«Bíʼnicabe ni né stale gana ne guendarannaxhii, casi qué huayuu dxi gaca ni»

TI VIERNES siadóʼ lu beeu septiembre iza 1922, biaʼ xhono mil binni nuucaʼ ndaaniʼ ti auditorio, ne zeʼ hora jma nandáʼ ziyaca ndaaniʼ ni. Presidente stiʼ asamblea que guníʼ pa tu napa gana guiree la? zanda guni ni, peru maʼ qué zanda diʼ guiuu sti biaje.

Bizulú programa que né ca diidxaʼ riuundaʼ stiʼ ti ndaa de asamblea que ni láʼ «Servicio de alabanzas». Óraque gudxiʼbaʼ Joseph Rutherford lu plataforma que. Jma stale de cani nuu raqué zúbacaʼ lugar sticaʼ, cabézasicaʼ xi guizaaca. Gunábabe caadxi de cani canazá cheríʼ chericaʼ ndaaniʼ auditorio que pur cayaca nandaʼcaʼ pa zanda cuicaʼ ne gucaadiágacaʼ. Ora bizulú discursu que, ¿ñee bidiicabe cuenta ñeʼchuʼ ti lari ngola luguiáʼ de plataforma que la?

Bitiidiʼ Rutherford discursu ni láʼ «Mayaca gueeda Reinu ni nuu guibáʼ». Guidubi ti hora arondaʼ binadiágacabe ridxi nadipaʼ stibe ndaaniʼ auditorio que laga cusiénebe guca ca profeta de dxiqué nadxibalú ora guniʼcaʼ zeeda Reinu. Maʼ para guiluxe discursu que gunabadiidxabe: «¿Ñee rábitu maʼ bizulú Rey risaca riʼ cayuni mandar la?». Guiráʼ cani nuu raqué bicabi né ridxi nadipaʼ maʼ.

Para nabe: «Pa zacá ni, ¡guiranu ca xiiñiʼ Dios ni jma nandxóʼ, chuunu ra nuu binni!». Óraque guniʼbe: «¡Laguuyaʼ, Rey ca maʼ cayuni mandar! Laatu nga cani chigucheeche stiidxabe nga runi, laguiníʼ, laguiníʼ, laguiníʼ de Rey ne Reinu stiʼ».

Óraque, chaahuiʼ chaahuiʼ bizulú bibiá lari nanda lu plataforma que ne bihuinni ca diidxaʼ riʼ «Laguiníʼ de Rey ne Reinu stiʼ».

Ray Bopp rietenalaʼdxiʼ: «Guizáʼ de biéchedu». Anna Gardner guníʼ «Dede gucaditi ca muríu stiʼ yoo que tantu reciu gudapanadu». Fred Twarosh guníʼ: «Tobi si hora bizuhuaʼdu guiradu». Ne Evangelos Scouffas rietenalaʼdxiʼ sicaríʼ: «Casi ñaca biuu ti stipa nadipaʼ ne gundisaʼ laadu de lu ca asientu que, ne dede daʼ nisa ludu bizuhuaʼdu».

Stale de cani nuu raqué maʼ runi predicarcaʼ ca diidxaʼ nacubi ne galán stiʼ Reinu que, peru yanna gucuaacabe stipa para cadi gusaana de gúnicabe ni. Ethel Bennecoff guníʼ ximodo biʼniʼ predicar ca Binni Ruundaʼ Biblia, laabe guniʼbe: «Bíʼnicabe ni né stale gana ne guendarannaxhii, casi qué huayuu dxi gaca ni». Odessa Tuck, ni napa 18 iza dxiqué, gudixhe ique guicabi ni canabadiidxaʼ «tu cheʼ para guiníʼ pur laanu yaʼ». Laabe nabe qué lica gánnabe paraa nin padxí nin xii ngue chigúnibe, peru racaláʼdxibe gácabe casi Isaías, laa guníʼ: «¡Raríʼ nuaaʼ! Biseendaʼ naa» (Isaías 6:8). Ralph Leffler guníʼ: «Dxi ni qué ziuu dxi guiaandaʼ riʼ, dxi ca nga dxandipeʼ bizulú campaña para guireeche stiidxaʼ Reinu ni cayaca lu guidubi Guidxilayú yanna riʼ».

Qué ridxagayaadinu xiñee nabé risaca asamblea ni guca Cedar Point (Ohio, Estados Unidos) riʼ para biroobaʼ dxiiñaʼ stinu. George Gangas ná: «Despué de asamblea riʼ qué lica nidiʼdiʼ ndaaniʼ iqueʼ ñaadxaʼ nin tobi». Biaʼ de ra redasilú laabe la? qué ñaadxabe nin tobi. Ne Julia Wilcox bicaa: «Dede qué ridxelaʼ diidxaʼ para gusieneʼ xi runeʼ sentir cada biaje guzeeteʼ ca publicación ca ni bizaaca ndaaniʼ guidxi Cedar Point lu iza 1922. Rudii gana naa gabeʼ Jiobá: “Xquíxepeʼ lii pur bidiiluʼ lugar chuaaʼ racá”».

Zándaca stale de laanu rietenaláʼdxinu xiixa especial ni bizaaca lu ti asamblea ni yendá de ndaaniʼ ladxidoʼno, ni bisiecheʼ laanu ne bicaa laanu gannaxhiinu Dios stinu ne Rey ni maʼ biʼniʼ nombrarbe. Ora guietenaláʼdxinu cani rucaa cani laanu gábinu Jiobá «Xquíxepeʼ lii pur bidiiluʼ lugar chuaaʼ racá».