Gulezadxícabe para gacanécabe naa

Ti dxi nananda ne nabé cundubi bi ndaaniʼ guidxi Alberta, Canadá, zigusá Bob xcarru ne zeʼ 100 Kilómetru pur hora, málasi gureza llanta atrá stiʼ carru stiʼ. Cumu qué nudii Bob cuenta xi bizaaca la? qué nibezadxí ne bisá xcaayuʼ kilómetru ni cayaadxaʼ para chindá ra lidxi.

Lu ti carta ni biseendaʼ Bob ra Yoo stiʼ Reinu ni nuu ndaaniʼ guidxi Alberta, bisiene xi bizaaca. Sicaríʼ bicaabe: «Bidxiñaʼ ti carru naa ne ndaaniʼ ni zeeda gaayuʼ joven, gundétecabe vidriu stícabe ne gúdxicabe naa gureza llanta carru stinneʼ. Para gulezadxidu ruaa carretera que, ne guca ofrecércabe gacanécabe naa. Qué lica gannaʼ pa niaʼ sti llanta ndaaniʼ carru que ninca ca herramienta ni riquiiñeʼ para guidxaa llanta. Zubaʼ lu silla de rueda stinneʼ, cayuuyadxiéʼ laacabe laga cuyúbicabe guiráʼ ni iquiiñecabe para guchaacabe llanta stinneʼ que. Guizáʼ ndaʼ nananda dxi que ne cayaba hielu. Neca zuchaahuicabe, qué nucueeza ngue laacabe ñacanécabe naa chindayaʼ ra lidxeʼ. Qué ñanda diʼ ñuneʼ ni stubeʼ».

Guniʼruʼ Bob lu carta que: «Rudieeʼ xquixe peʼ ca joven Testigu riʼ purtiʼ gucanecaʼ naa. Nuucabe lugar que purtiʼ cayuni predicárcabe ca binni nuu raqué. Dxandíʼ peʼ runi ca joven riʼ ni rusiidicaʼ. Gucanécabe naa né xiixa ni ñaca nagana para naa ñuneʼ. De guidubi ladxiduáʼ rudieeʼ xquixe peʼ laacabe. ¡Tu niníʼ ique pa nuu ca ángel huiiniʼ ca lu carretera dxi que!».