Ya Mo Ndupai Ho Ani Ini agu Akaragapai Du Tipa Yesu?

“Oni aína rengo aina, ki ra ni rironi be rengo.”—YOANE 8:32.

ZIAZIA KEKEAPAI na gu rengo rogoho rengbe ka banda rani ti gu vunduvundu aida du tipa Yesu. Gupai ani aida kutini tipa Yesu, ya mo si na nyanyakipaha? Ii, si na kina nyanyakipaha. Si na nyanyakipaha fu Yekova kidu adu a na nyanyakipaha fu Yesu. Si naida si dudua a na nyanyakipaha furani.

● Tipagine duhe ti ni na nyanyakipaha fu Yekova? Si fuko na nyanyakipaha mbiko gupai nga ko nga gu “Mbori nga nyemuse.” (1 Yoane 4:8) Yekova naida gupai nga ani raki na ngbarago nyeanye kindi. Yesu ayaa: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko . . . nyenye unga du adu be ni.” (Yoane 3:16) Yekova akedi Wiriko ko ye kadu ni Batumorii furani tipa ani rengbe ka raka Paradizo yo auru kpotosende ane ringbisihe kuti gako bambata ringbisapai. (Bambata Pai 1:28) Mbori naida ka fu gu gamahe nga ga nyenye unga fu agu aboro nawirika rengo tipa Wiriko na kini mangipai ringbisihe kutini.—ARomo 6:23.

● Tipagine duhe ti ni na nyanyakipaha fu Yesu? Yesu ima kpinyemu aboro a. Ko ayugu gu nyemuse nasa boro ní mbupa kura gani apai nifuko ungako tipa rani. (Yoane 15:13) Ko aima inoho nga si nangia gu yangara pai narengbe ka ye na bata fu aboro. (Yoane 14:6) Ya mo ngbarani nazera ka bi gupai nga Yesu naida badungu aboro gbia undo ti gako motumo tumorii? Si nga ndu gupai ko azinahe ti ni fu ndikidi apefuoko nga i yugupai fu aboro rogo zegino dunduko tipa gupai Mbori akpinyemuhe na gako ringbisapai.—Matayo 24:14; 28:19, 20.

● Tipagine si aida si du ti ni na nyanyakipaha furani? Oni berẽnga tooni tipa agu apai nyakipaha bangironi gbe, isoke gaoni aborokporo gbiati padu kpotoroni wenengai. Ya mo oni nangera tipa gu regbo oni gbiati agu aboro oni akpinyemuyo nikadu na wene kpotoroni na kini raki wene raka? Vurube Yesu, Yekova nafu gu maabangirise furoni na agu aboro oni akpinyemuyo nga ga raka nyeanye kindi na wene kpotose rogo vovo zegino, zanga igira na rungo. (Atambuahe 37:11, 29; Yugoti 21:3, 4) Ya mo oni naida ka raka ngbatunga gu raka du wa gure? Ka si du wo, pai kinaho si aida oni mangihe.

Oni bingo gu veresi berewe du ti tonatona gi kekeapai re nga gu nayaa: “Oni aína rengo aina, ki ra ni rironi be rengo.” Gu rengo du tipa Yesu na gu sunge ko amangaha tipa ka digiso ga Mbori ringbisapai rengbe ka batasa rani be gu zio nga ga ingapai na kpio. Ono tipa oni kuru ti gu zio re, si naida oni ini “rengo aina.” Si angba gbe ka oni wirikipai nibakerehe tipa gi rengo re na ki wiriki wai rengbe oni gbiati agu aboro oni akpinyemuyo ka gbia undo behe. ADezire Yekova nikadu adu na ngbarago ka undo roni oni wiriki gu rengo re.