I Aka ka Nugadi Fu Kpiahe

YA MO mo natingidanga gupai nga mo agi rimo agi aparanga du biata re mbata? I nga agu abakurea Daniere naka ka ri agu ariahe naangbanga tipa yo ya. Aboro Babera ayambu arimo kuriyo nga Sadaraka, Mesaka, na Abedenego. Ono mo bingo yo awere. Tipagine i anugadinga ti ni ku sande barabangiri gi bakere kpiahe re wa kura aboro amangaha ya? Ani bingo nduhe.

Ya mo mo natingidapa agu andiko naadu bawe nga gu kina Yekova akehe ni beko? Bambataha nga: ‘Ka mo irisingo kura ambori ya, kina re sa.’ Agi aparanga re nairisa gi ndiko re, wa vura duhe nga taatapai ngaha te.

Nebukadenesara nangia bakindo Babera ayambu dungu kikindigi pa aboro i ye ka iriso gi bakere kpiahe ko aduaha re. Ko azinahe fu aboro dunduko ki ya: ‘Ho oni ka gia woro ambanya ni, na woro akundi na kura woroahe, oni ki tiwi sande ka iriso gi kpiahe i amangihe rogo dahabu re. Gu boro nikaa tinga sande ka irisoho ya, i nika ba ní ku rogo gbigiwi we.’

Ho Nebukadenesara aini gupai ni nga aSadaraka, Mesaka na Abedenego airisongo ho te, ko azingi ni kerehe. Ko ki ya fu kura akumba i ye na yo koyo du ko ni. Ko ki ya fuyo i nika vudo ambanya berewe na ka i atinga sande bara gure a ya, i nika bi kina gupai nika manga yo. Ono agu aparanga re adu na kido kuti Yekova. I aya fu Nebukadenesara wẽ: ‘Gu gaani Mbori ani airisoko ko nika batasa rani abatasa. Ono ka ko avuranga batasa rani ya, ani airisongo gamo kpiahe te.’

Ho bakindo agi gipai ni re, ko azingi ni kerehe susi gu naadu mbata. Ko ki zinahe fu aboro ki ya: ‘Oni faasi gu we re berewe bara saba!’ Ko ki ru ki ya fu ngangarã akumba i vodi aSadaraka, Mesaka na Abedenego ki bafu yo ku we yo. Ono agu akumba nabafu yo re akpiki be mirãwe ni kina ipo ho i abafu yo ni koyo. Ono na agu aparanga i abafu yo ku we yo re ginipai namangi tipa yo?

Bakindo angere ku rogo we yo bakere gunde ki ziko. Ko asanahe ki ya: ‘Ati ani nivodi aparanga biata ki bafu yo ku rogo gi kere ngariangaria we yo re?’

Gako amoyambu ki karagaha fuko ki ya: ‘Ii, kinawo si nidu.’

Ko ki ya: ‘Ono mi nabi akumba biama i nita rogo we yo. I ni vodivodi yo te, na i agbingo be we te. Na gu biama boro du fuoyo ní wakina mbori.’ Bakindo ki gbisi koyo du gbigiwi ni ki poi kuari ki ya: ‘Sadaraka! Mesaka! Abedenego! Oni nga amoyambu nga ga gu Mbori nga Bahe kisusi, oni kuru!’

Ho i akuru ni rogo we yo, aboro abi gupai nga i agbingo wagu tooni te. Bakindo ki ya: ‘I sambuo gu Mbori nga ga Sadaraka, Mesaka, na Abedenego ko! Ko nikedi gako maraika ko batasiyo mbiko i niima ka ka iriso kura mbori.’

Ati bawene kpiapai du nga ga nye ni ruruse fu Yekova si aida ani pekefuoho?