«Ma bidxela du Mesías»

Biaʼ gadxe gayuaa iza despué de gucuá ca diidxaʼ ni caníʼ de Mesías, ni zeeda lu libru stiʼ Miqueas, guca ni nácani: Gule Jesús ndaaniʼ guidxi Belén. Ne biaʼ treinta iza despué, lu iza 29 despué de ca dxi stiʼ Jesús, guca cani cayeeteʼ primé lade ca diidxaʼ bicaa Daniel ni caníʼ dxi gueeda Mesías que. Guyuunisa Jesús ne gulí Dios laabe né espíritu santu. Nga runi, biáʼsipeʼ dxi bedandá «ni za de gunaa» que, Mesías ni cabézacabe gueeda que.

Nagueendaca bizulú Jesús «canayuíʼ né binni modo runi mandar Dios» (Lucas 8:1). Ne casi maca bieeteʼ que, gúcabe nachaʼhuiʼ né binni ne dxandipeʼ bizaaláʼdxibe laacaʼ. Laabe bisihuínnibe nadxiibe binni ora bisiidibe laacaʼ ni zanda gacané laacaʼ lu xquendanabánicaʼ, «bisianda be irá [binni] huará», ne ni bíʼnibe ca bisihuinni cayacané Dios laabe (Mateo 4:23). Ca binni ni yenanda laabe, cani huaniisi ne zaqueca cani nahuiiniʼ, guniʼcaʼ casi guníʼ tobi de ca discípulo stibe: «Ma bidxela du Mesías» (Juan 1:41).

Jesús guníʼ ora mayaca guni mandar lu Guidxilayú riʼ, ziuu guerra, zaca xu roʼ ne ziuuruʼ stale guendanagana. Nga runi, bidiibe conseju riʼ: «Cayabe irá binni: chuʼ listu» (Marcos 13:37).

Jesús qué ñalené donda ne nabé bizuubaʼ stiidxaʼ Dios, peru guyuu binni ni gucananalaʼdxiʼ laabe dede biiticaʼ laabe. Guendaguti stibe que zeeda gaca ni ti ofrenda ni caquiiñepeʼ para ganda gápanu ni biniti Adán ne Eva que: Ti guendanabani ni qué zaluxe ndaaniʼ ti paraísu.

Laaca guca ni guníʼ ca profeta que ra gutiʼ Jesús ne ra gundisaʼ Dios laabe casi espíritu ni napa poder de lade gueʼtuʼ chonna gubidxa despué de gútibe. Ne despué biiyaʼ jma de gaayuʼ gayuaa discípulo stibe laabe. Ne ante chebe guibáʼ, gúdxibe ca discípulo stibe chigusiidicaʼ «irá xixé binni» de laabe ne de Reinu stibe (Mateo 28:19). Ñee bíʼnicabe dxiiñaʼ ni bisaanané Jesús laacabe que la?

(Biree ni lu Mateo, Marcos, Lucas, Juan ne 1 Corintios.)