Ni rinabadiidxaʼ cani ruundaʼ
Ñee zanda gánnanu pórapeʼ bicaacabe Jesús lu yaga la?
Stale binni rinabadiidxaʼ ni guninu ca, purtiʼ gadxé gadxé hora ruzeeteʼ Marcos ne Juan biiticabe Jesús. Marcos na: «Siadóʼ biaʼ las nueve bicaa cabe laabe lu [yaga] (Mar. 15:25). Peru Juan na «biaʼ galaa dxi» nga ora bisaana Pilatu Jesús lu náʼ ca judíu para gucaacaʼ laabe lu yaga (Juan 19:14-16). Nécapeʼ huayacalaʼdxiʼ ca binni ni nabé ruundaʼ de Biblia gusiénecaʼ xiñee gadxé gadxé ni guníʼ cani bicaa relatu ca, Biblia qué ruzeeteʼ diʼ stale cosa ni zanda gacané laanu. Neca zacá, nuu xiixa ni zacané laanu guiénenu xiñee gadxé gadxé ni zeeda lu ca relatu ca: modo rugabaʼ binni tiempu dxi bibani Jesús.
Lu primé siglu que, ca judíu que riniʼcaʼ 12 hora nga napa ti dxi, ne ruzuluni dede ora riree Gubidxa (Juan 11:9). Peru naquiiñeʼ gánnanu ti cosa: cadi tobi si hora nga riree Gubidxa guidubi ti iza, ne laaca cadi biáʼqueca nga tiempu ruzaaniʼ Gubidxa guidubi ti dxi. Ne ora ruzeeteʼ Biblia de tiempu la? caniʼni de paraa cayuuyacabe cá Gubidxa, nga runi, cadi biáʼsipeʼ hora nga ni riníʼcabe. Stiidxaʼ Dios ni gucuá lu diidxaʼ griegu nabé ruzeeteʼ de cani bizaaca «biaʼ las nueve» siadóʼ, «biaʼ galaa dxi» ne «biaʼ las tres» huadxí (Mat. 20:3, 5; Hech. 10:3, 9, 30). Peru ora caquiiñepeʼ guzeeteʼ ca binni ni bicaa Biblia pórapeʼ guca xiixa cosa la? rúnicabe ni, casi ora bizeetecabe ra na «la una» (Juan 4:52).
Ora ruzeeteʼ ca evangelista de ni bizaaca dxi guti Jesús, guirácabe riníʼcabe tobi si hora guca xcaadxi cosa. Guidápacabe riníʼcabe maʼ birá gueelaʼ ora bidagulisaa ca sacerdote ne ca binnigola ne laaca óraca bidiicabe Jesús Poncio Pilatu, gobernador stiʼ Roma (Mat. 27:1; Mar. 15:1; Luc. 22:66; Juan 18:28). Ne nuu sti cosa: Mateo, Marcos ne Lucas guniʼcaʼ cá Jesús lu yaga biaʼ galaa dxi ora biaba ti gueelacahui ndaaniʼ guidxi que, ne zaqué guyuuni dede ora gunda biaʼ las tres (Mat. 27:45, 46; Mar. 15:33, 34; Luc. 23:44).
Ne laaca naquiiñeʼ gánnanu sti cosa: dede ora caguíñecabe Jesús que la? para ca binni ni nabani tiempu stibe que maʼ cayuuticabe laabe ngue. Nuu tiru nabé naná modo riguíñecabe tuuxa dede rati oraqueca. Casi Jesús la? nabé naná modo gudíñecabe laabe, purtiʼ ora gucaláʼdxibe ñuaʼbe yaga que, maʼ qué ñanda ñúnibe ni, ngue runi gupa xidé bidiicabe ni ti hombre para guá ni (Luc. 23:26; Juan 19:17). Dede ora gudíñecabe Jesús ne ora bicaacabe laabe lu yaga que, gudiʼdiʼ ti tiempu para gúcani. Yanna huaxa maʼ riénenu xiñee gadxé gadxé hora nga bicaa ca evangelista que. Cada tobi de laacabe bicaa pora nga bizulú cayuuticabe Jesús para laa.
Apóstol Juan bicaa relatu stiʼ gudiʼdiʼ si stale iza de bicaa xcaadxi que sticaʼ, nga runi biindabe ni bicaa ca hombre que. Dxandíʼ, gadxé hora guníʼ Juan guti Jesús ne gadxé hora guníʼ Marcos, nga rusihuinni qué ñuni copiársibe ni bicaa Marcos. Dios nga guníʼ xi guicá lu guiropaʼ Evangeliu ca. Ne neca cadi zeeda stale cosa lu Biblia ni zanda gacané laanu para guiénenu xiñee gadxé gadxé hora bicaacabe guti Jesús la? zanda guni crenu ni nani de guidubi ladxidoʼno.