CA GUENDANAGANA NUU LU GUIDXILAYÚ

4 | Cadi gunítiluʼ esperanza

¿XIÑEE RISACA NI?

Nabé runiná ca guendanagana nuu lu Guidxilayú laanu ne ribeecani gana laanu. Jma nagueenda runiti binni esperanza ora guizaaca xiixa desgracia. ¿Xi rizaacacabe yaʼ?

Nuu tu maʼ qué riná guiníʼ ique xi zándaca guizaaca despué.
Xcaadxi rapa viciu xhudxi o cubaʼ droga.
Nuu chupa chonna binni riníʼ ique pur gana si nabánicaʼ ne nacaʼ: «¿Maʼ xi para nabaneʼ?».

¿Ñee nannuʼ ni la?

Zándaca qué zandaa ca guendanaga stiluʼ o málasi gaca chaahuiʼ ca ni.
Neca qué gaca chaahuiʼ ca guendanagana stiluʼ peru zanda gúniluʼ xiixa para gudxiiluluʼ ca ni.
Biblia cayabi laanu zaca chaahuiʼ guiráʼ guendanagana stinu.

¿Xi zanda gúniluʼ?

Biblia ná: «Cadi lica chuʼtu xizaa xi gaca guixíʼ, purtiʼ guixiruʼ nga gúʼyatu xi cuʼ xizaa laatu. Guyuu conforme né ca problema si stiʼ cada dxi» (Mateo 6:34).

Cadi chuʼluʼ xizaa pur ca guendanagana ni zándaca gápaluʼ guixíʼ dede maʼ qué guni tenderluʼ ca cosa ni chigúniluʼ yannadxí.

Pa chuʼ xhaataluʼ xizaa pur ca cosa malu ni caʼruʼ guizaaca la? zuni estresar ni lii ne zabee ni gana lii.

XI ZANDA GACANÉ LII: Yenanda ca conseju riʼ

GUNÍʼ IQUE COSA NI ZACANÉ LII

Biblia ná: «Para binni ni cayacaná, guiráʼ dxi feu para laa; peru binni ni nayecheʼ nuu ladxidóʼ la? guiráʼ dxi nayecheʼ nuu» (Proverbios 15:15). Pa guicá íqueluʼ puru si ca guendanagana nápaluʼ, zaca nagana para lii gudiiluʼ cuenta pa zanda gaca chaahuiʼ ca ni. Peru pa guiníʼ íqueluʼ xi cosa zanda gacané lii la? zanda guidxélaluʼ ximodo gudxiiluluʼ ca guendanagana nápaluʼ.

Cadi tan gúʼyaluʼ o gucaadiágaluʼ noticia.
Ante chigásiluʼ guníʼ ique chupa chonna cosa ni bisiecheʼ lii dxi ca.
Bicaa ca cosa si ni chigúniluʼ dxi ca. Biʼniʼ ca cosa ni cadi nagana primeru ne bisaana ca cosa nagana ca de últimu. Zacá jma nagueenda zuuyaluʼ xi guiráʼ cosa gunda bíʼniluʼ.

GUNABAʼ GACANÉCABE LII

Biblia ná: «Tuuxa ni rixeleʼ de xcaadxi la? [...] qué riná guicaa ti buen conseju» (Proverbios 18:1). Qué zanda guiree ti binni ndaaniʼ ti barranca stubi si. Caquiiñebe tu guinaaze nabe.

Gunabaʼ ca familia stiluʼ o ca xhamíguluʼ gacané lii.
Cadi guiaandaʼ lii laaca zanda gacaneluʼ laacabe. Pa gacaneluʼ xcaadxi, zacaneni lii para cadi tan guicá íqueluʼ ca guendanagana nápaluʼ.
Pa riníʼ íqueluʼ maʼ pur gana si nabániluʼ, jma galán pa cheluʼ ra nuu doctor. Purtiʼ pa runi sentirluʼ zacá la? zándaca nápaluʼ ti guendahuará, casi depresión. Ne stale binni runi sentir galán ora guicaa xiixa tratamientu.a

a Qué runi recomendar revista ¡Gutaná! xiixa tratamientu.

Biblia rudii laanu ti esperanza ni zanda guni crenu

Sicaríʼ gudxi ti hombre Dios: «Naca stiidxaluʼ ti lámpara para ñeeʼ ne ti biaaniʼ lu neza ra rizayaʼ» (Salmo 119:105). ¿Xi riníʼ ca diidxaʼ riʼ yaʼ?

Cásica riquiiñenu ti lámpara para guzaaniʼ neza ra zizanu huaxhinni, zaqueca racané ca conseju zeeda lu Biblia laanu para guicaanu decisión jneza.

Cásica racané ti biaaniʼ laanu guidúʼyanu xi nuu nezalunu, zaqueca racané Biblia laanu gánnanu xi ca cosa galán cabeza laanu despué.

Naca Biblia ti libru nabé risaca ne cadi cuzeeteʼ si ni ximodo biuu binni lu Guidxilayú riʼ. Laaca cudiini laanu ti esperanza ni zanda guni crenu. Ricábini ca pregunta riʼ:

¿Ximodo?

¿Ximodo bizulú biʼniʼ sufrir binni? Biblia ná: «Pur ti hombre si biuu pecadu ndaaniʼ guidxilayú, ne pur pecadu ca biuu guendaguti, ne zacá gucuá guendaguti que guiráʼ binni, purtiʼ maʼ biʼniʼ pecar guiracaʼ» (Romanos 5:12).

¿Xiñee?

¿Xiñee qué huayanda guni chaahuiʼ binni ca guendanagana stiʼ? Biblia ná: «Cadi lu náʼ diʼ binni nuu guni mandar ra guzuhuaa ñee» (Jeremías 10:23). Rihuinni dxiichica dxandíʼ ni ná ca diidxaʼ riʼ pur guiráʼ guendanagana nuu lu Guidxilayú.

¿Xi?

¿Xi chiguni Dios para guni chaahuiʼ ca guendanagana nuu lu Guidxilayú? Biblia ná: «Zuchaabe nisa riete lucaʼ, maʼ qué ziuuruʼ guendaguti, maʼ guirutiʼ qué ziuu triste, maʼ guirutiʼ qué zuunaʼ ne maʼ qué ziuuruʼ yuubaʼ. Maʼ gudiʼdiʼ guiráʼ ni guyuu dxiqué» (Apocalipsis 21:4).