Wai Rengbe Mo ka Mbeda na Mbori?

1. Ya mo Mbori nadegatuko sa akparakpee dunduko?

Mbori nayamba ngbatunga aboro dunduko tipa i mbedi na ko rogo kparakpee yo. (Atambuahe 65:2) Wa vura duhe wo, ko adeganga tuko kuti akpee dunduko te. Nikpiapai, Mbori arengbanga ka dega tuko kuti gu kpee nga ga gu kumba namanga fu diako gbegberẽe te. (1 Petero 3:7) Berewe a, ti gu regbo aYisaraere anaamanga gupai naadu ni gbegberẽhe, Mbori anaadeganga tuko kuti gayo akpee te. Si tie ziazia nga, kparakpee nga pa momu. Wa vura duhe wo, Mbori rengbe arengba ka degatuko kuti agu akpee nga ga kere aboro ingapai ka i saberã yó.​—Mo gedi Yesaya 1:15; 55:7.

2. Si naida ani kpari wai?

Kparakpee nga papara gaani irisombori, sidu, si naida ani kpari sa fu kina Bakusirani nga Yekova. (Matayo 4:10; 6:9) Berewe a, wa duhe nga ani nga kpakpa aboro, si naida ani kpari ti rimo Yesu bambiko ko akpi tipa gaani ingaapai. (Yoane 14:6) Yekova aidanga ani naape kina bangisa kpee watadu kaa gedaha ageda rogo waraga kpee yo te. Ko naida ani pe kina boro gupai naye ngbaduraniyo.​—Mo gedi Matayo 6:7; AFiripoio 4:6, 7.

Bakusirani ima rengba a ka gia gu kpee ani apehe kukiri. (1 Samuere 1:12, 13) Ko nayamba rani ani kpari fuko ti aregbo dunduko, wa wiso na ti gu regbo ani andu kapi, ti regbo riahe, na ho ani agbiatirani ni na fudifudiapai.​—Mo gedi Atambuahe 55:22; Matayo 15:36.

3. Tipagine aKristano naadunguratiyo ti ni?

Taatapai ngaha ka mbeda na Mbori te, bambiko ani naraka dagba agu aboro adunga na idapase kuti Mbori ya, na i nabisirapa gako kidohe nga ga ye na zereda ku auru kpotosende ane. (2 Timoteo 3:1, 4; 2 Petero 3:3, 13) Si naida ani naagbia ngarasaro dedede be awirinarani na si naida ani ngarasiyo angarasa a.​—Mo gedi AEbere 10:24, 25.

Kodatise na agu aboro nakpinyemu Mbori naundo rani ani mbedi na Mbori. Agu adunguratise nga ga aDezire Yekova naundo rani ani gbia undo be gu idapase nga ga akuarani.​—Mo gedi ARomo 1:11, 12.

4. Wai rengbe mo ka mbeda na Mbori?

Mo rengbe ka mbeda na Mbori niberã mo kurii agu apai mo nawirikihe rogo Fugoko yo nga Ziazia Kekeapai. Mo berẽkurii gako mangapai, gako arugute, na gako akidohe. Kparakpee na berãkuriipai nasa rani ani duna tambuahe kpotoraniyo tipa ga Mbori nyemuse na tatamana.​—Mo gedi Yosua 1:8; Atambuahe 1:1-3.

Mo rengbe ka mbeda na Mbori kinagu ka si du nga mo nakido kutiko na kidu na idapase kutiko. Ono idapase wakina guhe naraka araka si aida i nirigihe ariga. Si naida mo rigi gamo idapase ariga niberã mo pa agu apai du mo na idapase mbikoho.​—Mo gedi Matayo 4:4; AEbere 11:1, 6.

5. Wai rengbe mo ka gbia undo ti mbeda na Mbori?

Yekova nangera angera fuo agu aboro nakpinyemuko. Ko ima rengba ka bandayo be gupai rengbe ka gberẽsapa gayo idapase na gayo maabangirise tipa nyenye unga. (Atambuahe 91:1, 2, 7-10) Ko naza rani ti ngbatunga gu raka rengbe ka gberesapa kpotorani na gaani ngbarago. Yekova nayugopai furani tipa ani raki wene raka.​—Mo gedi Atambuahe 73:27, 28; Yakoba 4:4, 8.