Xiñee biʼniʼ mandar Dios ca israelita que guichaganacaʼ laca cani runi adorar laa

▪ Lu Ley ni bidii Dios guidxi Israel que zeeda mandamientu riʼ: «Cadi gucheelaluʼ ca xiiñiluʼ ne ca xiiñicabe. Cadi gudiiluʼ xiiñidxaapaluʼ para xiiñibe, ne cadi guicaaluʼ ti xiiñidxaapabe para xiiñiluʼ» (Deuteronomio 7:3, 4). Xiñee bidii Dios mandamientu ca.

Primé razón nga purtiʼ Jiobá nanna racalaʼdxiʼ Binidxabaʼ gucaa guidubi guidxi que guni adorar xcaadxi dios ni cadi dxandíʼ. Ngue runi, Jiobá gudxi laacabe pa guichaganáʼ ca israelita ni cadi xpinni Dios zucaacaʼ laacabe gudxii déchecabe Jiobá ne maʼ zuni adorárcabe xcaadxi Dios. Stale nga ni zuníticabe pa guni adorárcabe ca dios ca. Ne pa gucheenécabe Dios la? maʼ qué zaguu ndaayaʼ laacabe ne maʼ qué zulá laacabe lu náʼ ca xhenemígucabe. Purtiʼ pa gúnicabe zacá la? maʼ qué zanda gueeda Mesías que lade ca israelita. Ngue runi, biyubi Binidxabaʼ nucaa ca israelita que nichaganacaʼ ca binni ni qué runi adorar Jiobá.

Ne sti razón nga rizaalaʼdxiʼ Jiobá cada tobi de ca israelita que. Laabe nánnabe zabani cada tobi de laacaʼ nayecheʼ pa chuʼcaʼ gaxha de laabe. Xiñee guyuu Jiobá xizaa cueechú ca binni, ni qué runi adorar laabe que, ca israelita pa guichaganacaʼ laacabe yaʼ. Guníʼ ique ni bizaaca rey Salomón, laabe nánnabe xi guníʼ Jiobá zazaaca pa guichaganácabe ca gunaa ni qué runi adorar laa. Sicaríʼ guniʼbe: «Zucaacabe ladxidoʼto chinándatu ca dios stícabe». Zándaca guníʼ íquebe purtiʼ nabé nuu xpiaanibe qué zazaacabe ni guníʼ Dios que, ngue runi qué ñúnibe ni na. Xi bizaacabe yaʼ. «Chaahuidugá bicuudxi ca xheelabe ladxidoʼbe [...] para guni adorarbe xcaadxi dios.» ¡Aque triste ni bizaacabe ca xa! Maʼ qué nuguu Jiobá ndaayaʼ laabe ne pur qué nuzuubabe diidxaʼ, gulaa guidxi que purtiʼ maʼ chupa rey biʼniʼ mandar ndaaniʼ ni (1 Reyes 11:2-4, 9-13).

Zándaca tuuxa guiníʼ cadi guiráʼ diʼ binni zazaaca cásica bizaaca Salomón ca. Casi Mahlón bichaganáʼ Rut, ti gunaa de Moab ni nabé rieeteʼ de laa pur biʼniʼ ni na Dios. Peru nánnacabe zanda gueeda gápacabe guendanagana pa guichaganácabe ca gunaa de raqué. Ne Biblia qué ruzeeteʼ diʼ jneza ni biʼniʼ Mahlón. Laabe gútibe dxi nahuiinigárube, zándaca ante guiníʼ ique Rut guni adorar Jiobá. Ne bíʼchibe Kilión, bichaganáʼ Orpá, ti gunaa de Moab ni qué nusaana de ñuni adorar «ca dios stiʼ». Peru Boaz la? bichaganabe Rut despué de maʼ runi adorar Dios. Ne despué biiyaʼ ca judíu que laabe casi «ti gunaa ni biʼniʼ adorar Dios jneza». Ra bichaganáʼ Rut ne Boaz gucuaacaʼ stale ndaayaʼ (Rut 1:4, 5, 15-17; 4:13-17).

Yanna, ñee jneza nga guiníʼ íquenu cadi biaʼsi nga conseju ni bidii Jiobá ora guníʼ cadi jneza guichaganáʼ ca xpinni cani qué runi adorar laa purtiʼ si bichaganáʼ Mahlón Rut la? Coʼ, cadi jneza diʼ ni. Purtiʼ pa guiníʼ íquenu zacá zeeda gácani casi ñaca nininu gastiʼ naca quiteʼ binni lotería para gapa bueltu, purtiʼ si huayuu tu huayuni ganar. Cadi dxandíʼ qué zaníʼ íquenu zacá la?

Biblia cayabi ca xpinni Cristu de yanna guichaganacaʼ cani naca si «xpinni Señor». Ne laaca caguixhenani ca xpinni Cristu né ca diidxaʼ riʼ: «Cadi gaca né tu cani qué runi cre tobi si». Ca diidxaʼ riʼ gucuá cani para ca xpinni Cristu ni maʼ racalaʼdxiʼ guichaganáʼ. Peru cani maca bichaganáʼ tuuxa ni qué runi adorar Jiobá la? Biblia cudii conseju laacabe ximodo cadi gaca xquendaxheelacabe nagánapeʼ (1 Corintios 7:12-16,39; 2 Corintios 6:14). Guiráʼ ca conseju ca rusihuínnicani pabiáʼ rizaalaʼdxiʼ Jiobá, Dios ni gudixhestí guendaxheelaʼ, guibani ca xpinni nayecheʼ, cásica cani maʼ bichaganáʼ ne zaqueca cani caʼruʼ guichaganáʼ.