¿Ñee dxandíʼ naca ca testigu stiʼ Jehová xpinni Cristu la?

Laadu, ca testigu stiʼ Jehová, runi credu dxandíʼ xpinni Cristu laadu. ¿Xiñee yaʼ? Lu lección riʼ zaziidiluʼ padé zeeda ca creencia ni nápadu, xiñee ladu testigu stiʼ Jehová ne xi clase guendarannaxhii rusihuínnidu.

1. ¿Padé zeeda ca creencia ni napa ca testigu stiʼ Jehová?

Sicaríʼ gudxi Jesús Dios: «Stiidxaluʼ nga ni dxandíʼ» (Juan 17:​17). Cásica Jesús, laadu ca testigu stiʼ Jehová: runi credu Stiidxaʼ Dios nga ni dxandíʼ. Nga runi, lu Biblia nga zeeda guiráʼ ni runi credu. Biiyaʼ ximodo bizulú ca testigu stiʼ Jehová ca dxi nabáninu riʼ. Biaʼ lu iza 1870, bizulú ti grupu de binni ruundaʼ Biblia biʼniʼ estudiar Stiidxaʼ Dios. Ne lu Biblia nga guleecabe guiráʼ ni runi crécabe, neca maʼ gadxé ni rusiidiʼ stale religión. De raqué bizulú bisiidicabe xcaadxi binni guiráʼ ni bidxélacabe lu Biblia.a

2. ¿Xiñee ladu testigu stiʼ Jehová?

Para Jehová la? ca binni ni runi adorar laa ne ni riníʼ ni dxandíʼ de laa nga ca testigu stiʼ (Hebreos 11:​4-​12:1). Dxiqué gudxi Dios xquidxi: «Laatu nga ca testigu stinneʼ» (biindaʼ Isaías 43:​10). Ne lu Biblia ná naca Jesús «Testigu Fiel» (Apocalipsis 1:5). Nga runi, dede lu iza 1931 biree ladu testigu stiʼ Jehová. Ne ti ndaayaʼ naroʼbaʼ para laadu nga guiree ladu sicaríʼ.

3. ¿Ximodo rusihuinni ca testigu stiʼ Jehová guendarannaxhii ni bisihuinni Jesús?

Guizáʼ gunnaxhii Jesús ca discípulo stiʼ ne biiyabe laacaʼ casi familia stibe (biindaʼ Marcos 3:​35). Laadu, ca testigu stiʼ Jehová, laaca nuudu tobi si casi ti familia ni nuu lu guidubi naca Guidxilayú. Nga runi para laadu, guiradu nga «hermanu» ne «hermana» (Filemón 1, 2). Laaca rúnidu ni ná mandatu stiʼ Biblia riʼ: «Lagannaxhii guiráʼ ca hermanu» (1 Pedro 2:​17). Gadxé gadxé modo nga rusihuinni ca testigu stiʼ Jehová guendarannaxhii; tobi de laacani nga racanécabe ca hermanu stícabe ni nuu lu guidubi naca Guidxilayú ora cadíʼdicaʼ lu xiixa guendanagana.

GUIZÍʼDIRUNU JMA

4. Lu Biblia nga zeeda guiráʼ ni runi credu

Maca guníʼ Jehová stale tu ziene chaahuiʼ ni cá lu Stiidxaʼ ne zaziidiʼ ni dxandíʼ. Laguundaʼ Daniel 12:4 ne laiquiiñeʼ pregunta riʼ para güitu diidxaʼ:

• ¿Xii nga ni ziene chaahuiʼ ca xpinni Dios ni guʼndaʼ Biblia?

Biiyaʼ ximodo biʼniʼ estudiar ti grupu de binni ruundaʼ Biblia Stiidxaʼ Dios, ládecabe nuu Charles Russell. Laguuyaʼ VIDEU riʼ ne laiquiiñeʼ pregunta riʼ para güitu diidxaʼ:

VIDEU: Biene chaahuicabe ni dxandíʼ rusiidiʼ Biblia (7:​45)

• Casi bidúʼyanu lu videu riʼ, ¿ximodo biindaʼ chaahuiʼ Charles Russell ne xcaadxi binni ruundaʼ Biblia Stiidxaʼ Dios?

¿Ñee nannuʼ ndiʼ la?

Nuu biaje huachaʼduʼ modo runi credu xiixa. ¿Xiñee yaʼ? Purtiʼ chaahuidugá chaaduidugá nga zigusiene Dios laadu ni ná Stiidxaʼ, cásica ora zedará gueelaʼ ne guiree Gubidxa, chaahuidugá chaahuidugá jma ziyaaniʼ ne randa rihuinni chaahuiʼ guiráʼ cosa nuu gaxha (biindaʼ Proverbios 4:​18). Biblia la? qué ruchaa diʼ ni ná, laadu nga ruchaʼdu ni runi credu ora guiene chaahuidu xiixa ni rusiidiʼ Biblia.

5. Dxandíʼ peʼ testigu stiʼ Jehová laadu

VIDEU: Biaʼsi peʼ ni biree ladu (2:​56)

• ¿Xiñee biaʼsi nga biree ladu testigu stiʼ Jehová?

¿Xiñee gulí Jehová binni para gaca testigu stiʼ yaʼ? Purtiʼ maʼ guníʼcabe stale cosa ni cadi dxandíʼ de laabe. Nga runi, maʼ gulí Jehová, Dios ni dxandíʼ, caadxi binni para gusiidiʼ ni dxandíʼ de laa. Guidúʼyanu chupa cosa ni cadi dxandíʼ huaníʼcabe de laabe.

Nuu religión rusiidiʼ riuulaʼdxiʼ Dios iquiiñecabe bidóʼ para guni adorárcabe laa. Peru ¿ñee dxandíʼ nga la? Laguundaʼ Levítico 26:1 ne laiquiiñeʼ ca pregunta riʼ para güitu diidxaʼ:

• Casi ná versículo riʼ, ¿xii nga ni dxandíʼ? ¿Ximodo ruuyaʼ Dios iquiiñecabe bidóʼ?

Nuu religión rusiidiʼ laaca Jesús nga Dios. ¿Ñee dxandíʼ nga la? Laguundaʼ Juan 20:​17 ne laiquiiñeʼ ca pregunta riʼ para güitu diidxaʼ:

• Casi ná versículo riʼ, ¿xii nga ni dxandíʼ? ¿Ñee laaca Jesús nga Dios la?

• ¿Ximodo runi sentirluʼ ora gánnaluʼ bisaanané Jehová ca testigu stiʼ dxiiñaʼ de gusiidicaʼ ni dxandíʼ de laa ne de Xiiñiʼ?

6. Nadxiisaadu

Biblia ruchaaga ca xpinni Cristu casi ca parte stiʼ ti cuerpu purtiʼ nuuca tobi si ne nadxiisaacaʼ. Laguundaʼ 1 Corintios 12:​25, 26 ne laiquiiñeʼ ca pregunta riʼ para güitu diidxaʼ:

• ¿Xi naquiiñeʼ guni ca ni dxandíʼ xpinni Cristu ora gúʼyacaʼ cayacaná ca hermanu sticaʼ?

• Pur guiráʼ ni huayuuyaluʼ, ¿ximodo rusihuinni ca testigu stiʼ Jehová guendarannaxhii?

Ora gacaná ca testigu stiʼ Jehová de xiixa guidxi la? nagueendaca ruyubi ca hermanu stícabe ni nuu lu guidubi Guidxilayú modo gacané laacabe. Para gánnatu ximodo gucanécabe caadxi hermanu la? laguuyaʼ VIDEU riʼ. De racá zanda iquiiñetu ca pregunta riʼ para güitu diidxaʼ:

VIDEU: Dxi bininá huracán Matthew Haití (5:​29)

• ¿Ñee rábiluʼ rusihuinni ca testigu stiʼ Jehová guendarannaxhii ora racanecaʼ ca hermanu sticaʼ la? ¿Xiñee riníʼ íqueluʼ zacá yaʼ?

XI BIZÍʼDINU

Dxandíʼ naca ca testigu stiʼ Jehová xpinni Cristu. Nácadu ti familia ni nuu lu guidubi naca Guidxilayú ni runi adorar Dios, ne lu Biblia nga zeeda guiráʼ ni runi credu ne laaca rusíʼdidu ni dxandíʼ de Jehová.

Xi biziidiluʼ

• ¿Xiñee biree ladu testigu stiʼ Jehová?

• ¿Ximodo rusihuínnidu nadxiisaadu?

• ¿Ñee rábiluʼ dxandíʼ naca ca testigu stiʼ Jehová xpinni Cristu la?

BIIYAʼ XIRUʼ ZANDA GUIZIIDILUʼ

Binibiáʼ historia stiʼ ca testigu stiʼ Jehová.

Bisihuinni ca testigu stiʼ Jehová nápacaʼ fe. Primé ndaa: Bireecabe de lu guelacahui (1:​01:​27)

Biiyaʼ xi ti cosa ni cadi jneza rusiidiʼ ca religión ca bisiene ca testigu stiʼ Jehová.

Ti guidxi ni rusisaca lá Dios (7:08)

Biiyaʼ ximodo rusiene sección riʼ ca ni nabé rinabadiidxaʼ binni de ca testigu stiʼ Jehová.

«Cani nabé rinabadiidxaʼ binni de ca testigu stiʼ Jehová» (Sección ni zeeda lu jw.org)

Cumu nabé nagueenda ridxiichi Stephen la? biʼniʼ stale cosa ni cadi jneza. Biiyaʼ xi bicaa laabe guchaabe modo nabánibe ra bíʼyabe modo naca ca testigu stiʼ Jehová.

«Zeʼ dxi jma ziyacaʼ binni malu» (Torre stiʼ ni rapa, 1 de julio de 2015)