Ti campaña ni guca lu Guidxilayú para guiziidiʼ binni guʼndaʼ ne gucaa

Sicaríʼ guníʼ Agostinho, ti hombre de Brasil: «Biniiseʼ ra ti ranchu, cumu nabé pobre laadu la? bisaanaʼ scuela para guneʼ dxiiñaʼ ti gacaniáʼ familia stinneʼ». Biziidiʼ Agostinho gucaa ne guʼndaʼ dxi napa 33 iza. Ne laaca guniʼbe: «Dxi biziideʼ gucaaʼ ne guundaʼ, gucané ni naa guiníʼ iqueʼ risacaʼ».

Agostinho nga tobi de ca jma de 250,000 binni ni huayacané ca testigu stiʼ Jehová guʼndaʼ ne gucaa lu ca últimu 70 iza. ¿Xiñee runi ca testigu stiʼ Jehová dxiiñaʼ riʼ yaʼ? ¿Ximodo huayacané campaña riʼ stale binni?

Nabé risaca guʼndaʼ binni ne gucaa

Biaʼ lu iza 1930, maʼ cayuni predicar ca testigu stiʼ Jehová ndaaniʼ 115 guidxi. Para ganda guni predicarcaʼ binni ni riníʼ sti idioma, riguixhe ca misioneru discursu ni biree de lu Biblia ni guca traducir para gucaadiaga binni. Ne nuu biaje rudiicabe laacaʼ publicación ni biree lu stiidxacaʼ. Stale binni guyuulaʼdxiʼ guiziidiʼ de lu Biblia, peru guca nagana para ca misioneru gusiidicaʼ binni ni qué ganna guʼndaʼ ne gucaa.

Pa qué ganna ca binni que gúʼndacaʼ, ¿ximodo gúʼndacaʼ Biblia ne gánnacaʼ xi conseju zeeda luni yaʼ? Ne ¿ximodo gúnicaʼ ni caziidicaʼ? (Josué 1:8; Salmo 1:2, 3). Guca nagana para caadxi binni guni ni rinabaʼ Dios laa casi gusiidicaʼ ca xiiñicaʼ de laabe (Deuteronomio 6:6, 7). Ne ca ni huaxiéʼ tiempu de naca Testigu guca nagana para laacaʼ guni predicarcaʼ ne gusiidicaʼ xcaadxi de lu Biblia.

Guca ti campana para guiziidiʼ binni guʼndaʼ ne gucaa

Lu ca iza 1940 ne 1950, Nathan Knorr ne Milton Henschel, chupa hermanu ni zániru ndaaniʼ xquidxi Dios, guyecaʼ ndaaniʼ caadxi guidxi para quixheʼ chaahuicaʼ modo gaca predicar. Ca lugar ra nuu stale binni ni qué ganna guʼndaʼ ne gucaa guluucabe gana ca sucursal quixhe íquecaʼ gudiicaʼ clase binni para guiziidicaʼ gúʼndacaʼ ne gucaacaʼ ndaaniʼ ca congregación que.

Biseendaʼ ca sucursal instrucción ndaaniʼ ca congregación que para gánnacaʼ ximodo gudiicaʼ clase. Ndaaniʼ caadxi guidxi, biquiiñeʼ ca hermanu programa ni napa gobiernu para gusiidicaʼ binni guʼndaʼ ne gucaa. Guzéʼtenu ti ejemplu, biseendaʼ sucursal ni nuu Brasil libru ni bidii gobiernu laacaʼ ndaaniʼ ca congregación. Ne ndaaniʼ xcaadxi guidxi la? ca Testigu gudixhe ximodo gusiidicaʼ.

Guiráʼ binni zanda guiziidiʼ gucaa ne guʼndaʼ: hombre, gunaa, joven ne binni ni maʼ huaniisi, ¿xi para yaʼ? Para guiziidicaʼ gúʼndacaʼ ne gucaacaʼ lu diidxaʼ gulenecaʼ, neca chuʼ binni de gadxé gadxé idioma guiziidiʼ ndaaniʼ ti congregación.

Ti programa ni zacané binni

¿Ximodo huayacané programa riʼ binni gucaa ne guʼndaʼ yaʼ? Sicaríʼ guníʼ ti hermana de México: «Yanna maʼ rieneʼ xi ná Biblia ne maʼ rindani ndaaniʼ ladxiduáʼ. Ra biziideʼ guundaʼ ne gucaa, gucané ni naa ganda guinieniáʼ ca vecinu stinneʼ ne gusiideʼ jma binni de lu Biblia».

Huayacané programa riʼ binni guiziidiʼ de Biblia, peru ¿xiruʼ huayuni ni yaʼ? Sicaríʼ guníʼ Isaac, ti hombre de guidxi Burundi: «Ra biziideʼ gucaaʼ ne guundaʼ, gucané ni naa guiziideʼ jma de construcción. Yanna de laani runeʼ dxiiñaʼ ne runeʼ supervisar proyectu naroʼbaʼ de construcción».

Jesusa, ti gunaa de Perú, napa 49 iza dxi bizulú guyé clase para guiziidiʼ gucaa ne guʼndaʼ. Sicaríʼ guniʼbe: «Cumu napaʼ familia la? ora riaaʼ luguiaa napa xidé guuyaʼ pagala ne xi chisiéʼ. Dxiqué la? nabé gúcani nagana para naa. Peru yanna, ra maʼ biziideʼ gucaaʼ ne guundaʼ maʼ qué ridxibeʼ ora risieniáʼ familia stinneʼ».

Lu ca iza ni maʼ gudiʼdiʼ ca, maʼ guníʼ stale gobiernu de gadxé gadxé guidxi galán dxiiñaʼ ni runi ca testigu stiʼ Jehová purtiʼ rusiidicaʼ binni guʼndaʼ ne gucaa. Tiempu riʼ, cayúniruʼ ca testigu stiʼ Jehová dxiiñaʼ riʼ, ne pur maʼ xadxí de rúnicabe ni la? jma galán huayúnicabe ca programa ne ca herramienta ni riquiiñecabe. Laaca maʼ bíʼnicabe biaʼ 224 millón folletu lu 720 idioma para gusiidicabe binni gucaa ne guʼndaʼ ne para gacanécabe ca binni ni huaxiéʼ guyé scuela.a