Ya Mo Oni wa gu Ngua Nga Lagani Auna?

ABATUNGUSIPAI ue aakaraga tiyo gene sunge tungusapai yo rogo kura uru sa, rogo gu gbaria nadu mbembedii na gu gbata nga Port Moresby, du Papua New Guinea yo. Wa i aandu, i abi bawene ngua gene. Gu ko nangia unvuru ki yaa: “Ha, mo bi gu ngua nga lagani auna!” Wa ko asatiko fuo gi kurako nangia tame fuko re, ko asusi na fugo kumbatayo ki yaa: “Rogo gu rimo re yo nga ‘gu ngua nambumbudo na agarã dunduko.’ Gi ngua re kia ti gu kura angua nasona rogo agu arago mai aná rogoho na rago kidu nifofõihe ka kpee angua auganga ya, kpehe nagboroka agboroka tigaha na agarã dunduko si kidu wa si ima kpi. Ono tie, ho mai aná ni, si kini zingi berewe akpehe kini funa, si kini mbumbudo na kini yugu ngbanyaaha berewe.”

Pai kinaho rengbe ani ka wirikaha be gu ngua nga lagani auna re. Kuti gupai bete abangbasia abawisigipai agumbaha, aboro nakoda gu ngua re ku dagba gu bawene angua bisue rogo zegino ninaambumbudo. Wa vura duhe nga ambumbudoho na akpehe naagboroka agboroka garã, gu ngua re nabanda ime abanda rogo katakpaha. Atãraha ninyanyakihe na ki rengbe ka rima arima pati ambia nga gu du kina boro tii sendeyo. Ngba gi gene re, agu atãraha re kini nyakasihe be bavugumo mai watadu wege. Niguruso fugo, si naʹaria tihe aʹaria tipa ka raka ringbisihe kuti gu kpakarapai duhe rogoho.

Ani rengbe arengba ka bi tirani rogo kpakaraapai nga gu rengbe ka asada nyakapa gaani idapase. Gine nika undo rani ani hipai? Wa kina gu ngua nga lagani auna re, si naida ani mbiri gu ime nga ga unga nga Fugo Mbori na ki bandaha. Si naida ani kakuti ‘gaani mbia’ nga Yekova, gbiakuti gako riigbu. (2 Samuere 22:3) Nirengo, gu kpiapai nga ga gu ngua nga lagani auna re, si nga wene tingidapai fu rani nga, ka si vura du nga ani rogo kere ba, ani rengbe arengba kindi ka banda gu gaani ome nga ga toro gbiati gaani ngbanyaa rogo toroyo ka ani agbia undo be agu ahe Yekova afuhe fu rani. Nimanga ani he wo, ani nikadu ni “adikumbo [agu] akidohe” nga gu ko amangihe, kodihe kuti gu kidohe nga ga nyenye unga.—AEbere 6:12; Yugoti 21:4.