Bidiicabe de ni jma galán gúpacabe

Biluxe si Segunda Guerra Mundial lu iza 1945, nabé nagana modo bibani binni ndaaniʼ guidxi Alemania. Despué de guerra que binitilú stale guidxi, maʼ qué ñé ca xcuidi ca scuela, nabé feu modo biaana ca hospital que ne guiráʼ ladu nuu bomba ni qué ñaca dé. Ne cumu huaxiéʼ guendaró guyuu ne nabé caru rutoocabe ni la? napa xidé guni binni dxiiñaʼ xhoopaʼ semana para si mediu kilu mantequiá.

Lade ca binni ni cayacaná que nuu stale testigu stiʼ Jehová ni biseguyoocabe ne ni biseendacabe campu de concentración pur fe sticaʼ. Dxi bireecabe de ra bieguyoocabe lu iza 1945, lari si ni nácucabe que nga nápacabe. Xcaadxi Testigu biníticaʼ guiráʼ ni nápacaʼ casi lídxicaʼ ne layú sticaʼ, ne nuu de laacabe biaxa ni gócabe ne pur ngue bieegucabe ora nuucabe ra reunión.

Nagueendaca gucané ca Testigu de sti guidxi

Nagueendaca biyubi ca testigu stiʼ Jehová ni nuu gadxé gadxé lugar modo gacanecaʼ ca hermanu riʼ, ngue runi biseendacabe lari ne guendaró ra nuucaʼ. Ne ca hermanu de Estados Unidos ni nuu ra central mundial gunábacabe sucursal de Suiza, ni nuu Berna, gacanecaʼ ca hermanu de Alemania. Hermanu Nathan Knorr, representante stiʼ central mundial, guyé Europa para quixhe chaahuiʼ modo gaca dxiiñaʼ riʼ jma nagueenda ne zacá gacanécabe ca hermanu ni nuu Alemania.

Bidii ca Testigu de Suiza de ni nápacaʼ casi guendaró, lari ne bueltu. Guiráʼ ca cosa ni ruseendacabe rié ni primeru guidxi Berna, raqué riguixhe chaahuicabe ni para guseendacabe ni ra nuu ca hermanu de Alemania. Ca Testigu de xcaadxi guidxi casi Suecia, Canadá ne Estados Unidos laaca bidiicaʼ de ni nápacaʼ ne gucaneni ca hermanu ni nuu Alemania, ne zaqueca gucaneni xcaadxi hermanu ni nuu Europa ne Asia ni laaca gucaná pur guerra riʼ.

Guleendú xquidxi Jehová ni galán

Lu chupa chonna si beeu biseendaʼ sucursal stiʼ Suiza café, leche, dxiña, cereal, cuananaxhi, verdura, beela, benda enlatadu ne laaca biseendacabe bueltu para ca hermanu ni nuu Alemania.

Biseendaʼ ca testigu stiʼ Jehová nuu Suiza gaayuʼ tonelada de lari, lade ca ni nuu chamarra, lari para gunaa ne hombre. Lu revista La Atalaya 15 de mayo de 1946 ná: «Qué nudii ca hermanu ca ni riaana sobra laacaʼ, sínuque bidiicaʼ de ni jma galán nápacaʼ. Biʼniʼ ca hermanu riʼ stale sacrificiu para gacanecaʼ ca hermanu sticaʼ de Alemania».

Laaca biseendaʼ ca hermanu de Suiza biaʼ ti mil par zapatu para ca hermanu riʼ. Ora gucuaa ca hermanu de Wiesbaden (Alemania) ca cosa riʼ la? guizáʼ bidxagayaacabe purtiʼ nabé galán ca ni. Ti hermanu bicaa: «Nannaʼ dxicheʼ nin ti tienda raríʼ ndaaniʼ guidxi Alemania qué gapa stale lari ne zapatu galán casi ni biseendatu ra nuudu».

Gucané xquidxi Dios ca hermanu de Alemania hasta lu beeu agosto de 1948. Biseendaʼ ca testigu stiʼ Jehová de Suiza biaʼ 444 caja de cosa ni caquiiñeʼ ca hermanu stinu de Alemania ni nanaa 25 tonelada. Casi maca bizéʼtenu, cadi laasicabe gucanécabe ca hermanu de Alemania, peru laacabe nga grupu jma nahuiiniʼ ni gucané ca hermanu riʼ, purtiʼ para tiempu que nuu ndaaniʼ guidxi Suiza nuu 1,600 testigu stiʼ Jehová.

Nadxiisaa ca xpinni Cristu

Jesucristu guníʼ: «Zanna binni nácatu discípulo stinneʼ: pa nadxiisaatu» (Juan 13:34, 35). Cumu nadxiisaa ca xpinni Cristu la? nga bicaa laacaʼ cadi gudiisicaʼ ni riaana sobra laacaʼ, sínuque gudiicaʼ de ni jma galán nápacaʼ (2 Corintios 8:1-4). Lu ti carta ni biseendacabe de guidxi Zúrich (Suiza) ná: «Stale hermanu ni qué gapa stale cosa ne racalaʼdxiʼ gacanecaʼ, biʼniʼ donarcaʼ vale ne tarjeta sticaʼ para guicaa ca hermanu de Alemania guendaró ne bueltu».

Ti tiempu despué de biluxe Segunda Guerra Mundial, gupa ca testigu stiʼ Jehová de Alemania ni caquiiñecaʼ ne maʼ qué nizanándacabe laacaʼ. Cumu bidii stale hermanu de ni nápacaʼ ne gudixhe chaahuicaʼ modo gúnicaʼ ni la? qué ñaadxaʼ gastiʼ ca hermanu stinu de Alemania. Ni biʼniʼ ca hermanu riʼ rusihuínnini nadxiisaa ca xpinni Cristu.