LECCIÓN 37
Xi ruzeeteʼ Biblia de dxiiñaʼ ne de bueltu
¿Ñee huayuuluʼ xizaa pur dxiiñaʼ ne bueltu la? Nuu biaje raca nagana para laanu gúninu dxiiñaʼ para gápanu ni guibaninenu ne zaqueca gúninu xhiiñaʼ Jehová. Peru lu lección riʼ, zadúʼyanu caadxi conseju zeeda lu Biblia ni zanda gacané laanu.
1. ¿Xi ruzeeteʼ Biblia de dxiiñaʼ?
Racalaʼdxiʼ Dios guiéchenu pur ca dxiiñaʼ rúninu. Biblia ná: «Gástiruʼ sti cosa jma galán para binni que [...] chuʼ nayecheʼ pur dxiiñaʼ nadipaʼ ni runi» (Eclesiastés 2:24). Cumu naca Jehová ti Dios ni nabé runi dxiiñaʼ la? ora rinándanu ejemplu stibe ne rúninu dxiiñaʼ nadipaʼ, riuʼnu nayecheʼ purtiʼ nánnanu cayúninu ti cosa ni riuuláʼdxibe.
Risaca nga gúninu dxiiñaʼ, peru cadi gudiʼnu lugar gucueezani laanu para guni adorarnu Jehová (Juan 6:27). Pa gúninu ni ná Jehová primeru lu xquendanabáninu, zudiibe laanu ni caquiiñenu para guibaninenu.
2. ¿Pabiáʼ risaca para laanu gápanu bueltu?
Neca ruzeeteʼ Biblia «rapa bueltu binni», laaca ruzeeteʼ ni qué zanda diʼ gudii bueltu laanu guendanayecheʼ (Eclesiastés 7:12). Nga runi, Biblia ná cadi galán diʼ nga gannaxhiinu bueltu, ne laaca rudiini laanu conseju riʼ: «Lachuu nayecheʼ né ca cosa si ni nápatu» (biindaʼ Hebreos 13:5). Ora riuʼnu conforme né ni nápasinu la? qué ricá íquenu gápanu jma ne laaca qué ruzáʼbinu (Proverbios 22:7). Ne qué rúninu xiixa para gápanu stale bueltu ti dxi sti dxi si, casi quítenu xiixa juegu o gúninu apuesta.
3. ¿Ximodo zanda iquiiñenu xpuéltunu para gacanenu xcaadxi?
Naca Jehová ti Dios ni riuulaʼdxiʼ gudii ni napa, ne pa chinándanu ejemplu stibe la? qué zácanu «naguibiʼ» né ziuʼnu «listu» para gacanenu xcaadxi (1 Timoteo 6:18). Ti modo zanda iquiiñenu xpuéltunu nga ra gacanenu né ca gastu ni raca ndaaniʼ congregación, ne gacanenu ca ni caquiiñeʼ tu gacané laacaʼ, peru jmaruʼ si ca hermanu stinu. Cadi guiaandaʼ laanu ni jma risaca para Jehová nga xiñee cudiʼnu, ne cadi pabiáʼ cudiʼnu. Pa gudiʼnu de guidubi ladxidoʼno, ziuunu nayecheʼ ne laaca zusiéchenu Jehová (biindaʼ Hechos 20:35).
GUIZÍʼDIRUNU JMA
Guidúʼyanu xiñee jma galán cadi guni xhaatanu dxiiñaʼ ne chuʼnu conforme né ni nápasinu.
4. Zusisácanu Jehová ra gúninu xhiiñanu jneza
Pur modo gúninu xhiiñanu, zahuinni pa dxandíʼ xhamígunu Jehová. Laguuyaʼ VIDEU riʼ ne laiquiiñeʼ ca pregunta riʼ para güitu diidxaʼ:
¿Xi jma guyuuláʼdxiluʼ de modo naca Jason ne modo runi xhiiñaʼ?
¿Xi bíʼnibe ti cadi gucueeza xhiiñabe laabe para gúnibe ni ná Jehová?
Laguundaʼ Colosenses 3:23, 24 ne laiquiiñeʼ pregunta riʼ para güitu diidxaʼ:
¿Xiñee risaca gúninu dxiiñaʼ de guidubi xhiálmanu?
Risaca nga gúninu dxiiñaʼ, peru cadi gudiʼnu lugar gucueezani laanu para guni adorarnu Jehová.
5. Xiñee jma galán chuʼnu conforme né ni nápasinu
Stale binni riguixhe ique gapa stale bueltu, peru maʼ gadxé conseju rudii Biblia laanu. Laguundaʼ 1 Timoteo 6:6-8 ne laiquiiñeʼ pregunta riʼ para güitu diidxaʼ:
¿Xi conseju cudii Biblia laanu?
Zanda guibáninu nayecheʼ né ni nápasinu. Laguuyaʼ VIDEU riʼ ne laiquiiñeʼ pregunta riʼ para güitu diidxaʼ:
¿Xiñee nayecheʼ nabani ca familia riʼ neca huaxiéʼ bueltu nápacaʼ?
¿Peru pa nápanu stale bueltu ne racaláʼdxinu gápanu jma yaʼ? Biquiiñeʼ Jesús ti ejemplu para bisiidiʼ xi rizaaca binni ni riníʼ ique zacá. Laguundaʼ Lucas 12:15-21 ne laiquiiñeʼ pregunta riʼ para güitu diidxaʼ:
¿Xi zanda guiziidiluʼ de ejemplu bizeeteʼ Jesús riʼ yaʼ? (Laguuyaʼ versículo 15).
Laguundaʼ Proverbios 10:22 ne laguchaaga ni né 1 Timoteo 6:10. Despué laiquiiñeʼ ca pregunta riʼ para güitu diidxaʼ:
¿Gunáʼ ni rábiluʼ jma risaca: gaca xhamígunu Jehová la? o gápanu stale bueltu? ¿Xiñee riníʼ íqueluʼ zacá yaʼ?
¿Xi rizaaca stale binni ora ricá ique gapa stale bueltu?
6. Zudii Jehová ni caquiiñenu
Ora nápanu guendanagana ra dxiiñaʼ ne ora huaxiéʼ bueltu nápanu, rusihuínninu pabiáʼ fe nápanu Jehová. Laguuyaʼ VIDEU riʼ para gánnatu ximodo zanda gudxiilutu ca guendanagana riʼ ne gusihuínnitu nápatu fe, despué laiquiiñeʼ ca pregunta riʼ para güitu diidxaʼ:
¿Xi guendanagana bidxaagalú hermanu ni bihuinni lu videu riʼ?
¿Ximodo bidxiilube guendanagana riʼ yaʼ?
Laguundaʼ Mateo 6:25-34 ne laiquiiñeʼ pregunta riʼ para güitu diidxaʼ:
¿Xi cayuni prometer Jehová guiráʼ ca ni guni ni nabe primeru lu xquendanabani?
NUU TU NÁ: «Napaʼ xidé guneʼ dxiiñaʼ para gudieeʼ ni caquiiñeʼ familia stinneʼ. Qué zanda diʼ chaaʼ reunión guiráʼ semana».
¿Xi textu zeeda lu Biblia racané lii guni creluʼ jma galán zabániluʼ pa gúniluʼ ni ná Jehová primeru lu xquendanabániluʼ?
XI BIZÍʼDINU
Neca risaca gúninu dxiiñaʼ ne gápanu bueltu para gudiʼnu ni caquiiñeʼ familia stinu, peru cadi naquiiñeʼ gudiʼnu lugar gucueeza ca ni laanu para gúninu ni ná Jehová.
Xi biziidiluʼ
¿Xi zanda gacané lii ti cadi gudiiluʼ lugar gucueeza xhiiñaluʼ lii para gúniluʼ ni ná Jehová?
¿Xiñee galán chuʼluʼ conforme né ni nápasiouʼ?
Pa cayuni prometer Jehová zudii ni caquiiñeʼ ca xpinni, ¿ximodo zanda gusihuínniluʼ runi creluʼ zacanebe lii yaʼ?
BIIYAʼ XIRUʼ ZANDA GUIZIIDILUʼ
Biiyaʼ pa rusiidiʼ Biblia malu nga gapa binni bueltu.
«¿Ñee bueltu nga xcu guiráʼ cosa malu la?» (Tema ni zeeda lu jw.org)
Biiyaʼ xii nga ni jma rusisaca Jehová ora rudiʼnu xiixa.
«¿Xi rusiidiʼ Biblia de ora rudii binni de ni napa?» (Tema ni zeeda lu jw.org)
¿Ñee malu nga quiteʼ binni para guni ganar bueltu la?
«Xi riníʼ Biblia de quiteʼ binni para guni ganar stale bueltu» (¡Gutaná! marzo de 2015)
¿Xi bicaa ti hombre riguite apuesta ne ribaʼnaʼ guchaa xquendanabani?
«Nabé guyuuladxeʼ carrera de caballu» (Tema ni zeeda lu Torre stiʼ ni rapa)