Awiriba Yosefa Asogoko

MO BINGO gu gberarago du gi tooni kumbagude re na ni. Yosefa du. Awiribako nga aunvurako ima baga ko fu agi akumba re nga aguyo nandu ku Ezipeta yo. Ko nandu kadu yo ni kanga. Tipagine aunvura Yosefa namangiko ti ni na gi bagbegberẽpai re? I mangihe wo mbiko i nakpiko akpi.

Bayo nga Yakoba aima kpinyemu Yosefa gbe. Ko arungu bawene gbanga roko fuko. Ho aunvura Yosefa abi wai ni bayo aakpinyemuko gbe, i atona ka kpiko na kini sogoko. Ono kura ndupai adu kinaho i asogoko ti ni.

Yosefa arari amusumo ue. Rogo agu amusumo ue re, aunvurako atumusa fuko. Ho Yosefa agumbapa agi amusumo re ni fu aunvurako, si azingisi gayo sogote kina ku mbatayo.

Rogo kura uru sa, ho aunvura Yosefa aariga ga bayo akandoro ni, Yakobo aya fu Yosefa wẽ ko ndu fuoyo ka ino gupai du tipa yo yo. Ho aunvura Yosefa abiko ni ko niye, aguyo dagbayo aya: ‘Ani imiko!’ Rubena nangia bambata wiri Yakobo ki ya: ‘Oó, ka oni imingo ko ya!’ I adi Yosefa ki bako ku rogo due ime nga gu ime aima uguda rogoho. Fuoho, i ki ­sungu ka berãpa gupai ka i mangiko na ni.

I ki ya ngere, i ki bi akumba nangia aYisamaere i niye. Yuda ki ya fu awiribako: ‘Ani bagiko fu aYisamaere.’ Na gure nga gupai i amangihe. I abagiko tipa rukutu marã feda 20. Nagberẽ gupai i amangihe re!

Ono ginipai i aga ki gumbaha fu bayo tipa tameyo? I aimi meme ki mogodi ga Yosefa wene roko ku rogo kureru. I aga na gu roko re fu bayo ki ya fuko: ‘Gere bi ani he. Mo bingoho singia ga Yosefa roko du watadu si ngaha te.’

Yakobo abi gupai nga kina ga Yosefa roko du. Ko ki kpari kuari ki ya: ‘Kere nya du ritiko.’ Na kina boro gupai re awiriba Yosefa aidi bayo berẽhe. Yakobo adu na bakere gberarago. Ko akpari tipa badungu arame. Ono Yosefa aakpingo te. Ani bingo gupai namangi tipa ko rogo gu ba i aga na ko ku rogoho.