Wai I Ami Tunga Kindo Ni Bambataha Portugal Yo

WA GU baime nga Atlantic ata sungburo kini suka tihe ti gu bakurungba naandu nunguro ku ringara putu yo, boro sa dagba agu aboro naadu rogo gu bakurungba re nga George Young, aaberã kusayo na ngbarago kurii gu zuzuhe nga ga Kindo ko ambuhe ni giiko Brazil yo.a Ono tie, wa gu nunguro re aandu kumbatayo, Wiriba Young atona gbe berãko kuti gako vovo sunge rogo gu bakere adagbarago nga ga Spain na Portugal nga gu i aatungusanga pai rogoho mbata ya. Ko adu na gu maabangirise nga ho ko nika da ni yo, ko nika manga mbakadapai tipa Wiriba J. F. Rutherford mangi agumbapai nga ga Ziazia Kekeapai na ko nika kparaka atrakte nga 300,000!

Ho Wiriba Young ada ni Lisbon yo rogo 1925, ko abi gupai nga apai adu yo ni vunduvunduhe. Gu riigbu nangia republican revolution rogo 1910 aima digiso gu zogarago nga ga abakindo, na si ki sa gupai nga gu Kanisa Nga ga Katoriko zanga gu bakere ome si adu na ni. Badungu aboro aima gbia bakere ranirii, ono vunduvunduapai nga ga birĩ zogarago aandu kindi kumbatayo rogo gu ringara re.

Ti gu regbo Wiriba Young amangi mbakadapai ti ga Wiriba Rutherford gumbapai, irangbii asigira gu ndiko nga ga abanzengere bambiko gupai nga aboro adu kinaho naˈasadi ka dia zogarago ngbaome. Gu bakeapai nangia ga British and Foreign Bible Society aza Wiriba Young nga ko nika gbiatiko agbia na bakere sogote, wa si avura du wo, Wiriba Young asanahe tipa gu sukuru nga ga mangonvo nga Camões Secondary School, tipa i mangi gumbapai rogoho, na i ki ima idapaha fuko!

Fuo gure, gu ramediwi nangia ga Merekoko 13 i asiaha tipa ga Wiriba Rutherford gumbapai ada. Aboro aangera kina kumbatayo tipa gu gumbapai re! I aatakapande gu gumbapai riihe angia “How to Live on the Earth Forever” re ti awaraga ti vuro abambu na rogo waraga apangbanga. Agu aboro pambori naasoga gaani yugopai akusi kekeapai ni kina boro ipo rogo gayo waraga apangbanga tipa ka za agu aboro naagedaha nga vovo “zire anebi” kuru. Agu aboro pambori re afuku akutu aburosua fu aboro ngba gu gene naandu ku rogo gu sukuru nga ga mangonvo re nga gu naadu na agu apai rogoho naafura gbegberẽ tipa agu ayugopai Wiriba Rutherford ayugoho.

Ono wa si avura duwo, aboro wa 2,000 aima rimo ku rogo gu sukuru re ka gia gu gumbapai re, na aboro wa 2,000 naarimonga ya, bambiko gupai nga ba aadunga te. Kura aboro naima du na bakere nyemu gu gumbapai re tiyo aazio agu agire naadu ti agu ahe i abita ti ni kuari yo bambu mangonvo yo kini yangata kutini; agu akurayo kini biti kurii aũ mangonvo.

Apai aandunga dunduko wenengai te. Asogo gaani yugopai atona taka ngbayo na kini kuadi akiti. Ono Wiriba Rutherford aandu kindi kumbatayo ki zanga du ioio na ko ki biti zezeredi kurii mbisa tipa aboro nigi ko agia. Fuo nyasa ko gako gumbapai ho bebere yuru aambeda ni, bange aboro naima susa 1,200 afu rimoyo na gayo adresi tipa i kedi agu awaraga du mburuhe rii Ziazia Kekeapai fuyo. Rogo gu uru nangbefuo gure, gu waraga apangbanga nga O Século akusi kekeapai nibipa ga Wiriba Rutherford gumbapai.

Bara rogo Mbirinvuo 1925, i atona kusa Ngbaõbambu Sinziri Portgual yo rogo pa aboro Portugal. (Mbata kusayo, i aima kusaha rogo pa aboro Portugal Brazil yo.) Bara ti gu regbo re, Bawiriki Ziazia Kekeapai nangia Virgílio Ferguson, Brazil yo atona sogima gate ku Portugal yo tipa ka undo gu sunge nga ga Kindo yo. Mbata kusayo, ko aima mangasunge na Wiriba Young rogo gu umba be-basunge nangia ga Abawiriki Ziazia Kekeapai Brazil yo. Fuo regbo ngbutuko, aVirgílio na diako nga, Lizzie, atona gayo nunguro tipa ka kodatiyo na Wiriba Young berewe. Wiriba Ferguson ada yo ti kina boro wene regbo, bambiko si adu nga Wiriba Young nika ndu fuo regbo ngbutuko ku rogo kura aba na sunge nga ga Kindo, kodihe na Soviet Union.

Ho abanzengere adi zogarago ni ngbaome na ki tona zoga aboro ngbaome Portugal yo, kere aregbo naadu kumbatayo rogo gu ringara na agu aboro naasoga gaani sunge nga ga Kindo ki ima nge kisusi. Wiriba Ferguson anye kina rogo bako ni wingbaduse na ko ki mangi apai tipa ka banda gu umba badona nangia ga Abawiriki Ziazia Kekeapai rogo gu ringara re na ka songoda gayo sunge. Ko asanahe tipa adunguratise naamanga kpuko yo. Rogo Tanvuo 1927, i kini idihe adunguratise naamanga yo.

Rogo gu bambata garã zogarago adu ngbaome re, bange aboro wa 450 Portugal yo nasanahe tipa i kedi aNgbaõbambu Sinziri fuyo. Kurigure, rengo agbandaka vurube atrakte gbiati rukutu abuku ku rogo gu tuturũ aba Portugal aazogaha, nga, Angola, Azores, Cape Verde, East Timor, Goa, Madeira, na Mozambique.

Rogo gu garã nangia 1929, boro Portgal nga guko nanaamanga sunge ati fu aboro rimoko angia, Manuel da Silva Jordão, aye ku Lisbon yo. Ho ko aaraka ni Brazil yo, ko agi gumbapai nga gu Wiriba Young amangihe. Ko arugutiko na rengo na ko kini du na nyemu ka undo Wiriba Ferguson tipa ka kiiso sunge tungusapai. Tipa ka manga gipai re, Manuel atona mangasunge ni bakparaka abuku pambori, wo du i anaayamba abazakigene mbata. Wa wene mbakadapai aima ye kadu awere tipa kusa agu awaraga du mburuhe rii Ziazia Kekeapai na kini kparakaha, gu vovo dungurati naadu Lisbon yo aasona kina kumbatayo!

Rogo gu garã nangia 1934, si aidi aWiriba Ferguson na diako ga ku Brazil yo. Ono wa si avura duwo, i aima mi tunga rengo. Rogo gu vunduvunduapai naamangi Europe yo ti regbo gu vura i aayambaha nga Spanish Civil War na ti regbo Ue Vura Nga ga Zegino, gu ruru badona nangia ga awirina naadu Portugal yo aima bata rogo toro yo. Tipa bete regbo, i aawira kina pidopido we, ono rogo 1947 gu we nga ga gi badona re atona ka ki berewe, ho gu bambata mokedi i araba ko Girada yo nangia John Cooke ada ni. Ti fuo gure, boro ho berewe narengbe ka rugusa gu sona kumbatayo nga ga atakipande Kindo te. Zavura ho irangbii arugusi agu asunge ni nga ga aDezire Yekova rogo 1962, bangeyo aasona kina kumbatayo. Rogo Banduru 1974 ho i asigira ga aDezire Yekova sunge ni berewe kuti ndiko, abatungusipai bangeyo adu nga 13,000 aima duho rogo gi ringara re.

Areme, abatungusipa Kindo naima susa 50,000 natungusa gu wene pangbanga nga ga ga Mbori Kindo Portugal yo na rogo badungu agu akisanga i ape pa aboro Portugal rogoho kodihe na Azores gbiati Madeira. Dagba agu abatungusipai re, atita agu aboro kinaho areme naadu pati ga Wiriba Rutherford gumbapai rogo 1925.

Ani nafu tambuahe fu Yekova gbiati gu ruru awirina naadu bakuru kusayo na wingbaduse ki ngbe mbatayo rogo sunge yo ‘ni ga Kristo Yesu amoyambu fu aGendiria.’​—Rom. 15:15, 16.​—Gaani Kuru Apangbanga Portugal yo.