Bamburoko nga ga Irisombori

MO INI gu he nga gi bambu re? Bamburoko du i ambakadihe tipa iriso Yekova. I nayambaha ayamba a nga banye. ­AYisaraere anyasi sungehe fuo garã sa fuo kura yo Ezipeta yo. Mo ini da naya i duaha?

Yekova du naya i duaha. Ho Moize adu ni rii Bagangara Sinai yo, Yekova apeke pa wai fuko ko aida i duaha. Ko aya i mbakadihe ngba gu gene si nika du taata tipa kaa diaha rogo gu baha. I anaazazaka angbazunga gu bambu re azazaka tipa ka tindaha, kini duaha rogo kura ba berewe. Wa aYisaraere anida rogo gu ba i ki guari ho ngbakungba yo, i anaatindaha kindi ho i aniguari ni.

Ka mo ngere ku rogo gu umba vurubambu du ti digido gu bambu re, mo nika bi sanduki. I anaayamba gu sanduki re nga sanduki mokido. Si adu na kpia agu amaraika nga akeruba ue riihe nga gu i ambakadihe rogo dahabu, gu ti ngbaha kubani gu kidu kubani. Mbori aima ke Agu Andiko Naadu Bawe berewe rii kpakakpaka ambia ue, bambiko Moize aima kuadi agu naadu mbata. I anaabanda gu kpakakpaka ambia re rogo sanduki mokido. I amoi akoro dahabu ku vuru sanduki mokido yo a nga gu naadu na manu rogoho. Mo natingidapa gu he nangia manu?

Unvura Moize nangia Arona Mbori asiako ko du ni gbiamotumo. Ko nanaangbembatayo fu aboro rogo iriso Yekova yo. Awiriko angia kina aboromotumo a.

Awere tie, mo bingo gu vurubambu du ni bakerehe re. Si ima kio kisusi gu toonihe bara ue. Ya mo mo bi gu sanduki wiri ngime agundo riihe yo? Gere nga gu bamotumo aboromotumo anaazo wene fuõngua rogoho fu Yekova. Fuo gure, baduawe du ho nga gu du na aramba ti ni saba. Gu biata he du rogo gu vurubambu re nga mbisa. Akpakuto riihe 12.

Vurukporo gu banye re, bakere kurungbu adu ho na ime rogoho. Aboromotumo anaazunda abeyo na anduyo rogoho. Bakere bamotumo adu kinaho a vurukporo. Gure gu i anaaimo anya kini zora riihe fu Yekova. Gu bamburoko re adu bebere gu bataya nga ga aYisaraere, aYisaraere kini raki rogo gayo abamburoko kirikiri pati ni.