Panda testigu stiʼ Jiobá runibiaʼluʼ. Zándaca xpecínuluʼ laadu, o zándaca nuu de laadu runineluʼ dxiiñaʼ o rineluʼ scuela; ne zándaca huanínedu lii de cani rusiidiʼ Biblia. Peru tupeʼ nga laadu, ne xiñee ruínedu binni de cani runi credu yaʼ.

Cásica guiráʼ binni laadu. Ládedu nuu hombre ne gunaa ni biniisi gadxé gadxé modo, nuu binni ni napa bueltu ne nuu ni qué gapa. Nuu de laadu gupa religión stiʼ, xcaadxi qué ñuni cré Dios dxiqué; peru ante gácadu testigu stiʼ Jiobá, guiradu guleedu tiempu para biziidiʼ chaahuidu cani rusiidiʼ Biblia (Hechos 17:11). Biʼniʼ credu ni bizíʼdidu ne despué gudixhe íquedu guni adorardu Jiobá Dios.

Ribeendudu ni galán ora ridúʼndadu Biblia. Cásica guiráʼ binni laadu, rápadu guendanagana ne laaca binni ruchee laadu; peru cumu rúnidu stipa pur gúnidu ni na ca conseju stiʼ Biblia lu xquendanabánidu guiráʼ dxi la? nabánidu jma galán (Salmo 128:1, 2). Nga nga tobi de ca razón ni nápadu para güínedu binni de ca cosa galán ni cazíʼdidu lu Biblia.

Nabánidu casi modo na Dios. Guiráʼ cani rusiidiʼ Biblia racanécani laadu guni sentirdu galán. Ne laaca racanécani laadu guni respetardu binni, gácadu nachaʼhuiʼ ne cadi cuánadu. Racaneni laadu gaca xquendabiaanidu nayá, gúnidu xiixa ni zacané binni, ne racanedu chuʼ ca familia ca tobi si ne guibánicaʼ casi na Dios. Nanna dxíchidu «biaʼca risaca irá binni nezalú Dios». Nga runi, laadu ca testigu stiʼ Jiobá, nuudu lu guidubi Guidxilayú, zadu de guiráʼ raza ne guidxi. Neca casi guiráʼ binni laadu, peru nácadu ti guidxi ni gástiruʼ stobi casi laa (Hechos 4:13; 10:34, 35).

• Xiñee zanda guininu cásica guiráʼ binni nga ca testigu stiʼ Jiobá.

• Xi maʼ bisiidiʼ Biblia laadu.

Stale binni runi cré nacubi religión stiʼ ca testigu stiʼ Jiobá. Peru maʼ raca jma de chupa mil gadxe gayuaa iza de biree lá ca xpinni Dios ni dxandíʼ «testigu» stibe (Isaías 43:10-12). Binibiáʼcabe laadu casi ca Binni Ruundaʼ Biblia ante de iza 1931. Peru xiñee gudixhe íquedu guireʼ ladu testigu stiʼ Jiobá yaʼ.

Purtiʼ rusihuínnini tuu nga Dios stidu. Lá Dios nga Jiobá ne stale mil biaje rieeteʼ ni lu Biblia, nuu stale rollo nayooxhoʼ ni rusihuinni zacá ni. Ndaaniʼ stale Biblia maʼ guleecabe labe ne rucaacabe ni Señor o Dios. Peru Dios ni dxandíʼ gúdxibe Moisés Jiobá nga labe ne gúdxibe laa: «Ndiʼ nga laʼyaʼ ne qué ziuu dxi guinitilú ni» (Éxodo 3:15). Zacá bisihuínnibe maʼ gadxé laabe de ca dios ni cadi dxandíʼ. Ne nabé riéchedu chinedu lá Dios ni nandxóʼ.

Purtiʼ rusihuínnini xi dxiiñaʼ rúnidu. Dede dxi bibani Abel huayuu binni ni bisihuinni gupa fe Jiobá. Ra gudiʼdiʼ gayuaa de iza guyuu xcaadxi «binni ni bini cre Dios chiqué» casi Noé, Abrahán, Sara, Moisés ne David (Hebreos 11:4–12:1). Cásica rié binni de testigu nezalú ti juez para gusihuinni qué gapa tuuxa donda la? zacaca nga laadu, maʼ gudixhe íquedu guinidu ni dxandíʼ de Dios nezalú binni.

Purtiʼ rinándadu ejemplu stiʼ Jesús. Biblia na naca Jesús ti binni «ni qué rusiguii sínuque irá ni riníʼ la? jneza ni» o «ti testigu ni qué ruchee ne ni riníʼ puru si ni dxandíʼ» (Apocalipsis [Revelación] 3:14, TNM). Laapebe guniʼbe beeda gusiidibe binni lá Bixhózebe ne beedabe para güínebe «binni xii nga ni dxandíʼ» de Dios (Juan 17:26; 18:37). Nga runi, cani dxandíʼ xpinni Cristu naquiiñeʼ chinecaʼ lá Jiobá ne gusiidicaʼ ni binni. Ne laadu, ca testigu stiʼ Jiobá rúnidu stipa pur gúnidu zacá.

• Xiñee dxiqué bireʼ ladu ca Binni Ruundaʼ Biblia ne yanna maʼ ladu ca testigu stiʼ Jiobá yaʼ.

• Dede padxí bizulú gupa Jiobá Testigu stiʼ lu Guidxilayú riʼ.

• Tuu nga testigu stiʼ Jiobá jma risaca ni huayuu biaʼ dxi huabani binni.

Biblia maca guníʼ, gati si Cristu ziasa binni ni gusiguii ne zusiidiʼ ni cadi zeeda lu Stiidxaʼ Dios lade ca primé xpinni Cristu (Hechos 20:29, 30). Ngapeʼ nga ni bizaaca: ca maestru ni qué rusiidiʼ ni dxandíʼ biguuchacabe cani bisiidiʼ Jesús né cani runi cré binni ni qué runi ni na Dios, ne zacá biʼniʼ yuudxucabe cani bisiidiʼ Cristu (2 Timoteo 4:3, 4). Ne ni maʼ bidúʼyanu riʼ, xiñee rábidu jneza nga modo riénedu cani rusiidiʼ Biblia yaʼ.

Bidxiña dxi gusihuinni Jiobá xii nga ni dxandíʼ. Dios maca guníʼ «zadale ca binni ni ganna xii nga ni dxandíʼ» lu ca últimu dxi (Daniel 12:4). Lu iza 1870, guyuu caadxi binni ni biyubi ganna ni dxandíʼ ne bidiicaʼ cuenta cadi zeeda stale de cani rusiidiʼ ca yuʼduʼ ca lu Biblia. Nga gucané laacabe guyúbicabe guiene chaahuicabe xipeʼ nga rusiidiʼ Stiidxaʼ Dios ne gucané Jiobá laacabe guiénecabe ni.

Biyubi caadxi hombre nayá ladxidóʼ guiene chaahuicaʼ Biblia. Ca binni ni bizulú biʼndaʼ Biblia primé que, biquiiñecaʼ ti modo cásica ni riquiiñedu yanna riʼ: biindacabe Biblia pur tema. Ora qué ganda guiénecabe xiixa relatu ni zeeda lu Biblia, ruyúbicabe sti relatu ni zanda gacané laacabe guiénecabe ni, ne ora maʼ biiyacabe biaʼsi zaqué nga rusiidiʼ Biblia la? maca zigucaacabe ni. Racá ridúʼyanu laaca Biblia bisiene laacabe cani cadi cayénecabe, casi tupeʼ nga láʼ Dios ne gunna chaahuicabe stale cosa de Reinu stibe, ne cani naguixhe íquebe gúnibe para binni ne para Guidxilayú. Ne laaca biénecabe ximodo nuu ca gueʼtuʼ ne ziuu ti dxi zandisaʼ Dios laacaʼ. Guiráʼ cani bíʼndacabe ne cani biénecabe gucanécani laacabe gusaana de guni crécabe caadxi cosa cadi jneza ne gusaana de gúnicabe cani (Juan 8:31, 32).

Lu iza 1879 biénecabe maʼ naquiiñeʼ gusiidicabe binni de guiráʼ guidxi xii nga ni dxandíʼ. Laaca lu iza que nga bizulú guleecabe revista Torre stiʼ ni rapa. Ni caníʼ de Reinu stiʼ Jiobá, ne dede yanna riquiiñedu revista riʼ para gusíʼdidu binni. Yanna, lu chupa gayuaa cuarenta guidxi ne jma de gadxe gayuaa cincuenta diidxaʼ rusíʼdidu binni cani dxandíʼ zeeda lu Biblia. ¡Qué huayuu dxi ganna binni de Stiidxaʼ Dios casi cayánnacaʼ ni yanna!

• Xi bizaaca né cani rusiidiʼ Stiidxaʼ Dios guti si Cristu.

• Ximodo gunda biene ca primé xpinni Cristu cani dxandíʼ rusiidiʼ Stiidxaʼ Dios.

Laadu, ca testigu stiʼ Jiobá biʼniʼ imprimirdu gadxé gadxé Biblia, biquiiñedu cani ne gudíʼzidu cani pur stale iza. Peru ra gudiʼdiʼ dxi bidúʼyadu caquiiñeʼ gutiixhidu ti Biblia ni ganda gacané binni «ganna ca ni dxandíʼ», ne ngapeʼ nga ni racalaʼdxiʼ Dios para guiráʼ binni (1 Timoteo 2:3, 4). Nga runi, lu iza 1950 bizulú guleedu caadxi libru stiʼ Biblia stidu lu diidxaʼ inglés, ne laani nga Traducción del Nuevo Mundo. Luni biquiiñedu diidxaʼ ni jma riene binni, ne jnézapeʼ modo bitiixhidu ni lu jma de ti gayuaa treinta diidxaʼ.

Caquiiñeʼ ti Biblia ni guiene binni. Ra zidiʼdiʼ iza ruchaa modo riníʼcabe ti diidxaʼ, nga runi, lu stale Biblia zeeda diidxaʼ ni huaxiéʼ riene binni o ni maʼ qué riquiiñecaʼ. Ne laaca maʼ huadxélacabe caadxi rollo nayooxhoʼ ne laacani nga copia jma jneza stiʼ ca primé rollo stiʼ Biblia. Nga runi, yanna maʼ zanda guiénenu cani gucuá lu diidxaʼ hebreu, arameu ne griegu ni biquiiñeʼ dxi gucuá Biblia.

Caquiiñeʼ ti Biblia ni cadi guchaa cani gucuá lu Stiidxaʼ Dios. Cani rutiixhi diidxaʼ cadi naquiiñeʼ gúnicaʼ ni gacaláʼdxicaʼ ora gutiixhicaʼ ca diidxaʼ ni guníʼ Dios guicá, sínuque naquiiñeʼ gucaacabe guiráʼ ni gucuá lu Stiidxaʼ Dios primé. Peru lu stale de ca Biblia ni huatiixhicabe qué riquiiñecabe lá Dios, Jiobá.

Caquiiñeʼ ti Biblia ni gusisaca ni guníʼ xi guicá luni (2 Samuel 23:2). Lu Traducción del Nuevo Mundo, maʼ bicaa chaahuicabe lá Jiobá biaʼ gadxe mil biaje ra cá ni lu ca rollo ni maʼ nayooxhoʼ, ne ñee yaza riʼ zeeda ti ejemplu (Salmo 83:18). Nabé nayecheʼ runi sentir binni ora ruundaʼ Biblia riʼ, purtiʼ nayá modo rusiéneni xi riníʼ ique Dios ne para gúcani zacá biquiiñeʼ stale iza para guihuinni xi guicá luni. Pa napuʼ Biblia riʼ lu stiidxaluʼ o pa qué gapuʼ ni la? rinábadu lii guiaaluʼ gúʼndaluʼ Stiidxaʼ Jiobá guiráʼ dxi (Josué 1:8; Salmo 1:2, 3).

• Xiñee bidúʼyadu caquiiñeʼ gutiixhidu ti Biblia.

• Xi caquiiñeʼ guiaa ti binni guni guiráʼ dxi pa riuulaʼdxiʼ ganna xi racalaʼdxiʼ Dios.