XI GÚNILUʼ ORA QUIBAʼ LU GUIRÁʼ COSA

Gupa esperanza

¿Ñee runi sentirluʼ jma caguiʼbaʼ lu guiráʼ cosa que biaʼ riáxaluʼ la? ¿Ñee riuuluʼ xizaa pa maʼ qué ganda gudiiluʼ ni caquiiñeʼ familia stiluʼ la? Pa nga nga ni cazaacaluʼ, zándaca nabé riuuluʼ xizaa ximodo guibanineluʼ familia stiluʼ despué. Peru nabé risaca gápaluʼ esperanza ora guni sentirluʼ zacá.

NI JMA RISACA GÚNINU

Ca binni ni napa esperanza qué riguidxinásicaʼ ne maʼ cabézacaʼ guizaaca xiixa galán. Sínuque rúnicaʼ biaʼ gándatiʼ para gudxiilucaʼ guendanagana ra cadíʼdicaʼ. Huayaca investigar ne huadiicabe cuenta ca binni ni napa esperanza rúnicaʼ ca cosa riʼ:

Rudxiilucaʼ ca guendanagana ni nápacaʼ.
Qué raca nagana para laacaʼ guchaacaʼ modo nabánicaʼ.
Ricaacaʼ decisión ni racané laacaʼ chuʼcaʼ nazaaca ne guibánicaʼ galán.

NI ZANDA GÚNILUʼ

Primé, guníʼ ique ximodo zanda gacané Biblia lii ca dxi riʼ: Lu Biblia zeeda stale conseju ni zanda gacané lii ora quibaʼ lu guiráʼ cosa. Zanda gacaneni lii gánnaluʼ ximodo guibániluʼ ne chuʼluʼ listu para gudxiiluluʼ ca guendanagana ni gápaluʼ despué.

«Guicaaluʼ decisión jneza zápani lii, ne zalaluʼ pa gácaluʼ ti binni ni riene» (Proverbios 2:11, Nueva Traducción Viviente).

Guiropa, biiyaʼ xi ná Biblia zazaaca despué: Ora gúʼndaluʼ Biblia zudiiluʼ cuenta racaneni binni gapa guendanuuxpiaaniʼ, ne zacaneni lii gánnaluʼ ximodo zabani binni despué. Guzéʼtenu ti ejemplu, zaziidiluʼ racalaʼdxiʼ Dios gudii laanu «ti futuro ne ti esperanza» galán, ne zánnaluʼ xiñee zanda guni creluʼ ni (Jeremías 29:11). Ne laani nga Reinu stiʼ Dios.

¿XII NGA REINU STIʼ DIOS, NE XI CHIGÚNINI?

Reinu stiʼ Dios nga ti gobiernu ni nuu guibáʼ ne zuni mandarni lu guidubi guidxilayú (Daniel 2:44; Mateo 6:10). Zabeeni guiráʼ yuubaʼ, guendapobre, ne zacaneni binni gapa guendariuudxí ne guibani galán. Ne nga peʼ nga ni ruzeeteʼ Biblia:

«Zabániluʼ nayecheʼ ne zápaluʼ ni caquiiñeluʼ» (Salmo 128:2).

Ca binni ni guibani ora guni mandar Reinu stiʼ Dios «cadi pur gana si zúnicaʼ stale dxiiñaʼ» (Isaías 65:23).

«Ziuu stale biidxiʼ lu guidxilayú» (Salmo 72:16).

Stale binni runi cré dxandíʼ zaca ca ni maʼ biʼniʼ prometer Dios purtiʼ nánnacaʼ qué rusiguiibe (Tito 1:2). ¿Ñuuláʼdxiluʼ ñánnaluʼ xi rusiidiʼ Biblia la? Esperanza ni zeeda lu Stiidxaʼ Dios zudiini stipa lii para gudxiiluluʼ ca guendanagana rapa binni ora gastiʼ bueltu, ne laaca zacaneni lii cadi chuʼluʼ xizaa pur ni guizaaca despué.