de stiidxaʼ Dios. Caníʼneca apóstol que laacabe málasi biaba espíritu santu luguiáʼ ca binni que, ne gudxi Pedru laacabe chuʼnísacabe lu lá Jesús. Dede dxiqué, guiráʼ binni zanda guicaa guendanabani ni qué zaluxe, neca de gadxé gadxé guidxi laacaʼ. Ngue runi zanda guininu maʼ nuu ca xpinni Cristu que listu para gucheechecaʼ diidxaʼ dede ca lugar jma zitu.

(Zeedani lu Hechos 1:1–11:21.)