Zamba Woo

YA MO ndikidi woo du kai tiru kuti ngua re? Ndikidi woo ngaha te. I ambakadi gu woo re rogo gu he nga tara. Yekova aya fu Moize ko kai he ti ngua tipa aboro ningere kuti ni kini bati. Ono agu awoo du sande re nga kina ndikidi awoo. Ami ima dewa aboro ni kerehe ki fu kaza fuyo. Mo ini nduhe?

Si amangi wo mbiko gupai nga aYisaraere aagumba gbegberẽpai kuti Mbori na Moize. I akpakanahe ki ya: ‘Tipagine oni akusi rani ti ni Ezipeta yo ani ye ka kpiko rogo gi ngbakungba re? Riahe ­watadu ime rogo gi ba re a te. Na omerani ima bata be ri manu.’

Ono manu angia wene riahe. Yekova naakedaha fuyo ngbangbaturũ yo. Na ko akusi ime fuyo ti mbia a. Ono aboro aadunga na tambuahe tipa wai Mbori angerefuoyo te. Yekova kini kedi gi kere awoo re ami ye ka dewa yo. Ami adewe yo na dungu aboro ki kpiki.

AYisaraere ki ye koyo du Moize ni ki ya: ‘Ani mangi ingapai, bambiko ani gumbapai kuti Yekova na ku tiro. Awere tie, mo kpari fu Yekova ko di agi awoo re kusayo.’

Moize ki kpari fu Yekova tipa aboro. Yekova kini ya fu Moize ko mbakadi woo rogo tara. Ko aya fuko ko moi gu woo re ti ngua, gu boro ka woo de ní ní ki ngere kuari kuti gu woo re. Moize amangihe a wa Yekova agumbaha. Agu aboro awoo adewe yo angere kuari kuti gu kpia woo re i ki hu.

Pai kinaho ani awirikaha ti gipai re. Ani dunduko du wakina agu aYisaraere awoo adewe yo re. Ani dunduko nakpiko akpiko. Mo bingo wai aboro agbinza, kini woki, na kini kpiki. Si namanga wo mbiko gupai nga gu bambata kumba na dee nangia Adamu na Eva asamungu kuti Yekova, na ani nga awiriyo. Ono Yekova ima mangapai tipa ani raki nyeanye kindi.

Yekova akedi Wiriko nga Yesu Kristo ku sende no. I abanga Yesu kuti ngua, bambiko dungu aboro aberẽ gupai nga gbegberẽ boro nangia ko. Ono Yekova akedi Yesu kono ko ye ka batasa rani. Ka ani angera koyo du ko ni, nga kaa pekako, ani raki araka nyeanye kindi. Ono ani ka wirikapai tipa gipai gbe kusa.