Rietenalaʼdxuʼ la?
Ñee biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:
• Xi rizíʼdinu de ni biʼniʼ Jesús ora bilabe Pedru para cadi ñati guiiguʼ ndaaniʼ nisadóʼ (Mat. 14:28-31).
Pa tuuxa xpinni Cristu maʼ cadi naguídxipeʼ nuu fe stiʼ la? galán gacanenu laa iguidxi fe stiʼ (15/9, yaza 8).
• Xi guendananá biʼniʼ huantar Jiobá para gunda bilá laanu.
Nánnanu biuubaʼ ladxidoʼbe ora biiyabe modo cayuninácabe Xiiñibe ne modo biʼniʼ búrlacabe laa. Ne cásica guná Abrahán guti xiiñiʼ la? Jiobá bidii lugar guuticabe Xiiñiʼ casi ti binni malu (15/9, yaza 28 ne 29).
• Ximodo zanda guiénenu ni cá lu Biblia.
Caquiiñeʼ guinábanu Dios gacané laanu. Ora guidúʼndanu Biblia galán guiníʼ íquenu xi guiráʼ cosa sicarú chigusiidiʼ Dios laanu. Gudiʼnu lugar gacané ti binni ni jma nanna laanu (1/10, yaza 4-8).
• Xiñee caquiiñeʼ gudiʼnu lugar guiniʼné Dios laanu guiráʼ dxi.
Ora guidúʼndanu Biblia zeeda gácani casi ora nidúʼyanu laanu lu ti espeju (Sant. 1:23-25). Ca diidxaʼ ni zeeda de Dios riʼ racanécani laanu guidúʼyanu ximódopeʼ laanu. Cada biaje guidúʼndanu Biblia zadxélanu xiixa nacubi ni zacané laanu. Ñee nannuʼ xiñee la? «Purtiʼ ma cadiʼdi guidxilayú caduʼya nu riʼ», ne cuchaa modo nabáninu (1 Cor. 7:31) (1/10, yaza 13 ne 14).
• Xiñee riuu guendanagana lu ca guendaxheelaʼ ca ora qué riquiiñecaʼ xpuéltucaʼ jneza ne xi zanda gacané laacabe.
Riuu guendanagana lu ca guendaxheelaʼ ca ora qué runi crecaʼ pa zanda iquiiñeʼ xheelacaʼ bueltu sticaʼ jneza ne ora gadxé gadxé modo biniisicaʼ. Tapa cosa ni zanda gacané laacabe nga: cadi tinde diidxacabe ora guiníʼcabe de bueltu, naquiiñeʼ gánnacabe stiʼ xfamíliacabe bueltu ni runi ganárcabe, naquiiñeʼ gucaacabe ni cá íquecabe gúnicabe ne quíxhecabe tu guni cada cosa (1/10, yaza 28-30).
• Xi rusiidiʼ ca diidxaʼ ni zeeda lu Proverbios 24:27 laanu ra na gucuí binni lidxi.
Ante guiníʼ ique ti hombre guichaganáʼ naquiiñeʼ guʼyaʼ pa maʼ zanda gudii ni iquiiñeʼ binnilidxi ne gacané laacabe chúʼcabe gaxha de Dios (15/10, yaza 12).
• Xiñee zabeendú xiiñiʼ binni ni galán ora qué gusaana ca familia ca de guni adorarnecaʼ binnilídxicaʼ Dios.
Zacá zusisácacabe guiráʼ ni huayuni Jiobá ne zacaneni laacabe chúʼcabe naguidxi ne gaxha de Dios (15/10, yaza 30 ne 31).
• Ñee naquiiñeʼ guchii ca gunaa xpinni Cristu íquecaʼ pa chigutiixhicaʼ xiixa libana ra ridagulisaanu o lu ca guendaridagulisaa naroʼbaʼ ca la?
Ora gutiixhi ti gunaa xpinni Cristu ti libana lu sti diidxaʼ, cani cucaadiaga ca jma nga ruuyadxícabe ni cudii libana ca, peru zaqueca rucaadiágacabe ni cutiixhi libana ca. Ca gunaa ni rutiixhi xiixa diidxaʼ ni riníʼ binni, stale biaje cadi laadicabe ruuyadxí cani cucaadiaga. Nga runi, cadi naquiiñeʼ guchiicabe íquecabe ora chigutiixhicabe xiixa diidxaʼ ni riníʼ binni (15/11, yaza 12).
• Xiñee zanda guininu naca Jiobá ne Jesús ti ejemplu pur modo biʼniʼ respetarcaʼ binni.
Neca naca Jiobá ti Dios ni nabé risaca nadxiibe binni ne runi respetarbe laacaʼ. Casi ora gudxi Jiobá Abrahán ne Moisés gúnicaʼ xiixa la? biquiiñebe ti diidxaʼ hebreu ni riníʼ «rinabaʼ lii» (Gén. 13:14; Éxo. 4:6). Ne laaca rucaadiágabe laanu (Gén. 18:23-32). Jesús laaca biiyaʼ xi caquiiñeʼ binni ne gucanebe laacaʼ ne stale guendanayecheʼ. Ne stale biaje guniʼbe lacaʼ ora guníʼnebe laacaʼ (15/11, yaza 25).