Gu Kindo Naadu wa Bakere Ngua

Rogo gu kura yuru sa, Nebukadenesara arari musumo naagundesi ko. Ko ayambu gako aboro tatamana i ye ka yugo rogoyo fuko. Ono boro ho dagbayo yo narengbe ka sakarogoyo te. Niyangaraha, bakindo apehe fu Daniere.

Nebukadenesara aya fu Daniere wẽ: ‘Rogo musumo yo, mi ni bi ngua. Si asono ni bagbangaha gbe ki da kina boro ariyo. Aboro kini bihe rogo arago dunduko rogo zegino. Si adu na wene akpehe ti ni na zuzuhe a. Anya kini sungu tii nzereme he, azire kini dua bambu ra ti abehe. Fuani, maraika ki ye ngbangbaturũ yo. Ki ya: “Oni de gu ngua re kusande ki kafu abehe kusayo. Ono oni mbu rukurumo ho na atarãha sende yo, na ki voho na giri marã na sirigi. Ngbadu gu ngua re nika satihe ti gu nga ga aboro kuti gu nga ga anya, daho ringbisiringbisi regbo ka susa ni wa bara saba. Aboro dunduko nika inoho nga Mbori nga Bazogo na ko rengbe ka fu kindo fu gu boro ko aida ka fuhe funi.”’

Yekova ayugu rogo gu musumo re fu Daniere. Ho Daniere arugu tiko na rogo gu musumo re ko aima gunde. Ko aya: ‘Ako bakindo, ka gu musumo re nidunga tipa aguyo nasoga ro, ono si nafura tipa ro. Gu bangua i adehe kusande re, mo du ngaha. Gamo kindo nika guari bero, na mo nika ri nvuo wakina nya. Ono wa duhe nga maraika niya i mbu rukurumo ho na atarãha kina sende yo, mo aduadu berewe ni bakindo.’

Fuo garã sa kusa, Nebukadenesara adu rii gako bambu yo kini bi Babera rago kini ngba tiko. Ko ki ya: ‘Mo bingo gi bawene gbata mi naduaha re. Mo bingo wai kii he gbe!’ Wa ko aafura, fugo apoi ngbangbaturũ yo nga: ‘Nebukadenesara! Awere ga kindo ima guari bero.’

Ti gu regbo re, Nebukadenesara ada ni irapopo na wakina zingizingi nya. Mbori asako ngbaome ko guari kpuko ka ndu ka raka na anya nvuo yo. Mangerii Nebukadenesara asono wakina mange pupo dingimo, na asiongo beko wakina ga zire.

Fuo agarã saba susi, Nebukadenesara ada berewe ni wene ko na Yekova ki sa ko berewe ni bakindo Babera. Fuani, Nebukadenesara aya: ‘Mi natambua Yekova Bakindo ngbangbaturũ. Awere mi inihe ya Yekova nga Bazogo. Ko naumbasi aboro rukö, na ko rengbe ka fu kindo fu gu boro ko aida ka fuhe funi.’