-
¿Xii nga Reinu stiʼ Dios?¡Zanda guibániluʼ nayecheʼ! Ti libru ni zacané lii guiéneluʼ ni ná Biblia
-
-
LECCIÓN 31
¿Xii nga Reinu stiʼ Dios?
Reinu stiʼ Dios nga ti tema nabé risaca ruzeeteʼ Biblia. Ne Reinu riʼ nga chiguiquiiñeʼ Jehová para guni ni maca gudixhe ique para binni guidxilayú. ¿Xii nga Reinu stiʼ Dios yaʼ? ¿Ximodo nánnanu maʼ cayuni mandar ni? ¿Xi guiráʼ maʼ biʼniʼ Reinu riʼ? Ne ¿xi zúnini ca dxi zeeda ca yaʼ? Zacábinu ca pregunta riʼ lu lección riʼ ne lu xhupa lección ni zeeda ca.
1. ¿Xii nga Reinu stiʼ Dios, ne tuu nga Rey stini?
Reinu stiʼ Dios nga ti gobiernu ni maʼ gudixhe Jehová chuʼ guibáʼ ne Rey ca nga Jesucristu (Mateo 4:17; Juan 18:36). Biblia ná: «Zuni mandarbe para siempre» (Lucas 1:32, 33). Cumu laabe nga Rey lu Reinu stiʼ Dios la? zuni mandarbe guiráʼ binni nuu lu guidubi Guidxilayú.
2. ¿Tuu nga ca ni cayuni mandarné Jesús?
Cadi Jesús si nga cayuni mandar. Biblia ná zuni mandarnebe «binni de guiráʼ tribu, idioma, guidxi ne nación [...]. Ne zuni mandárcabe guidxilayú» (Apocalipsis 5:9, 10). Yanna, ¿panda nga tu chiguni mandarné Cristu yaʼ? Dede dxi guyuu Jesús lu Guidxilayú riʼ stale binni nga maʼ gudixhe ique gácacaʼ xpínnibe. Peru 144,000 si binni nga zié guibáʼ para guni mandarné laabe (biindaʼ Apocalipsis 14:1-4). Xcaadxi xpinni Cristu ni guibani lu Guidxilayú riʼ la? zuni mandar Reinu stiʼ Dios laacaʼ (Salmo 37:29).
3. ¿Xiñee gástiruʼ sti gobiernu jma galán que Reinu stiʼ Dios?
Nuu gobiernu ruyubi guni chaahuiʼ ca guendanagana stiʼ binni, peru qué randa rúnicabe ni purtiʼ cadi lu nácabe nuu guni chaahuicabe stale cosa. Ridiʼdiʼ si ti tiempu ribí sti gobiernu ne zándaca laa qué lica guizaalaʼdxiʼ binni. Peru cadi zacá diʼ nga Jesús, Rey ni maʼ gulí Dios para guni mandar lu Guidxilayú riʼ, ninruʼ sti rey qué zabí despué de laabe. Ya, Dios «zucuí ti reinu ni qué ziuu dxi guinitilú» (Daniel 2:44). Zuni mandar Jesús lu guidubi naca Guidxilayú ne zuni tratarbe guiráʼ binni igual. Nácabe ti Rey nadóʼ, nachaʼhuiʼ ne runi ni jneza, peru laaca zusiidibe binni guni ni jneza, gaca nadóʼ ne nachaʼhuiʼ (biindaʼ Isaías 11:9).
GUIZÍʼDIRUNU JMA
Guidúʼyanu xiñee jma galán Reinu stiʼ Dios que ca gobiernu nuu lu Guidxilayú riʼ.
4. Zuni mandar ti Rey ni napa poder lu Guidxilayú riʼ.
Jma nanna Jesús guni mandar ne jma napa poder que tutiica gobiernu nuu lu Guidxilayú riʼ. Laguundaʼ Mateo 28:18 ne laiquiiñeʼ pregunta riʼ para güitu diidxaʼ:
¿Xiñee jma risaca autoridad ni gucuaa Jesús que autoridad ni napa ca gobiernu?
Ca gobiernu nuu lu Guidxilayú riʼ la? ti parte si de laani nga runi mandárcabe ne despué rusaanacabe de gúnicabe ni. ¿Ñee laaca zacá nga zazaaca né Reinu stiʼ Dios la? Laguundaʼ Daniel 7:14 ne laiquiiñeʼ ca pregunta riʼ para güitu diidxaʼ:
¿Xiñee jma galán nga gápanu ti Reinu ni qué ziuu dxi guinitilú?
¿Xiñee galán guni mandar Reinu riʼ lu guidubi naca Guidxilayú?
5. Zadxaa ca gobiernu ni nuu lu Guidxilayú riʼ
¿Xiñee caquiiñeʼ chuʼ Reinu stiʼ Dios lugar stiʼ ca gobiernu nuu yanna? Laguuyaʼ VIDEU riʼ ne laiquiiñeʼ pregunta riʼ para güitu diidxaʼ:
¿Xi cosa ni cadi jneza huayuni ca gobiernu ca?
Laguundaʼ Eclesiastés 8:9 ne laiquiiñeʼ ca pregunta riʼ para güitu diidxaʼ:
¿Ñee rábiluʼ jma galán nga guni mandar Reinu stiʼ Dios que ca gobiernu nuu lu Guidxilayú riʼ la? ¿Xiñee riníʼ íqueluʼ zacá yaʼ?
6. Guiráʼ ca ni chiguni mandar lu Reinu stiʼ Dios riénecaʼ laanu
Cumu maca bibani Jesús, Rey stinu lu Guidxilayú riʼ la? «nanna xi raca nagana para laanu» (Hebreos 4:15). Maʼ gulí Jehová 144,000 hombre ne gunaa ni ruzuubaʼ stiidxaʼ para guni mandarné Jesús. Ne nácacabe «binni de guiráʼ tribu, idioma, guidxi ne nación» (Apocalipsis 5:9).
¿Ximodo runi sentirluʼ ora gánnaluʼ guiráʼ ca ni chiguni mandarné Jesús riénecaʼ ximodo nga guibani binni lu guidxilayú riʼ? ¿Xiñee runi sentirluʼ zacá yaʼ?
Maʼ gulí Jehová caadxi hombre ne gunaa ni bibani gadxé gadxé tiempu ne de gadxé gadxé cultura para guni mandarné Jesús.
7. Jma galán ca ley stiʼ Reinu stiʼ Dios que ca ley riguixhe binni
Riguixhe ca gobiernu caadxi ley para gacanecaʼ ne gápacaʼ binni. Reinu stiʼ Dios laaca napa caadxi ley ni naquiiñeʼ chinanda binni. Laguundaʼ 1 Corintios 6:9-11 ne laiquiiñeʼ ca pregunta riʼ para güitu diidxaʼ:
¿Ximodo rábiluʼ zabani binni lu Guidxilayú riʼ ora chinándacaʼ ley stiʼ Dios?a
¿Ñee rábiluʼ jneza nga guinabaʼ Jehová binni chinándacaʼ ca ley stiʼ Reinu riʼ la? ¿Xiñee rábiluʼ zacá ni yaʼ?
¿Ximodo nánnanu zanda guchaa ca binni ni qué rinanda ca ley riʼ? (Laguuyaʼ versículo 11).
Riguixhe ca gobiernu ley para ganda gápacaʼ ne gacanecaʼ binni. Peru jma galán ca ley ni napa Reinu stiʼ Dios para binni ne laaca rápani ne racaneni laacabe.
NUU TU NÁ: «Ndaaniʼ ladxidoʼno nga nuu Reinu stiʼ Dios».
¿Xi nicábiluʼ?
XI BIZÍʼDINU
Reinu stiʼ Dios nga ti gobiernu ni maʼ gudixhe Jehová chuʼ guibáʼ ne zuni mandar ni lu guidubi naca Guidxilayú.
Xi biziidiluʼ
¿Tuu nga ca ni cayuni mandar lu Reinu stiʼ Dios?
¿Xiñee gástiruʼ sti gobiernu jma galán que Reinu stiʼ Dios?
¿Xi ribeza Jehová guni guiráʼ binni ora maʼ guni mandar Reinu stiʼ Dios lu Guidxilayú?
BIIYAʼ XIRUʼ ZANDA GUIZIIDILUʼ
Biiyaʼ paraa bisiidiʼ Jesús nuu Reinu stiʼ Dios.
«¿Ñee ndaaniʼ ladxidóʼ binni nga nuu Reinu stiʼ Dios la?» (Tema ni zeeda lu jw.org)
¿Xiñee jma ruyubi ca testigu stiʼ Jehová guzuubacaʼ stiidxaʼ Reinu stiʼ Dios que stiidxaʼ ca gobiernu nuu lu Guidxilayú riʼ?
Biiyaʼ xi riníʼ Biblia de 144,000 binni ni maʼ gulí Jehová para guni mandarné Jesús.
Biiyaʼ xi gucané ti gunaa guni cré Reinu si stiʼ Dios nga zanda guni chaahuiʼ guiráʼ guendanagana rapa binni.
«Biziideʼ tu chiguni chaahuiʼ guiráʼ injusticia» (¡Gutaná! noviembre de 2011)
-
-
¡Maʼ cayuni mandar Reinu stiʼ Dios!¡Zanda guibániluʼ nayecheʼ! Ti libru ni zacané lii guiéneluʼ ni ná Biblia
-
-
LECCIÓN 32
¡Maʼ cayuni mandar Reinu stiʼ Dios!
Dede lu iza 1914 bizulú Reinu stiʼ Dios cayuni mandar guibáʼ. Laaca iza ca bizulú ca últimu dxi cayuni mandar binni guidxilayú. ¿Xiñee nánnanu zacá ni yaʼ? Lu lección riʼ zaziidiluʼ chupa cosa, primé, xi guníʼ Biblia chiguizaaca. Ne guiropa, ximodo bichaa xpiaʼ binni ne modo nabani dede lu iza 1914.
1. ¿Xi maca guníʼ Biblia?
Maca bizeeteʼ libru stiʼ Daniel zuzulú zuni mandar Reinu stiʼ Dios guiluxe si «gadxe tiempu» (Daniel 4:16, 17). Stale iza despué, bizeeteʼ Jesús de tiempu riʼ casi «tiempu stiʼ ca guidxi», para dxi guniʼbe ca diidxaʼ riʼ caʼruʼ guiluxe tiempu ca (Lucas 21:24). Casi chiguiziidiluʼ lu lección riʼ, biluxe gadxe tiempu ca lu iza 1914.
2. ¿Ximodo bichaa xpiaʼ binni ne modo nabani dede lu iza 1914?
Ca discípulo stiʼ Jesús gunabadiidxacaʼ: «¿Xi señal gusihuinni presencia stiluʼ ne dxi guiluxe guidxilayú riʼ?» (Mateo 24:3). Para gudxi Jesús laacabe zazaaca stale cosa despué de guzulú guni mandar lu Reinu stiʼ Dios. Bizeetebe de guerra, hambre ne xu roʼ (biindaʼ Mateo 24:7). Biblia maca guníʼ, pur modo gaca xpiaʼ binni «lu ca últimu dxi», jma «nadipaʼ zaca para binni guni huantar ni» (2 Timoteo 3:1-5). Ne dede lu iza 1914 cadúʼyanu zacá nabani binni.
3. ¿Xiñee jma feu modo nabani binni guidxilayú dede dxi bizulú cayuni mandar Reinu stiʼ Dios?
Despué de bizulú Jesús cayuni mandar lu Reinu stiʼ Dios, bizulú ti guerra guibáʼ, bicaalube Binidxabaʼ ne ca demonio stiʼ. Qué ñanda ñuni ganar Binidxabaʼ, Biblia ná: «Bilaacabe laa lu guidxilayú, laa ne ca ángel stiʼ» (Apocalipsis 12:9, 10, 12). Guizáʼ cadxiichi Binidxabaʼ purtiʼ nanna maʼ cadi candaa zanitilú. Cayuninabe ne caguítebe binni lu guidubi naca Guidxilayú. Nga runi, ¡zeʼ dxi jma feu modo nabani binni! Peru maʼ cadi candaa zuni chaahuiʼ Dios guiráʼ guendanagana rapa binni.
GUIZÍʼDIRUNU JMA
Guidúʼyanu xi prueba rusihuinni bizulú cayuni mandar Reinu stiʼ Dios dede lu iza 1914 ne xi rucaa ni laanu gúninu.
4. Rusihuinni ca profecía zeeda lu Biblia bizulú Reinu stiʼ Dios cayuni mandar lu iza 1914
Lu ti bacaandaʼ biluíʼ Dios Nabucodonosor, rey stiʼ Babilonia, xi chiguizaaca. Daniel guníʼ runi representar bacaandaʼ riʼ gobiernu stiʼ Nabucodonosor, ne laaca runi representar ni Reinu stiʼ Dios (laguundaʼ Daniel 4:17).a
Laguundaʼ Daniel 4:20-26. Despué laiquiiñeʼ recuadru ni zeeda lu sti yaza ca para guicábitu ca pregunta riʼ:
A) ¿Xi biʼyaʼ Nabucodonosor lu bacaandaʼ que? (Laguundaʼ versículo 20 ne 21).
B) ¿Xi zazaaca yaga que? (Laguundaʼ versículo 23).
C) ¿Xi zazaaca guiluxe si «gadxe tiempu» que? (Laguundaʼ versículo 26).
Yaga ni guníʼ xcaandaʼ Nabucodonosor ne Reinu stiʼ Dios
PROFECÍA (Daniel 4:20-36)
Dxi cayuni mandarbe
A) Ti yaga naroʼbaʼ
Dxi bisaana de guni mandarbe
B) «Laugá yaga ca» ne lagudii lugar «tidiʼ gadxe tiempu»
Dxi biguetaʼ biʼniʼ mandarbe
C) «Zabiguetaʼ zuni mandarluʼ»
Primé biaje guca cumplir ni:
D) ¿Tu biʼniʼ representar yaga que? (Laguundaʼ versículo 22).
E) ¿Padxí bisaana de guni mandarbe? (Laguundaʼ Daniel 4:29-33).
F) ¿Xi bizaacabe gudiʼdiʼ si «gadxe tiempu» que? (Laguundaʼ Daniel 4:34-36).
PRIMÉ BIAJE GUCA CUMPLIR NI
Dxi cayuni mandarbe
D) Nabucodonosor, rey stiʼ Babilonia
Dxi bisaana de guni mandarbe
E) Guyé xpiaaniʼ Nabucodonosor despué de iza 606 a.J.b ne maʼ qué ñanda ñuni mandar gadxe iza
Dxi biguetaʼ biʼniʼ mandarbe
F) Bibiguetaʼ xpiaaniʼ Nabucodonosor ne biʼniʼ mandar sti biaje
Guiropa biaje guca cumplir ni
G) ¿Tu biʼniʼ representar yaga que? (Laguundaʼ 1 Crónicas 29:23).
H) ¿Padxí bisaana de guni mandárcabe? ¿Ximodo nánnanu cadi cayuni mandárcabe dxi bibani Jesús lu Guidxilayú riʼ? (Laguundaʼ Lucas 21:24).
I) ¿Padxí ne paraa bibiguetaʼ biʼniʼ mandar Reinu stiʼ Dios?
GUIROPA BIAJE GUCA CUMPLIR NI
Dxi cayuni mandarbe
G) Ca rey ni biʼniʼ mandar guidxi Israel, biʼniʼ representárcabe gobiernu stiʼ Dios
Dxi bisaana de guni mandarbe
H) Binitilú Jerusalén lu iza 607 a.J. ne maʼ qué ñuu Rey de guidxi Israel para ñuni mandar 2,520 iza
Dxi biguetaʼ biʼniʼ mandarbe
I) Bizulú Jesús cayuni mandar guibáʼ casi Rey stiʼ Reinu stiʼ Dios lu iza 1914
¿Pabiáʼ rindaa gadxe tiempu que?
Caadxi textu zeeda lu Biblia racanécani laanu guiénenu xcaadxi textu. Casi lu Apocalipsis riete 1,260 dxi nga chonna tiempu arondaʼ (Apocalipsis 12:6, 14). Ne doble de laani nga gadxe tiempu o 2,520 dxi. Nuu biaje ora riete lu Biblia de ti dxi la? caniʼni de ti iza (Ezequiel 4:6). Nga runi zanda guininu, gadxe tiempu ni riete lu libru stiʼ Daniel: runi representar ni 2,520 iza.
5. Bichaa modo nabani binni dede lu iza 1914
Maca guníʼ Jesús ximodo zabani binni ora guzulú guni mandar. Laguundaʼ Lucas 21:9-11 ne laiquiiñeʼ pregunta riʼ para güitu diidxaʼ:
De guiráʼ ni biete lu ca versículo riʼ, ¿gunáʼ ni cayuuyaluʼ o huayunadiágaluʼ cayaca?
Apóstol Pablo laaca guníʼ ximodo zaca xpiaʼ binni lu ca últimu dxi riʼ. Laguundaʼ 2 Timoteo 3:1-5 ne laiquiiñeʼ pregunta riʼ para güitu diidxaʼ:
¿Ñee huayuuyaluʼ clase binni riete lu ca versículo riʼ la?
6. ¿Xi caquiiñeʼ gúninu ora gánnanu maʼ cayuni mandar Reinu stiʼ Dios?
Laguundaʼ Mateo 24:3, 14 ne laiquiiñeʼ ca pregunta riʼ para güitu diidxaʼ:
¿Xi dxiiñaʼ risaca rusihuinni maʼ cayuni mandar Reinu stiʼ Dios?
¿Ximodo zanda gacaneluʼ para gaca dxiiñaʼ riʼ?
Maʼ cayuni mandar Reinu stiʼ Dios, ne maʼ cadi candaa laaca zuni mandar ni lu guidubi Guidxilayú. Laguundaʼ Hebreos 10:24, 25 ne laiquiiñeʼ pregunta riʼ para güitu diidxaʼ:
¿Xi caquiiñeʼ gúninu ra guidúʼyanu «jma maʼ gaxha nuu dxi stiʼ Dios»?
Pa ñánnaluʼ xiixa ni zanda gulá sti binni, ¿xi ñúniluʼ?
NUU TU RINABADIIDXAʼ: «¿Xiñee nabé ruzeeteʼ ca testigu stiʼ Jehová iza 1914?».
¿Lii xi riníʼ íqueluʼ yaʼ?
XI BIZÍʼDINU
Rusihuinni ca profecía ne modo nabani binni maʼ cayuni mandar Reinu stiʼ Dios. Laanu laaca zanda gusihuínninu maʼ cayuni mandar Reinu stiʼ Dios pa guni predicarnu de laani ne pa qué guiáʼdxanu reunión.
Xi biziidiluʼ
¿Xi bizaaca biluxe si gadxe tiempu ni ruzeeteʼ libru stiʼ Daniel?
¿Xiñee runi creluʼ bizulú Reinu stiʼ Dios cayuni mandar lu iza 1914?
¿Ximodo zanda gusihuínniluʼ runi creluʼ maʼ cayuni mandar Reinu stiʼ Dios?
BIIYAʼ XIRUʼ ZANDA GUIZIIDILUʼ
Biiyaʼ xi guníʼ caadxi historiador de modo bichaa xquendanabani binni dede lu iza 1914.
«Dxi jma bihuinni zinitilú binni guidxilayú» (¡Gutaná! abril de 2007)
Biiyaʼ xi biʼniʼ ti hombre ora gunna profecía ni zeeda lu Mateo 24:14.
¿Ximodo nánnanu de Reinu stiʼ Dios nga caníʼ profecía ni zeeda lu capítulo 4 stiʼ Daniel?
«Padxí bizulú cayuni mandar Reinu stiʼ Dios (Primé ndaa)» (Torre stiʼ ni rapa, 1 de octubre de 2014)
¿Xi rusihuinni biluxe «gadxe tiempu» ni ruzeeteʼ capítulo 4 stiʼ Daniel lu iza 1914?
a Biindaʼ guionna ne guidapa revista ni riete lu sección «Biiyaʼ xiruʼ zanda guiziidiluʼ» ni zeeda lu lección riʼ.
b Ora gúʼyaluʼ cá a.J. la? caniʼni ante de ca dxi stiʼ Jesús. Ne ora gúʼyaluʼ cá d.J. la? caniʼni despué de ca dxi stiʼ Jesús.
-
-
Xi chiguni Reinu stiʼ Dios¡Zanda guibániluʼ nayecheʼ! Ti libru ni zacané lii guiéneluʼ ni ná Biblia
-
-
LECCIÓN 33
Xi chiguni Reinu stiʼ Dios
Maʼ cayuni mandar Reinu stiʼ Dios guibáʼ. Ne maʼ cadi candaa zuni chaahuiʼ ni Guidxilayú riʼ. Guidúʼyanu xi guiráʼ cosa galán chiguni Reinu riʼ ne xiñee rusiecheʼ ni laanu.
1. ¿Xi chiguni Reinu stiʼ Dios para guibiguetaʼ chuʼ paz ne justicia lu Guidxilayú riʼ?
Lu guerra ni láʼ Armagedón, zunitilú Jesús—ni naca Rey stiʼ Reinu stiʼ Dios—guiráʼ binni malu ne guiráʼ gobiernu nuu lu Guidxilayú riʼ (Apocalipsis 16:14, 16). Ne dxi ca nga gaca cumplir promesa ni zeeda lu Biblia riʼ: «Maʼ xcaadxi si tiempu cayaadxaʼ, ne maʼ qué ziuu binni malu» (Salmo 37:10). Zudxiguetaʼ Jesús paz ne justicia lu guidubi naca Guidxilayú riʼ (biindaʼ Isaías 11:4).
2. ¿Ximodo zabani binni ora gaca ni ná Dios lu Guidxilayú riʼ?
Ora guni mandar Reinu stiʼ Dios, Biblia ná: «Zacaa ca ni biʼniʼ ni jneza guidxilayú ne zabánicaʼ luni para siempre» (Salmo 37:29). ¡Guníʼ ique si ximodo zabáninu lade ca binni ni nadxii Jehová ne nadxiisaacaʼ! ¿Cadi rábiluʼ guizáʼ galán nga la? Qué zaca huará binni ne qué ziuu dxi gatiʼ.
3. ¿Xi guiráʼ chiguni Reinu stiʼ Dios gunitilú si guiráʼ binni malu?
Gunitilú si Jesús guiráʼ binni malu, zuni mandar 1,000 iza. Ne para tiempu ca, Jesús ne 144,000 ni chiguni mandarné zacanécabe binni guidxilayú gácacaʼ perfectu. Ne dxi guiluxe tiempu riʼ, zaca Guidxilayú riʼ ti paraísu sicarú ra zabani binni nayecheʼ purtiʼ ruzuubacaʼ stiidxaʼ Jehová. Ne óraca zudxiguetaʼ Jesús Reinu ca Jehová. Óraca nga zaca santificar lá Jehová lu guidubi naca Guidxilayú (Mateo 6:9, 10). Laaca zahuinni jneza modo runi mandar Jehová ne rapa ca xpinni. Despué zunitilú Jehová Binidxabaʼ ne ca demonio stiʼ, ne tutiica gacalaʼdxiʼ gucaalú gobiernu stibe (Apocalipsis 20:7-10). Ne qué ziuu dxi gusaana de guibani binni galán ne nazaaca ra guni mandar Reinu stiʼ Dios.
GUIZÍʼDIRUNU JMA
Guidúʼyanu ximodo zaquiiñeʼ Dios Reinu stiʼ para guni cumplir guiráʼ promesa ni zeeda lu Biblia.
4. Zunitilú Reinu stiʼ Dios guiráʼ gobiernu ni nuu lu Guidxilayú riʼ
Biblia ná: «Binni huayuni mandar binni para si gacanacaʼ» (Eclesiastés 8:9). Zaquiiñeʼ Jehová Reinu stiʼ para guni chaahuiʼ guiráʼ ra maʼ bininá ca gobiernu malu riʼ.
Laguundaʼ Daniel 2:44 ne 2 Tesalonicenses 1:6-8, ne laiquiiñeʼ ca pregunta riʼ para güitu diidxaʼ:
¿Xi zuni Jehová ne Jesús ca gobiernu malu nuu lu Guidxilayú riʼ ne ca ni runi apoyar laacaʼ?
Pur guiráʼ ni maʼ nánnaluʼ de Jehová ne Jesús, ¿xiñee zanda guni creluʼ zúnicabe ni jneza?
5. Gástiruʼ sti Rey casi Jesús
Ora guni mandar Jesús lu Guidxilayú riʼ zuni stale cosa galán para binni. Laguuyaʼ VIDEU riʼ para guietenaláʼdxitu ximodo bisihuinni Jesús racalaʼdxiʼ gacané binni ne maʼ bidii Dios laabe poder para gúnibe ni.
Rusihuinni guiráʼ cosa ni biʼniʼ Jesús dxi guyuu lu Guidxilayú riʼ, xi guiráʼ chiguni Reinu stiʼ Dios. ¿Gunáʼ de ca promesa riʼ maʼ ñuuláʼdxiluʼ ñaca cumplir? Laguundaʼ ca textu ra zeeda ca promesa riʼ.
DXI GUYUU JESÚS LU GUIDXILAYÚ RIʼ...
ORA GUNI MANDAR JESÚS LU GUIDXILAYÚ RIʼ...
... gunda bicueeza ca desastre natural (Marcos 4:36-41)
... zuni chaahuiʼ guiráʼ ra maʼ biʼniʼ contaminar binni (Isaías 35:1, 2)
... bidii ni gudó mil de binni (Mateo 14:17-21)
... zabee hambre lu guidubi naca Guidxilayú (Salmo 72:16)
... bisianda stale binni (Lucas 18:35-43)
... zabee guendahuará lu guidubi naca Guidxilayú (Isaías 33:24)
... bisibani caadxi binni (Lucas 8:49-55)
... zabee guiráʼ yuubaʼ ni redané guendaguti (Apocalipsis 21:3, 4)
6. Zabáninu galán dxi guni mandar Reinu stiʼ Dios lu Guidxilayú
Zuni Reinu stiʼ Dios guiráʼ ni gudixhe ique Jehová para binni guidxilayú. Zabánicaʼ ndaaniʼ ti paraísu lu Guidxilayú riʼ sin qué chuʼ dxi gáticaʼ. Laguuyaʼ VIDEU riʼ para gánnatu ximodo caquiiñeʼ Jehová Xiiñiʼ para guni ni racalaʼdxiʼ.
Laguundaʼ Salmo 145:16 ne laiquiiñeʼ pregunta riʼ para güitu diidxaʼ:
¿Ximodo runi sentirluʼ ora gánnaluʼ zudii Jehová «guiráʼ ni racalaʼdxiʼ ca ni nabani»?
NUU TU NÁ: «Pa guiráʼ binni ñuni ni jneza la? ñanda ñaca chaahuiʼ guiráʼ guendanagana nuu lu Guidxilayú».
¿Xi guendanagana zuni chaahuiʼ Reinu stiʼ Dios ni qué ganda guni chaahuiʼ ca gobiernu nuu lu Guidxilayú riʼ?
XI BIZÍʼDINU
Zuni Reinu stiʼ Dios guiráʼ ni maʼ gudixhe ique Jehová. Zuni ni Guidxilayú riʼ ti paraísu ra zabani binni nachaʼhuiʼ ni qué zusaana de guni adorar Jehová.
Xi biziidiluʼ
¿Xi zuni Reinu stiʼ Dios para gaca santificar lá Jehová?
¿Xiñee zanda guni crenu zuni cumplir Reinu stiʼ Dios guiráʼ promesa zeeda lu Biblia?
De lade guiráʼ cosa ni chiguni Reinu stiʼ Dios, ¿gunáʼ ni maʼ ñuuláʼdxiluʼ ñaca cumplir?
BIIYAʼ XIRUʼ ZANDA GUIZIIDILUʼ
Biiyaʼ xii nga Armagedón.
Biiyaʼ xi guiráʼ zazaaca lu ca dxi ni gulee lá Jesús «gran tribulación» (Mateo 24:21, nota).
Biiyaʼ ximodo zanda guxuiʼlú familia stiluʼ maʼ nuu ra cayuni mandar Reinu stiʼ Dios
Biindaʼ historia ni láʼ «Nabé biyubeʼ gannaʼ respuesta stiʼ stale pregunta» para gánnaluʼ ximodo bidxela ti hombre respuesta stiʼ ca pregunta ni cuyubi.
«Gucané Biblia laacabe para bichaacabe» (Tema ni zeeda lu Torre stiʼ ni rapa)
-