Bambata Kumba na Dee

GINIHE du rogo gi sura re ninaadunga mbata ya? Aboro du rogoho. I nga bambata kumba na dee. Da nakusiyo? Mbori. Mo ini rimoko? Rimoko nga Yekova. Na i afu rimo gu kumba re na gu dee re nga Adamu na Eva.

Were Yekova Mbori akusi Adamu. Ko akiti sende ki mbakadi kumba rogoho ni rengberengbe ko. Ko ki ongo onga unga ku õko yo, Adamu ki da ni unga boro.

Yekova Mbori afu sunge fu Adamu. Ko aya fuko ko yambu arimo kurii anya ni basasa dunduko. Si nawira Adamu aima kparia agu anya re tipa gbanga regbo tipa ka sia agu arimo rẽarẽ tipa ra ni basasa. Ho Adamu aayamba arimo ni kurii anya, ko abi gu kurapai. Mo ini gupai nangiaha?

Agu anya re adu dunduko ni ba-ue-ue. Ambarã adu nga bara na nara, abahu kidu nga bara na nara. Ono tipa Adamu ko adu nisako. Sidu, Yekova asa Adamu ko ra, ko ki di meme ngazirako sa ki mbakadi dee fuko rogoho, ri kidu ni diako.

Rago aima ngba ti Adamu gbe! Mo berẽnga pa gu ngbarago Eva adu na ni tipa ka raka rogo gu bawene ati re! Awere tie, i aima rengba ka vunga agude na kini raki dunduko wa sa na ngbarago.

Yekova aaida aAdamu na Eva raki nyeanye kindi. Ko aaida i sa kpotosende dunduko ni wenehe wakina ati Edene. Nairiwo gu ngbarago aAdamu na Eva adu na ni ho i aaberãpa manga gipai re ni! Ya mo ka mo aidi ka mangasunge tipa ka sa kpotosende si du ni bawene ati? Ono gu ngbarago aAdamu na Eva adu na ni ­aaimanga te si ki digi. Ani bingo gupai namangi.