Ya Mo Ani Naida Masiya?

SI RENGBE arengba fu roni oni sana gu sanahe nga, “Ya mo ani naida Masiya?” Ii, si rengbe arengba kadu ni gupai daada tipa ka sanahe singia Masiya nika manga gupai nikadu na ndikidi sangbanaha kuri roni.

Nirengo, bete agu aboro rengbe oni ka giasangba yo rengbe ka kido roni ya karagapai sa gu sanahe re ziazia na kidu nzunzu nga: Ani naida Masiya aida, a wa kura aboro aida ko. Bangbasia bainipai tipa ga aYuda andiko akepai rogo bambata sa kama agarã tipa Masiya ki yaa: “Wa du ga Mbori kidohe dunduko, kina rogo ko yo du Ii ni.” Rogo gi gene re, ko anyakasipa gu nyanyakipa sunge Masiya amangaha rogo agu akidohe nga ga Bakusirani tipa ka fu maku fu arikaaboro dunduko auru kpotosende. (2 AKorindo 1:20) Gu sunge nga ga Masiya, paha nibanyanyakihe gbe, sidu Ziazia Kekeapai agbeberã aboro ti ni kuti paye ko na gako gene raka ya si nigu sangbanebi si aida ani gbeberã rani kuti ni. Gu kumba nangia Henry H. Halley nangia bakeke gu kuru apangbangaa du paha rogo Ziazia Kekeapai anyakasipai rogo gu buku amirioni aboro amangisunge nani vuru agu agarã susi wa 70 ki yaa: “I ake Kuru Ndiko tipa si fu maabangirise tipa Paye [Masiya], na si mbakadi gene fuko.” Ono, ya mo paye ko ni gupai duwa ka si mangi amanga? Tipagine si aida oni du ti ni na bakabangirise tipaha?

Gu fugo nga “Masiya,” rogoyo nga “Mbedimbedi Boro” nga gu fugo du rogoyo rogo pa-Giriki aboro nainihe wenengai nga “Kristo.” Ko nga gu Boro buku sa aringbisa pako “nibakerepa batasi,” (Encyclopædia Britannica,1970 Edition) ya si arengbe ko ye ku zegino mbiko gu iraira mangapai nangia ga gu bambata aboro nangia Adamu na Eva. Mbori amangi yo nirengberengbe yo ti tonatonaha, na i kidu na wene maabangirise nga ga gu raka adunga digidoho ti ni ya rogo Paradiso, ono tie, i agberesipa gu maabangirise re agberesa. Gu maraika nasamungu, nga guko i aini ko ti gu rimoko nga Satana Bakitingbanga, afu berã fu Adamu na Eva ki yawee Bakusiyo na kere andiko beko nabengeta yo ti weneapai, na ki ya berewe ka i amanga adiaberã tipa tiyo tipa wenepai na gbegberepai, apai angba angba kubarayo yo.—Bambata Pai 3:1-5.

Woo anangi Eva ri ki idi kuti gu fugo ziree re. Si nawiraha nga, wa Adamu abi pa gako ngbanyaa na diako ninyanyakipa pai susi pa ka ko kuti manga rurupai fu Mbori, ko angbe na Bakitingbanga rogo gako samungu. (Bambata Pai 3:6; 1 Timoteo 2:14) Nigu gayo gbegbere mangapai re, i agbarasipa gu gayo maabangirise nga ga gu raka adunga digidoho ti ni ya rogo gu kpakpu arago nga ga paradiso. I ambu gu ũkumbo nga ingapai du sangbanaha nga kpio fu agu atitayo i atabatikanga yo ya.—ARomo. 5:12.

Tona ti kina gu regbo i aingipai re, Yekova, nga Bakusirani, adiberã tipa ka dia gu gbegbere asangbana apai kusayo nga gu naenge ti gu samungu re nga gu naamanga gu timburu kuraha. Si adu nga ko nika digiso mbakadapai dagba aboro rogo gu gene si adu nga i nika inoho nibangua arugute rogo ga Mose aNdiko, wa gu nga unga nikadu kuba unga, bangirise kuba bangirise. (Pa Fu Rugute ni Ue he 19:21; 1 Yoane 3:8) Si adu nga i duwa ka i ringbisi gi bangua rugute re ka si du nga si aida agu atita Adamu na Eva naadunga na gene beyo ya gbia gu raka adunga digidoho ti ni ya rogo paradiso auru kpotosende, a wa Bakusiahe aringbisipaha fu aboro. Gipai re andu ki kodi Masiya kurogoho a.

Ho Yekova Mbori aasarangbangaa ni kurii Bakitingbanga, ko aya rogo gu bambata sangbanebi nga ga Ziazia Kekeapai wee: “Mi amáa sogote dagba roni na de, dagba atitaro na atitari a; ko ki mburu riro, mo ki mburu gidako.” (Bambata Pai 3:15) Kumba sa nangia wene bawiriki Ziazia Kekeapai ayawee: “Gu pangbangaa nga ga agu akidohe du tipa Masiya, si natona na gi fugo du kuari re, a wa Ziazia Kekeapai asakapai tipaha.” Gu kurako ayawee Masiya nga ga Mbori ũsunge “nika dia gu ingapai nga ga bambata aboro kusayo,” kini fu maku fu ngbatunga aboro rogo gi mangaapai re.—AEbere 2:14, 15.

Nirengo, oni rengbe arengba ka bi gupai nga, ngbatunga aboro areme na maku te. Kuba gure, aboro areme nagbia kina bakere rungo na ki zanga maabangirise. Si ki ta du were, buku sa nayawee: “Dungu aYuda kindi areme namaabangiriyo tipa paye Masiya berewe,” na i nayawee ko “nika ye ka mbakada gu gbegbereapai namanga auru kpotosende naki dibe agu aboro nga akare kuti akurayo.” (The World Book Encyclopedia) Ono tie, Ziazia Kekeapai naya fu rani wee Masiya aima ye.