Gidiona na Gako Akumba 300

YA MO mo nabi gupai namanga ane? Agi akumba re dunduko nga abasovura nga ga aYisaraere yo. Agu akumba nugo kusande re nambira ime. Gu boro ru patiyo re nga gu basapungbanga nga Gidiona. Ko nabi wai i ambira ime.

Mo kparianga agu agene agu akumba re ambira ime ngbaha. Aguyo nadua kpakpuyo nibasa kina ku ime yo. Ono gu kura ko sa natu ime na beko, tipa kaa ngera ka bi gupai namanga patiko. Gipai re angia nyanyakipa pai, bambiko Yekova aya fu Gidiona ko di kina agu akumba nangera patiyo ho i ambira ime ni. Agu akurayo re, Mbori aya i karagayo ku kpuyo yo. Ani bingo nduhe.

AYisaraere adu rogo badungu kpakaraapai berewe. Si aduwo mbiko gupai nga i aagianga sangba Yekova te. Aboro Midiana aima du na pagbia kuriyo na i kini sovura kuti yo. AYisaraere akpari fu Yekova tipa undo, ko ki gi gayo kpee.

Yekova ki ya fu Gidiona ko dungura abasovura, Gidiona ki dungura abasovura nga akumba 32,000. Ono bange agu akumba naasovura kuti aYisaraere adu nga 135,000. Ono Yekova aya fu Gidiona: ‘Mo na dungu abasovura bero ki susi wai si aida i du.’ Tipagine Yekova ape gupai re ti ni?

Ko apehe wo bambiko ka aYisaraere aso gu vura re ki dibehe, ka i aberẽ gupai nga i adi be gu vura re mbiko gayo ome nitiyo. I arengbe arengba ka berã gupai nga i aidanga ga Yekova undo tipa ka diabe vura te. Si du Yekova aya ti ni fu Gidiona wẽ: ‘Mo ya fu agu akumba naabayo dunduko nagunde i ga ku kporo yo.’ Ho Gidiona amangi gipai re ni, aboro dagba gako abasovura nga 22,000 aga ku kporo yo. Gure nga aboro gbua 10,000 nanye ka sovura kuti abasovura nga 135,000.

Ono Yekova ki ya fu Gidiona: ‘Mo na akumba bero kindi ni dunguyo kisusi.’ Ko ki ya fu Gidiona ko ya fu gako akumba i mbiri ime rogo gi guga re, na agu aboro dunduko nikaa dua kpakpuyo kusande tipa ka mbira ime, Gidiona ki ya fuyo i ga ku kpuyo yo. Yekova ki kido Gidiona nga: ‘Mi nika fu diabese foro na kina agu akumba du bangeyo nga 300 nga agu akumba ninaangera angera patiyo ho i naambira ime ni.’

Regbo sovura ki da. Gidiona ki kparaka gu gako akumba naadu 300 ku rogo abadona biata. Ko ki fu anambongo fuyo ni basasa dunduko, na kambu na abaro vuruhe yo. Ho bebere yuru adani, i ki dunguratiyo dunduko kupati ga avurayo bataya. Fuo gure, i ki vudi gayo anambongo ti bangisa regbo sa na ki futuka gayo akambu, ki poi kuari ki ya: ‘Ga Yekova basape na ga Gidiona!’ Ho avurayo azingi ni rame yo, ka i ainongo gupai namanga ya, riyo yo ki vundu tihe na i kini gunde agunde. I ki tona ka ora, aYisaraere ki dibe vura.