LECCIÓN 46
¿Xiñee caquiiñeʼ gudiiluʼ xpídaluʼ Dios ne chuʼnísaluʼ?
Ora rudii ti binni xpida Jehová la? runi ti oración ne runi prometer laabe laasibe nga chiguni adorar ne zuyubi guni ni nabe guidubi xquendanabani (Salmo 40:8). Ne despué, ora chúʼnisabe, zusihuínnibe nezalú binni maʼ bidiibe xpídabe Dios. Gástiruʼ sti decisión jma risaca que gudiʼnu xpídanu Jehová. Ne zanda guchaa decisión risaca riʼ xquendanabáninu. ¿Ximodo zanda guiale de ndaaniʼ ladxidoʼloʼ gudiiluʼ xpídaluʼ Jehová yaʼ?
1. ¿Xi zucaa laanu gudiʼnu xpídanu Jehová?
Guendarannaxhii ca nga ni zucaa laanu gudiʼnu xpídanu Jehová (1 Juan 4:10, 19). Biblia cayabi laanu: «Gunnaxhii Jehová Dios stiluʼ de guidubi ladxidoʼloʼ, guidubi xhiálmaluʼ, guidubi xquendabiaaniluʼ ne guiráʼ stipa stiluʼ» (Marcos 12:30). Rusihuínninu guendarannaxhii ni nápanu Jehová pur ni rininu ne pur ni rúninu. Ora dxandíʼ nadxii chupa binni la? riguixhe íquecaʼ guichaganacaʼ, zacaca nga ora dxandíʼ nadxiinu Jehová, runi decidirnu gudiʼnu xquendanabáninu laabe ne chuʼnísanu.
2. ¿Xi ndaayaʼ rudii Jehová ca xpinni ni maʼ guyuunisa?
Ora chuʼnísaluʼ la? zácaluʼ parte de familia stiʼ Jehová, ti familia guizáʼ nayecheʼ. Ne zuni sentirluʼ pabiáʼ nadxii Dios lii ne ziuuluʼ jma gaxha de laabe (biindaʼ Malaquías 3:16-18). Zaca Jehová Bixhózeluʼ, ne zápaluʼ ti familia ni nuu lu guidubi naca Guidxilayú ni nadxii Dios ne nadxii lii (biindaʼ Marcos 10:29, 30). Peru ante chuʼnísaluʼ la? caquiiñeʼ gúniluʼ caadxi cosa. Napa xidé gunibiáʼ chaahuiluʼ Jehová, gannaxhiiluʼ laabe ne gusihuínniluʼ nápaluʼ fe Xiiñibe. Ne últimu, naquiiñeʼ guni prometerluʼ Jehová lu ti oración zudiiluʼ xpídaluʼ laabe. Pa gúniluʼ ndiʼ ne chuʼnísaluʼ la? zanda guibániluʼ nayecheʼ sin qué chuʼ dxi gátiluʼ. Biblia ná: «Zeeda gaca ni bautismo ni culá laatu yanna» (1 Pedro 3:21).
GUIZÍʼDIRUNU JMA
Guidúʼyanu xiñee risaca gudiiluʼ xpídaluʼ Jehová ne chuʼnísaluʼ.
3. Guiranu naquiiñeʼ cuinu tu guni adorarnu
Ndaaniʼ guidxi Israel ni guyuu dxiqué, stale binni guníʼ ique zanda guni adorar Jehová ne guni adorar Dios falsu, Baal. Peru cadi jneza ngue ni guníʼ íquecabe. Ngue runi biseendaʼ Jehová profeta Elías para uguu jneza laacabe. Laguundaʼ 1 Reyes 18:21 ne laiquiiñeʼ pregunta riʼ para güitu diidxaʼ:
¿Xi decisión gucuaa ca israelita?
Cásica ca israelita que, laanu laaca naquiiñeʼ cuinu tu guni adorarnu. Laguundaʼ Lucas 16:13 ne laiquiiñeʼ ca pregunta riʼ para güitu diidxaʼ:
¿Xiñee cadi jneza guni adorarnu tuuxa o xiixa cosa pa maʼ runi adorarnu Jehová?
¿Xi caquiiñeʼ gúninu para guʼyaʼ Jehová maʼ gulinu guni adorarnu laasi?
4. Guníʼ ique pabiáʼ nadxii Jehová lii
Guizáʼ stale cosa sicarú maʼ bisigaʼdeʼ Jehová laanu. Yanna, ¿xi zanda gusigáʼdenu laabe yaʼ? Laguuyaʼ VIDEU riʼ.
¿Ximodo maʼ bisihuinni Jehová nadxii binni? Laguundaʼ Salmo 104:14, 15 ne 1 Juan 4:9, 10, ne laiquiiñeʼ ca pregunta riʼ para güitu diidxaʼ:
De lade guiráʼ ni maʼ bisigaʼdeʼ Jehová laanu, ¿gunáʼ nga ni jma risaca para lii?
Ora guiníʼ íqueluʼ guiráʼ ni maʼ bisigaʼdeʼ Dios laanu, ¿xi rucaa ni lii guni sentirluʼ pur laabe?
Ora rusigaʼdeʼ ti binni laanu xiixa ni nabé riuuláʼdxinu, racaláʼdxinu gánnabe nabé rusisácanu regalu ni bisigáʼdebe laanu. Laguundaʼ Deuteronomio 16:17 ne laiquiiñeʼ ca pregunta riʼ para güitu diidxaʼ:
Ora riníʼ íqueluʼ guiráʼ ni maʼ bidii Jehová lii, ¿ñee runi sentirluʼ caquiiñeʼ gudiiluʼ laabe xiixa la? ¿Xi nudiiluʼ laabe yaʼ?
5. Zacaanu stale ndaayaʼ pa gudiʼnu xpídanu Dios
Stale binni riníʼ ique pa gaca famoso, guni estudiar ti carrera galán o gapa bueltu nga zabani nayecheʼ. Peru ¿ñee dxandíʼ nga la? Laguuyaʼ VIDEU riʼ ne laiquiiñeʼ ca pregunta riʼ para güitu diidxaʼ:
Neca nabé guyuulaʼdxiʼ hombre bihuinni lu videu riʼ fútbol, ¿xiñee bisaanabe ni?
Bisaana hombre riʼ fútbol ne bidii xpida Jehová. ¿Ñee rábiluʼ jneza decisión ni gucuaabe riʼ la? ¿Xiñee riníʼ íqueluʼ zacá yaʼ?
Ante gaca apóstol Pablo ti xpinni Cristu, biindabe para gácabe ti maestru de ley stiʼ ca judíu. Ne dede bisiidiʼ ti maestru famoso laabe. Peru bisaanabe guiráʼ ni para gácabe xpinni Cristu. ¿Ñee guca arrepentirbe la? Laguundaʼ Filipenses 3:8 ne laiquiiñeʼ ca pregunta riʼ para güitu diidxaʼ:
¿Xiñee bichaaga apóstol Pablo guiráʼ ni biʼniʼ ante gaca xpinni Cristu casi «ti montón guixi»?
¿Xi ndaayaʼ gucuaabe pur guiráʼ ni bisaanabe que?
Pa quixheʼ íqueluʼ gúniluʼ ni ná Jehová, ¿rábiluʼ zabániluʼ jma galán la? ¿Xiñee riníʼ íqueluʼ zacá yaʼ?
Jma risaca guiráʼ ni biʼniʼ ganar Pablo ra guca xpinni Cristu que ni bisaana.
NUU TU NÁ: «Qué zuni ganarluʼ gastiʼ pa gudiiluʼ xpídaluʼ Dios».
¿Ñee rábiluʼ jneza nga gudiiluʼ xpídaluʼ Dios la? ¿Xiñee riníʼ íqueluʼ zacá yaʼ?
XI BIZÍʼDINU
Guendarannaxhii ni nápanu Jehová nga chigucaa laanu gudiʼnu xpídanu laabe ne chuʼnísanu.
Xi biziidiluʼ
¿Xiñee rábiluʼ runi merecer Jehová gannaxhiinu laa de guidubi ladxidoʼno ne guni adorarnu laasi?
¿Xi ndaayaʼ rudii Jehová ca xpinni ni maʼ guyuunisa?
¿Ñuuláʼdxiluʼ nudiiluʼ xpídaluʼ Jehová la?
BIIYAʼ XIRUʼ ZANDA GUIZIIDILUʼ
Biiyaʼ xiñee biʼniʼ decidir ti cantante ne ti deportista gudiicaʼ xpídacaʼ Jehová.
Ni rinabadiidxaʼ ca joven... ¿Xi guneniáʼ xquendanabaneʼ?... Ora guuyadxiéʼ ni bisaanaʼ atrá (6:54)
Biiyaʼ xi razón nápanu para gudiʼnu xpídanu Jehová.
«Xiñee naquiiñeʼ gudiʼnu laanu Jiobá» (Torre stiʼ ni rapa, 15 de enero de 2010)
Biiyaʼ lu videu riʼ pabiáʼ nayecheʼ runi sentir ca ni rudii xpida Jehová.
Biiyaʼ xi gucané gunaa riʼ guchaa xquendanabani lu historia ni láʼ «Stale iza nga gunabadiidxaʼ xi para biseendaʼ Dios laanu Guidxilayú».
«Gucané Biblia laacabe para bichaacabe» (Tema ni zeeda lu Torre stiʼ ni rapa)