CANI RINABADIIDXAʼ BINNI DE BIBLIA

Ximodo zanda guibani ti guendaxheelaʼ nayecheʼ

Nabé racané ca conseju stiʼ Biblia binni para guibaniné xheelaʼ nayecheʼ, purtiʼ ni cudii ca conseju ca nga Jiobá, Dios ni gudixhestí guendaxheelaʼ. Racané ca conseju ca laanu gánnanu paraa zanda guchaʼnu modo laanu ti guibáninu nayecheʼ ne xi cadi naquiiñeʼ gúninu ti cadi guilaa xquendaxheelanu. Laaca cusiidicani laanu ximodo nga jma jneza güínenu xheelanu diidxaʼ. (Biindaʼ Colosenses 3:8-10, 12-14.)

Naquiiñeʼ guni respetarsaa cani maʼ bichaganáʼ. Ora guni cada tobi de laacabe dxiiñaʼ ni bidii Dios laacabe lu xquendaxheelacabe la? zanda guibánicabe nayecheʼ. (Biindaʼ Colosenses 3:18, 19.)

Xi zacané binni ti cadi guilaa xquendaxheelaʼ

Qué zalaa xquendaxheelaʼ binni pa nadxiisaacaʼ. Dios rusiidiʼ laanu ximodo naquiiñeʼ gannaxhiinu. Laabe ne Xiiñibe jma bizaaláʼdxicabe sti binni que laca laacabe, zacá nga racaláʼdxicabe gannaxhiisaa binni. (Biindaʼ 1 Juan 4:7, 8, 19.)

Pa hombre ne gunaa gúʼyacaʼ xquendaxheelacaʼ casi xiixa ni bisigaʼdeʼ Dios laacaʼ la? ziuucaʼ tobi si. Dios gudixhestí guichaganáʼ ti hombre ne ti gunaa para cadi chuʼ dxi guixélecabe ti zacá gápacabe binnilídxicabe. Ne zanda guindaa xquendaxheelacabe purtiʼ bizáʼ Dios hombre ne gunaa para gacanésaacabe lu guiráʼ ni iquiiñecabe. Laaca bizaʼbe laacaʼ casi laabe ti ganda gusihuínnicaʼ nadxiicaʼ stobi. (Biindaʼ Génesis 1:27 ne 2:18, 24.)