Ga Mbori Aboro Akuru Babera Yo

AGARÃ ima manga awere wa ue fuo aParaso na aMadaio zi Babera. Ono mo bingo gupai namanga awere! AYisaraere nakura Babera yo. Da zaki gene fuyo? Da sa yo i ga?

Kurese du, nangia bakindo Parasa. Bakuru kusayo mbata fu i vungu Kurese, Yekova asa gako nebi nangia Yesaya ko kepai tipa ko ki ya: ‘Mo nika manga kina boro gupai mi akpinyemuhe. Angbadimo Babera nika nye foro ni kina zazaha tipa mo zi gu bakporo re.’ Na kina boro Kurese du nandu na abanzengere ka zio Babera. AMadaio na aParaso aye ku ­Babera yo yuru ki rimi koyo ti angbadimoho nga gu i ambuhe ambu ni zazaha.

Ono Yesaya aima pe gupai a nga Kurese nika zinahe fu aYisaraere i ga ka dua Yerusarema na gaha yekaru kubaha. Ya mo Kurese afu gu zinahe re? Ii. Gere nga gupai ko apehe fu aYisaraere: ‘Oni ndu awere ku Yerusarema yo ka dua gu yekaru nga ga Yekova, nga gaoni Mbori.’ Na gure nga gupai agi aYisaraere re aga ka mangaha.

Ono anga agu aYisaraere naadu Babera yo dunduko narengbe ka ndu gu gbanga nduge re ku Yerusarema yo te. Si angia bagbanga nduge nga ga akirometere 800 (amairo 500) na dungu aboro naima gbinza watadu naadu na wokote ka gene adunga wa ka i ndu gu nduge re ya. Kura nduapai kinaho a kura aboro ­aandunga ti ni ya. Ono Kurese aya fu agu aboro naandunga ya wẽ: ‘Oni fuku afeda na dahabu gbiati kura agamahe fu agu aboro nandu ka dua ­Yerusarema na gaha yekaru.’

Sidu, i afuku badungu ahe fu agi aYisaraere naandu ku Yerusarema yo re. Kurese afuku agu akora na ainga a fuyo Bakindo Nebukadenesara arogodihe rogo ga Yekova yekaru yo ho ko agbarasi Yerusarema ni. Aboro adu na badungu ahe beyo ka tindaha ku Yerusarema yo.

Fuo regbo wa adiwi biama, aYisaraere ada Yerusarema yo kina boro bangiri regbo yo. Si adi agarã nzunzu 70 fuo gbarasa Yerusarema. Ono wa aYisaraere avura ga ki da rogo gayo ringara, kpakaraapai kinaho naadu fuyo ku mbatayo, a wa ani ka bihe.