Wai du Aboro Anaageda SAA Mbata Kusayo?

HO MO naaida ka ino saa ni, ginipai mo naamangaha? Si nawira gupai gbe nga mo naangana gamo saa. Ka si du nga kuaro sanaro tipa saa, wai du rengbe mo ka karagapai? Dungu agene duho aboro apepa saa ngbaha. Gini agene du?

Sidu, ani yanga wẽ ndu uru awere nga saa 1 na biata bawe aminiti kuriihe bebere uru. Mo ima rengbe ka ya ndu uru awere nga 1:30. Si naruriipa gu ba du mo rogoho, na ringbisihe kuti wai aboro ageda saa rogo gamo rago, ni kpiapai, mo ima rengba ka ya ndu uru awere nga 13:30. I nageda saa wa gere ringbisihe kuti gu gene geda saa nga ga 24 rogo uru sa. Kura aba kinaho i naima rengba ka geda gu bangisa saa re rogoho nga “bebere ue,” du rogo yo nga 30 aminiti du koyo kuti saa 2.

Ni du mo ni gu boro nageda Ziazia Kekeapai, mo ima rengba kaa bakabangiro nga wai du aboro anaageda saa ti agu aregbo i aakeka Ziazia Kekeapai ti ni. Gene geda asaa aadunga gbua sa te. Kuru Ndiko mangisunge na agu afugo nga “wiso,” “bebere uru,” gbiati “nyemu.” (Bam. P. 8:11; 19:27; Pa Rug. 28:29; 1 Aba. 18:26) Ono tie, ti kura aregbo, Ziazia Kekeapai mangisunge na kina boro ndikidi regbo.

Akama agarã mbata fu batikayo Yesu, aYisaraere anaakparaka yuru ku rogo apaparaha biata, nga gu i anaayambaha nga “arago” watadu aregbo. (Tam. 63:6) Abasapungbanga 7:19 fura tipa “gu bandarago nga ga bebere yuru.” Ti rago Yesu, aYudo anaakparaka yuru ku rogo apaparaha yo biata kina wai aGiriki na aRomo anaamangaha.

Akitabu Wene Pangbanga ima fura tipa agu aregbo re bara dunguhe. Ni kpiapai, ho Yesu andu ni rii ime koyo gu kurungba adu ni gako abawiriki adu rogoho, ko andu “pamanangba wiso.” (Mt. 14:25) Yesu ape gupai rogo gako sanza yo nga: “Ka irakporo aini gu rago [saa] iradĩ ka ye ti ni, ka ni angere, ka ni aida nga i kuadi gani bambu ya.”—Mt. 24:43.

Yesu afura tipa agu asaa re dunduko biama ho ko aya ni fu gako abawiriki wẽ: “Oni ngére a wo, bambiko oni aina nga ni gu rago irakporo ka yega te, ka ni yega a nyemu na bebere yuru, na ho kondo nakua ni, a wiso a.” (Mk. 13:35) Bambata saa dagba agu asaa re yo nga, “nyemu,” nga gu naatona ho uru ati ni ki da kuti saa ribua yuru. Uehe nga, “bebere yuru,” nga gu nanaatona bara ti saa ribua da ku bebere yuru. Biata saa angia, ho “kondo nakua ni,” nga gu regbo natona bebere yuru da kuti he wa saa biata nga ga wiso. Si ima rengba kadu nga ti gi regbo re du bakondo akua rogo gu yuru i azi Yesu. (Mk. 14:72) Biama saa angia ngbatutu “wiso,” nga gu naatona ti saa biata da kuti gu regbo uru akura ti ni.

Sidu, wa vura duhe nga agu asaa du areme aadunga be aboro mbata kusayo ti agu aregbo i aakeka Ziazia Kekeapai ti ni te, gene anidu kinaho i anaageda saa ngbaha uru watadu yuru.