Guendaruzuubaʼ diidxaʼ ca rápani laanu

RIULÁʼDXILUʼ gúniluʼ guiráʼ ni racaláʼdxiluʼ sin qué chuʼ tu gabi lii xi naquiiñeʼ gúniluʼ la? Gudxi naa xi caníʼ íqueluʼ...

Peru xii nga ni galán para lii yaʼ. Guʼnuʼ ni gapuʼ gana la? O jma galán rireeni lii ora guzuubaluʼ stiidxaʼ bixhózeluʼ ne jñaaluʼ.... Dios na riquiiñeʼ guzúʼbanu stiidxaʼ bixhózenu ne jñaanu, nga runi nuu xi pur naquiiñeʼ gúninu ni. Guidúʼyanu xi laani.

Panda iza nápaluʼ.... Nannuʼ panda iza napa jñaaluʼ ne bixhózeluʼ o jñaabídaluʼ ne bixhozebídaluʼ la?... Laacabe maʼ bibánicabe jma que lii. Ora jma xadxí guibani binni, jma nanna. Guiráʼ iza runadiágacabe, ruuyacabe ne rúnicabe stale cosa. Nga runi cani nahuiiniʼ ca zanda guiziidicabe de ca ni huaniisi ca.

Runibiaʼluʼ tuuxa jma nahuiiniʼ que lii la?... Nannuʼ jma que laabe la?... Xiñee.... Purtiʼ jma xadxí nabániluʼ ne maʼ biziidiluʼ jma que laabe, njaʼ.

Tuu nga huabani jma xadxí que lii ne naa o tutiica binni yaʼ.... Jiobá Dios. Laabe nánnabe jma que guiranu. Ora rábibe laanu gúninu xiixa, nannadxíchinu nga nga ni jneza, neca gácani nagana para laanu. Nannuʼ guca nagana para Maestru Ni Jma Nanna Gusiidiʼ que nuzuubaʼ diidxaʼ ti biaje la?...

Dios gudxi laabe gúnibe xiixa nabé nagana. Casi rúʼyanu lu dibuju ca, Jesús gunábabe Dios lu ti oración: Pa lii racalaʼdxuʼ, bilá naa de ni cabeza naa riʼ. Ne ca diidxaʼ riʼ bisihuinni Jesús nuu tiru guca nagana para laa guzuubaʼ stiidxaʼ Dios. Peru, nannuʼ xi guniʼbe ra ziguilúxebe oración stibe la?...

Jesús guníʼ: «Peru cadi gaca ni rabeʼ, sínuque ni na luʼ» (Lucas 22:41, 42). Laabe gucaláʼdxibe ñaca ni na Dios, ne cadi ni nádibe. Ngue runi qué ñúnidibe ni riuláʼdxibe sínuque bíʼnibe ni na Dios.

Xi rizíʼdinu de ndiʼ yaʼ.... Rizíʼdinu naquiiñepeʼ nga gúninu ni na Dios guiráʼ ora, neca gácani nagana para laanu. Peru nuuruʼ ni rusiidiʼ ni laanu. Nannuʼ xi laani la?... Rizíʼdinu cadi tobi si nga Dios ne Jesús, casi riníʼ stale binni. Jiobá Dios nga ni jma huaniisi ne nánnabe jma que Jesús.

Ora ruzúʼbanu stiidxaʼ Dios, rusihuínninu nadxiinu laabe. Biblia na: «Sicarí nga ganaxhii nu Dios: guni nu ni na» (1 Juan 5:3). Nga runi guiranu naquiiñeʼ guzúʼbanu stiidxabe. Lii riuláʼdxiluʼ guzuubaluʼ stiidxabe, njaʼ....

Guidúʼyanu ndaaniʼ Biblia xii nga na Dios guni ca baʼduʼ ca. Gúʼndanu Efesios, capítulo 6, versículo 1, 2 ne 3. Racá na: «Baʼdu caʼ, lauzuuba stiidxa bixhoze tu ne jñaa tu, purti nga nga jneza guni ca xpinni Cristu. Lade ca mandamientu zeeda tobi na: “Bizuuba stiidxa [“bisisaca”, NM] bixhoʼzo ne jñoouʼ.” Ne nga nga primé mandamientu ra riete xi icaa nu pa guni nu ni na ni. Purti na ni pa guni nu zacá la? zabani nu nayecheʼ, ne zabani nu xadxí ndaani guidxilayú riʼ».

Casi biiyaluʼ ca, Jiobá Dios nga cayabi lii guzuubaluʼ stiidxaʼ bixhózeluʼ ne jñaaluʼ. Xi riníʼ gusisácaluʼ laacabe yaʼ. Riníʼ ni gápaluʼ respetu laacabe. Ne Dios maca guníʼ pa guzuubaluʼ stiidxaʼ bixhózeluʼ ne jñaaluʼ la? zieni lii jneza.

Chigüeniáʼ lii ti historia stiʼ caadxi binni ni bilacaʼ pur bizuubacaʼ diidxaʼ. Maʼ xadxí bibani ca binni riʼ, gulézacabe ndaaniʼ guidxi Jerusalén. Stale de ca binni que qué nucaadiágacabe Dios. Pur ngue, Jesús gudxi laacabe chigunitilú Dios guidxi que. Jesús laaca gudxi cani nachaʼhuiʼ que ximodo zanda guilacaʼ. Gúdxibe laacaʼ sicaríʼ: Ora gúʼyatu maʼ zuhuaa ca soldadu ca guidubi guidxi Jerusalén la? laganna maʼ bidxiña dxi initilú ni ngue. Óraque laguiree de Jerusalén ne laguxooñeʼ lu ca dani ca (Lucas 21:20-22).

Zaqué gúcani, cásipeʼ modo guníʼ Jesús que, ca soldadu stiʼ Roma bizuhuaacaʼ guidubi guidxi Jerusalén ne bicaalucaʼ ca binni que. Despué málasi zeʼ ca soldadu que ne guirutiʼ ñanna xi pur. Stale de ca binni que guníʼ íquecaʼ maʼ qué zácaruʼ gastiʼ ne biaanacaʼ ndaaniʼ guidxi que. Peru xi guníʼ Jesús ñúnicabe yaʼ.... Xi ñúniluʼ pa nibézaluʼ Jerusalén yaʼ.... Cani dxandipeʼ biʼniʼ crecaʼ ni guníʼ Jesús la? bisaanacaʼ lídxicaʼ ne bixooñecabe lu ca dani que, zitu de Jerusalén.

Gudiʼdiʼ ti iza ne gastiʼ ñaca Jerusalén. Biropa ne bionna iza que laaca gastiʼ ñaca. Guyuu tu guníʼ ique nahuati guiráʼ tu bixooñeʼ de guidxi que. Peru ra bidapa iza que ca soldadu stiʼ Roma bibiguétacaʼ Jerusalén. Ca binni de guidxi que maʼ qué ñanda diʼ nireecabe ne nuxooñecabe de raqué. Ca soldadu que binitilucaʼ guidxi que. Ne stale de ca binni que guti, ne cani qué ñati que yenécabe laacaʼ casi esclavu.

Peru, xi guca ca binni bizuubaʼ stiidxaʼ Jesús que yaʼ.... Cumu nuucabe zitu de Jerusalén la? bilácabe ne qué ñácacabe gastiʼ. Pur bizuubacabe diidxaʼ que bilácabe.

Lii yaʼ, zuzuubaluʼ diidxaʼ ti ganda guilaluʼ la?... Zándaca bixhózeluʼ ne jñaaluʼ maʼ huayábicaʼ lii cadi quíteluʼ lu calle. Xi pur yaʼ.... Purtiʼ zanda guilá carru lii. Zándaca guiníʼ íqueluʼ: «Yanna gastiʼ carru. Qué zacadiáʼ gastiʼ. Huayuuyaʼ xcaadxi hombrehuiiniʼ quítecaʼ lu calle, ne gastiʼ huayácacaʼ».

Zacapeʼ nga guníʼ ique stale binni de Jerusalén que. Ora biree ca soldadu stiʼ Roma que ruluíʼ maʼ qué zaca gastiʼ. Ra biʼyaʼ ca binni de Jerusalén que nuuruʼ tu biaana ndaaniʼ guidxi que la? laaca biaanacaʼ. Maca nánnacabe cadi naquiiñeʼ diʼ guiaanacabe peru qué nuzuubacabe diidxaʼ, ne pur ngue gúticabe.

Guidúʼyanu sti ejemplu. Huaguíteluʼ cerillu la?... Zándaca ora gucaaguiluʼ ti cerillu guiécheluʼ gúʼyaluʼ gui. Peru malu nga quíteluʼ ni purtiʼ zándaca guzaaquini lídxiluʼ ne zándaca gueeda gátiluʼ.

Bietenalaʼdxiʼ, naquiiñeʼ guzuubaluʼ diidxaʼ guiráʼ ora. Ne nga nga ni dxandíʼ zulá lii. Ne tuu nga na: «Baʼdu caʼ, lauzuuba stiidxa bixhoze tu ne jñaa tu» yaʼ.... Laabe nga Dios. Ne cadi gusiaandaluʼ cayábibe ni lii purtiʼ nadxiibe lii.