Yepeta Amangi Kidohe

YA MO mo amangingo kidohe ono mo ki bi gupai kusa nga si ni kpakarapai foro tipa mo mangi gupai mo akido paha? Gi kumba du surako re amangipai wa gu ngaha re, na si du du ko ti ni na bakere gberarago. Gi kumba re angia ngangarã basapungbanga Yisaraere yo. Rimoko angia Yepeta.

Yepeta araki ti gu regbo aYisaraere aairisongo Yekova berewe ya. I atona berewe kaa manga agu apai naadu ni gbegberẽhe. Si du Yekova asa aAmono ti ni i mangiyo gbegberẽ. Gipai re asa aYisaraere i kpari fu Yekova ki ya: ‘Ani ima inga kutiro. Ani nazungodi ro mo batasi rani!’

AYisaraere adu na bakere gberarago tipa gu gbegberẽ apai i amangihe. I ayugupa gayo gberarago ni iriso yo Yekova berewe. Na Yekova aundo yo berewe.

Aboro asia Yepeta tipa ko ndu ka sovura kuti gu gbegberẽ aboro nangia aAmono. Yepeta aidi Yekova undoko ko dibe vura. Si du ko akidohe ti ni fu Yekova nga: ‘Ka mo fu diabese fere kurii aAmono, gu bambata boro nika kura ka gbia re dagba gimi aborokporo ho mi ka yego ni ba vura yo, mi afu ní foro.’

Yekova adege tuko kuti ga Yepeta kidohe, na ko ki undoko tipa ko dibe vura. Ho Yepeta ayego ni ku kpuko yo, mo ini gu bambata boro dagba gako aborokporo nakuru ka uda ko? Wiriko nangia degude, na ri angia bangisa wiriko. Yepeta ki kpari ki ya. ‘Ako wire! Ka iriwo gu gberarago mo naye na ni kutire re. Mi aima manga kidohe fu Yekova, na ka mi sanga berãre te.’

Ho wiri Yepeta aini pa gako kidohe ni, ri adu na bakere gberarago mbata. Bambiko gure adu nga ri nika mbu bari na anakureari, na ki ndu ka mangasunge fu Yekova rogo gako banye Siro yo tipa yangara gari raka dunduko. Sidu, ri aya fu bari: ‘Ka si du nga mo amangi kidohe fu Yekova, si naida mo kakuti ni.’

Wiri Yepeta andu ku Siro yo, na ki mangisunge fu Yekova rogo gako banye yo rogo gari raka dunduko. Rogo agarã dunduko, agu adee naadu Yisaraere yo anaandu kaa bi ri yo tipa aˈuru biama na i kini ngi angi na ri. Aboro akpinyemu wiri Yepeta gbe bambiko ri angia ga Yekova wene moyambu.