CANI RINABADIIDXAʼ BINNI DE BIBLIA
Ñee ziuu dxi guiasa ca gueʼtuʼ ca la?
Casi ñaca nisiaasiʼ ca gueʼtuʼ ca purtiʼ qué liica gánnacabe gastiʼ ne qué zanda gúnicabe gastiʼ. Peru Dios ni rudii guendanabani zanda gusibani laacabe. Ne para gusihuínnibe zanda gúnibe ni la? bidiibe Jesús poder para guindisaʼ chupa chonna binni de lade gueʼtuʼ. (Biindaʼ Eclesiastés 9:5 ne Juan 11:11, 43, 44.)
Ximodo nga nisiaasiʼ ca gueʼtuʼ ca yaʼ
Dios maʼ bidii stiidxaʼ ora guedandá dxi naguíxhebe guindísabe ca gueʼtuʼ ca, zandísabe cani nápabe lu xquendabiaanibe para guibánicaʼ ndaaniʼ ti guidxilayú cubi ra chigaca ni jneza. Dios ni jma nandxóʼ nabé maʼ napa gana iquiiñeʼ poder stiʼ para guindisaʼ cani maʼ guti de lade gueʼtuʼ. (Biindaʼ Job 14:14, 15.)
Ximodo chiguiasa ca gueʼtuʼ ca yaʼ
Cani guiasa de lade gueʼtuʼ ca zánnacaʼ tu laacaʼ ne zunibiaʼcaʼ familia sticaʼ ne ca xhamígucaʼ. Neca maʼ gudó yú xcuérpucabe, zudii Dios laacabe ti cuerpu nacubi, peru zácacabe cásica gúcacabe dxiqué. (Biindaʼ 1 Corintios 15:35, 38.)
Ti grupuhuiiniʼ de binni ziásacaʼ de lade gueʼtuʼ para checaʼ guibáʼ (Apocalipsis 20:6). Peru jma stale de ca gueʼtuʼ ca ziásacaʼ para guibánicaʼ ndaaniʼ ti paraísu lu Guidxilayú riʼ. Ne racá zabánicabe ne maʼ qué ziuu dxi gáticabe. (Biindaʼ Salmo 37:29 ne Hechos 24:15.)