LECCIÓN 36

Gusihuínninu nácanu honradu lu guiráʼ ni gúninu

Casi zeeda ni lu libru

Guiráʼ binni nga racalaʼdxiʼ gaca ca xhamigu honradu, zacaca nga ribeza Jehová gaca ti binni ni racalaʼdxiʼ gaca xhamigu laabe. Peru nagana nga gaca binni honradu ndaaniʼ ti guidxilayú ra nabé rusiguii binni. Guidúʼyanu xiñee galán nga gusihuínninu nácanu honradu lu guiráʼ ni gúninu.

1. ¿Xiñee guizáʼ risaca gácanu honradu?

Ora rusihuínninu nácanu honradu, laaca cusihuínninu nadxiinu ne runi respetarnu Jehová. Bietenalaʼdxiʼ nanna Jehová xi riníʼ íquenu ne xi guiráʼ rúninu (Hebreos 4:13). Ruuyabe stipa ni rúninu pur gácanu honradu ne guizáʼ rusisácabe ni. Stiidxabe cayabi laanu: «Nanalaʼdxiʼ Jehová binni riuulaʼdxiʼ guni cosa malu, peru raca xhamígube ca ni runi ni jneza» (Proverbios 3:32).

2. Gusihuínninu nácanu honradu guiráʼ dxi

Para ganda gúninu ni ná Jehová caquiiñeʼ guininu ni dxandíʼ (Zacarías 8:16, 17). ¿Xi riníʼ ca diidxaʼ riʼ yaʼ? Riniʼni qué rusiguiinu ca familia stinu, compañeru de dxiiñaʼ, ca hermanu de congregación nin ca gobiernu. Ti binni ni naca honradu la? qué ribaʼnaʼ ne qué rusiguii (biindaʼ Proverbios 24:28 ne Efesios 4:28). Ne laaca riguixe impuestu (Romanos 13:5-7). Racaláʼdxinu gácanu «honradu lu guiráʼ cosa» ne cadi lu si ca ni bizéʼtenu riʼ (Hebreos 13:18).

3. ¿Xiñee galán gácanu honradu?

Ora nanna binni nácanu honradu la? zápacaʼ confianza laanu. Laaca racanenu para ganda chuʼ ca hermanu de congregación stinu nayecheʼ purtiʼ zanda gápacaʼ confianza laanu, casi ndaaniʼ ti familia. Ne laaca zanda gápanu ti conciencia nayá. Pa gácanu honradu laaca zuuyaʼ «binni pabiáʼ sicarú guiráʼ ni rusiidiʼ Dios ni bilá laanu», ne dede zándaca gucaani laacaʼ gácacaʼ xpinni Jehová (Tito 2:10).

GUIZÍʼDIRUNU JMA

Guidúʼyanu ximodo zanda chuʼnu jma gaxha de Jehová pa gácanu honradu, ne ximodo zanda gusihuínninu nácanu honradu lu guiráʼ ni gúninu.

4. Riuulaʼdxiʼ Jehová gaca binni honradu

Laguundaʼ Salmo 44:21 ne Malaquías 3:16, ne laiquiiñeʼ ca pregunta riʼ para güitu diidxaʼ:

¿Xiñee cadi jneza gucáʼchinu ti cosa ni dxandíʼ? ¿Xiñee riníʼ íqueluʼ zacá yaʼ?
Pa guininu ni dxandíʼ neca gácani nagana para laanu, ¿ximodo rábiluʼ zuni sentir Jehová?

Caniʼné ti dxaapahuiiniʼ bixhoze, zuxibi bixhózebe caniʼné laabe. Bixii ti vasu jugu lu escritorio ca. — Ora riníʼ ti baʼduhuiiniʼ ni dxandíʼ la? rusiecheʼ ladxidóʼ bixhoze. Ora rininu ni dxandíʼ la? rusiéchenu ladxidóʼ Jehová.

5. Cadi gusaana de gácanu honradu

Neca stale binni riníʼ ique cadi galán nga gaca tuuxa honradu lu guiráʼ ni guni, nuu stale razón ni rusihuinni galán nga gácanu honradu. Guidúʼyanu gunáʼ nga ca razón riʼ. Laguuyaʼ VIDEU riʼ.

VIDEU: ¿Xi zanda gacané laanu chuʼnu nayecheʼ? Gápanu ti conciencia nayá (2:32)

Ti imagen stiʼ videu “¿Xi zanda gacané laanu chuʼnu nayecheʼ? Gápanu ti conciencia nayá”. Cudiináʼ Ben jefe stiʼ. Cayábibe jefe stibe zuniti empresa ra rúnicabe dxiiñaʼ stale bueltu pur ni bíʼnibe.

Laguundaʼ Hebreos 13:18 ne laguiníʼ ximodo zanda gácatu honradu...

... ndaaniʼ familia.
... ra dxiiñaʼ o ra scuela.
... lu xcaadxi cosa.

6. Ziuʼnu galán pa gácanu honradu

Neca guidxaagalunu guendanagana purtiʼ nácanu honradu peru ra tidiʼ tiempu zudiʼnu cuenta jma galán nga gácanu honradu. Laguundaʼ 1 Pedro 3:10-12 ne laiquiiñeʼ pregunta riʼ para güitu diidxaʼ:

¿Xiñee jma galán zabáninu pa gácanu honradu?

A. Cayuíʼ ti guendaxheelaʼ diidxaʼ laga cayeʼcaʼ café.

B. Cayuni felicitar jefe stiʼ ti taller ti trabajador stiʼ.

Ora naca ti binni honradu, jma rapa xheelaʼ confianza laa.
Ora naca ti binni honradu ra dxiiñaʼ, rapa jefe stiʼ confianza laa.
Ora naca ti binni honradu, dede né ca ni napa xiixa autoridad riníʼ bien de laa.

NUU TU NÁ: «Gastiʼ naca gusiguii tuuxa pa cadi cá ique guniná binni».