Ngangarã Adee Ue

HO AYisaraere agbiatiyo ni na kerepai, i akpari fu Yekova. Yekova ki karagapai kuti gayo kpee ni fu ko ngangarã abangbembatayo fuyo tipa i undo yo. Ziazia Kekeapai nayamba agu abangbembatayo re nga abasapungbanga. Yosua nangia bambata basapungbanga, na gu kura abasapungbanga nangbe fuoko nangia Oteniere, Euda na Samagara. Ono gu kura aboro ue naundo aYisaraere angia adee arimoyo angia Debora na Yaere.

Debora angia denebi. Yekova anaapeka agu apai furi nika manga ku mbatayo, na ri kini gumba gupai fu aboro Yekova anaagumbaha. Debora angia nasapungbanga a. Ri anaasungo tii mbiro rogo ringara abaagangara yo, na aboro kini ye fuori tipa ka gbia undo tipa gayo apai.

Ti gu regbo re Yabina nangia bakindo Kanana. Ko adu na angbagidavura beko 900. Gako abanzengere aima nyaka gbe, si ki sa gupai nga dungu aYisaraere da ni ga Yabina amoyambu. Rimo bangerekurii ga Yabina aborovura angia Sisera.

Rogo kura uru sa, Debora akedi gu basapungbanga nangia Baraka ki ya: ‘Ya Yekova wẽ: “Mo ndu ki dungura akumba 10,000 ki ndu na yo kurii bagangara Tabora yo. Yo mi nika ye kuhoni na Sisera fuoro. Mi nika fu diabese foro kuriko na gako aborovura.” ’

Baraka ki ya fu Debora: ‘Mi andu koyo kina gu ka si du nga ani nika ndu sa na mo.’ Debora andu na Baraka sa, ono ri ape gupai fuko nga: ‘Gu nduge mo ka ndu si adunga ni pa irisa foro te, bambiko Yekova nika fu Sisera kina ku be dee.’ Na gere nga gupai namangi.

Baraka ki ndu kurii bagangara Tabora yo ka gbia ga Sisera abanzengere. Wakina ikpirogumba, Yekova ki sa ime si hi, si ki fu na avurayo kusayo. Ono Sisera ki di gako angbagidavura ki oro.

Tingbafuo bete regbo, Sisera ki ye kutii ga Yaere bamburoko yo. Ri ki diko kugume, ki fu mamunya fuko ko mbirihe. Mamunya asa gupai nga rame tona ka mangako, na fuoho aaimanga te ko ki ti ni bakere rame. Yaere ki di gu ngua i abanga bamburoko na ni ku sende yo ki ­banga rii gi gbegberẽ kumba re na ni. Kusa, ho Baraka ayeni, ri ki yugu kangba Sisera fuko! Mo nabi wai gupai Debora agumbaha ada ­nirengo?

Ni yangaraha, i ki imi bakindo Yabina a, aYisaraere ki gbia zereda berewe tipa bete regbo.