Gu Kumba Naadu na Ome Gbe

MO INI rimo gu kumba naadu na bakere ome tiko kisusi aboro dũ? Ko nga gu basapungbanga rimoko angia Samusona. Yekova du nafu ome fu Samusona. Mbata fu i vungu Samusona, Yekova ape gupai fu nako nga: ‘Mo nika vunga kumbagude. Ko nika ngbembatayo tipa ka batasa aYisaraere be aFereseto.’

AFereseto angia gu gbegberẽ aboro naaraka Kanana yo. I adu na dungu aborovura beyo, na i amangi awiri aYisaraere gbegberẽ. Ti kura regbo sa ho Samusona aandu ni koyo aFereseto adu ni, bakere bahu azubo ko. Ono Samusona ki imi ru na kina kungbo beko gbua. Ko ki imi dungu kama gbegberẽ aFereseto a.

Kusa, Samusona atona ka kpinyemu dee rimori angia Derira. Agu abangbembatayo nga ga aFereseto yo akido Derira nga i dunduko ni basasa nika fu feda furi wa 1,100 ka ri zomia Samusona ki ini gupai nasako ko du na bakere ome. Derira aaida gu marã re. Ri aangianga ndikidi nakurea Samusona watadu nakurea ga Mbori aboro te. Sidu, ri anye kindi kuti sana Samusona tipa ko gumba gupai furi nasako ko du na bakere ome wa gure.

Ni yangaraha, Derira asa Samusona ko pe gupai furi nasako ko du na bakere ome tiko. Ko ape gupai furi nga: ‘I aakpenga mangerire te. Tona ti gu regbo i abatika re, Mbori aima sia re ni gako kparakpara moyambu nga boro Nazara. Ka i kpe mangerire, gi ome go ago ti re nibasa.’

Ho Derira aini gipai re ni, ri asa Samusona ko ti ni rame rii mboso ri. Tifuo gure, ri ayambu kumba ko ye ka kpe mangeri Samusona. Ho Samusona azingi ni rame yo, ome aadunga berewe tiko te. Fuo gure, AFereseto aye ki zi ko. I ki mofo azende bangiriko na ki sako ni gayo kanga.

Rogo kura uru sa, aFereseto adu na pumbo iriso gu gayo mbori rimoko angia Dagona, sidu, i ki kusi Samusona bambukiso yo tipa ka sawia ko. Ti gu regbo re, mangeri Samusona aima sona kubaha berewe. Samusona ki ya fu gu gude naandu na ko wẽ: ‘Mo mbu re mi zadi adangba bambu, nga gu bambu naru kuti ni.’ Fuo gure, Samusona ki kpari fu Yekova tipa ome, na ki zadi adangba bambu. Ko akpari ki ya: ‘Mo idihe ani kpi na aFereseto.’ Agu aFereseto naadu pati gu pumbo re, bangeyo adu nga 3,000. Ho Samusona azadi agu adangba bambu ni naadu ue, gu bambu re ati ki imiko na gu gbegberẽ aboro re dunduko.