Agu Adunguratise Nanyakasa Aboro “Kuti Nyemuse na Wene Mangaapai”

TIPA dungu akama agarã, ga Yekova aboro aima digo nidunguratiyo ni mbakadimbakadi yo. Rogo gu ringara Yisaraere naadu mbata, akumba dunduko nanaandu ku Yerusarema yo tipa bakere apumbo biata. (Pa Rug. 16:16) Rogo bambata sa kama agarã, aKristano anaadunguratiyo dedede, gbe ku rogo akporo. (Frm. 1, 2) Areme, ani nagbia ngbarago ti adunguratise nga ga dungurati, kikindigi adunguratise nga ga uru sa bara ue gbiati ga aˈuru biata. Tipagine ga Mbori aboro naadunguratiyo ti ni? Bambata ndupai nga, si nga nyanyakipa papara gaani irisombori.​—Tam. 95:6; Koro. 3:16.

² Adunguratise nafu undo a fu agu aboro naye tipaha. Nibipa gu Pumbo Abasura nanaamanga tingbafuo agarã saba dunduko, i atingidi aYisaraere nga: “Oni dúngura aboro, akumba na ade na rukutu agude, na gaoni kungba aboro nga agu yo du kpuroni yo, i nigí he, ki niwiriki he, ki nigunde ti Yekova gaoni Mbori, ki niberẽ pa manga agu apai nga ga gi rugute re dunduko.” (Pa Rug. 31:12) Nirengo, gu nyanyaki ndupai i anaadunguratiyo tipaha angia Yekova ‘niyugupai fuyo.’ (Yes. 54:13) Adunguratise a nafu momu tipa aboro ini tiyo, i gbia ngarasaro, na kini nyakasi tiyo rogo kodatise na akurayo.

AGU ADUNGURATISE NGA GA DUNGURATI

³ Agu abawiriki nadunguratiyo ti rago Pendekote ku rogo ba sa rogo 33 F.B.K. akakuti gu yugopai nangia ga amokedi, na aˈuru dunduko “i ki nidu adu kina ku bani [sa] yekaru yo.” (Amo. 2:42, 46) Kusa, ho aKristano anaaye ni tipa irisombori, i anaageda Ziazia Kekeapai, kodihe na agu awaraga amokedi gbiati abawiriki anaakedaha. (1 Kor. 1:1, 2; Koro. 4:16; 1 Tesa. 1:1; Yak. 1:1) Regbo adu a kinaho tipa gu kparakpee nga ga dungurati. (Amo. 4:24-29; 20:36) Ti gu kura aregbo, amokedi anaapeka pa agu apai namangi fuyo gene tungusapai yo. (Amo. 11:5-18; 14:27, 28) I anaasakapai a tipa agu ayugopai nga ga Baibiri gbiati digisidigisi sangbaanebi. I anaafu arugute tipa gu mangaapai nga ga aKristano gbiati kakuti sinombori. I anaangarasa aKristano dunduko i du ni kakaka abatungusi wene pangbanga.​—Rom. 10:9, 10; 1 Kor. 11:23-26; 15:58; Ef. 5:1-33.

⁴ Ti gi gaani regbo re, agu adunguratise nga ga dungurati napekafuo kina gu kpiapai naadu ti rago amokedi re. Ani namangapai kuti gu zungodihe du rogo AEbere 10:24, 25: “Ani bérẽ pa akuarani . . . Ka ani hé nga dungura tirani na akuarani, wa du sino agu yo ya, ono ani rúgu akuarani aruga; ki nimangi he susi, wa bi oni he ya gu uru re si nambeda.” Rogo gi yangara areme du ni kerehe re, ani naida na gu ngarasaro naye be dunguratirani dedede tipa wa ka ani nyakasi tirani rogo toro yo na ki kakuti ruru mangapai. (Rom. 1:11, 12) Wangia ani aKristano, ani naraka dagba iraira rikaaboro nga airanyakarii. Ani ima mbu zanga sino Mbori gbiati gu nyemuapai nga ga zegino. (Frp. 2:15, 16; Tito 2:12-14) Nirengo, gini kura ba berewe duho ngba kisusi du dagba ga Yekova aboro? (Tam. 84:10) Na gini kurapai berewe duho rengbe ka undo kisusi gu nga wisigo Fugo Mbori na kini sakipai tipaha? Mo kparianga agu adunguratise dunduko i nasigiraha tipa gaani undo.

GU DUNGURATISE NGA GA DIGIDO POSO

⁵ Bambata papara gu dunguratise ninaamanga ti digido poso nga gumbapai du fu aboro dũ du mburuhe rii Baibiri, na kura aboro kinaho duhe fuyo ni bambata regbo i du pati ni. Gu gumbapai du fu aboro dũ re na nyanyakipaha mbiko si nambiisa agu azingo nga ga toro du vovo aboro na ni gbiati agu abatungusipai du rogo dungurati.​—Amo. 18:4; 19:9, 10.

⁶ Kristo Yesu, gako amokedi, gbiati agu aboro nanaakoda tiyo na yo anaamanga adunguratise fu aboro dũ kina wai agu adungurati nga ga ga Yekova aboro amangaha areme. Zanga kapa, bagumbapai ho naadu auru kpotosende wa Yesu te. Aboro aya tipa Yesu wẽ: “Boro agumba nga pai mbata wo te.” (Yo. 7:46) Yesu anaafura na pagbia, kina ngba agu aboro naadegatuyo fuko kini zere. (Mt. 7:28, 29) Dungu agu aboro naadi gako tungusapai kugume aima gbia undo ni bakerehe. (Mt. 13:16, 17) Amokedi apekefuo gako kpiapai. Rogo Amokedi 2:14-36, ani nagedapa gu nyanyaki gumbapai Petero amangihe ti rago Pendekote rogo gu garã nangia 33 F.B.K. Si afõngbadu akutu aboro yo i ki mangipai kuti gupai i agihe. Kusa, dungu aboro ada ni aidipase fuo degayo tuyo kuti gu gumbapai Pauro amangihe Atenai yo.​—Amo. 17:22-34.

⁷ Wakina gure a, amirioni aboro ima gbia undo areme ti agu agumbapai du tipa aboro dũ namanga rogo adungurati gbiati agu agumbapai namanga ba bakere dunguratise yo nga ga uru sa watadu ga aˈuru biata. Ngbatunga agu agumbapai re naundo rani ani rugutirani na agu ayugopai nga ga aKristano na ani mangisunge Kindo kakaka. Ka ani ayamba agu aboro du na nyemupai gbiati kura aboro, gure nga ani naundo dungu aboro i ini gu tonatona ayugopai nga ga Baibiri.

⁸ Agu agumbapai du tipa aboro dũ nafura tipa apai ni bakiakia. Agumbapai nafura tipa agu ayugopai nga ga Baibiri na sangbaanebi, gu bangua arengo nga ga Baibiri gbiati arugute tipa aborokporo na agu apai nabipa rogatise, agu akpakarapai paranga aboro agbiatiyo na ni na gu iriˈiri mangaapai nga ga aKristano. Gu kura agumbapai nafura tipa ga Yekova iˈiriwo kusikusiahe. Agu nafura tipa agu aboro du payo rogo Baibiri yo nangia wene kpiapai nga ga idapase, wingbaduse, na kakuti ruru mangapai rengbe ani ka wirikapai ti ni areme.

⁹ Tipa ka gbia undo wenengai ti agu agumbapai du fu aboro dũ, si ni nyanyakipa pai ani degeturani wenengai, nigbata agu averesi bagumbapai apepaha na kini pekefuo ko wa ko agedaha na kini sakipai tipaha. (Rk. 8:18) Fuo ruga ani tirani na gupai i nasakipai tipaha, ani rengbe ka kakuti agu apai ani nawirikihe na kini mangihe.​—1 Tesa. 5:21.

¹⁰ Ka dungu abagumbapai du kinaho, agumbapai nikaa manga rogo dungurati na aposo dunduko. Ti kura aregbo, i nayamba gu kura abagumbapai rogo agu adungurati du barambeda. Ka si du nga dungurati na dungu abagumbapai te, agumbapai mangingo dedede te, kinaho du rengba ni.

¹¹ Ue papara gu dunguratise du ti digido poso nga Wisigo Ngbaõbambu Sinziri, si nga gu sakapai nga ga asanahe na karagapai du mburuhe rii gu kekeapai du rogo gu Ngbaõbambu Sinziri du tipa wisigoho. Yekova nafu gu riahe nga ga toro furani vurube Ngbaõbambu Sinziri.

¹² Gu kekeapai du tipa wisigoho ninaafura gbe tipa wai ka mangapai kuti gu bangua arengo nga ga Baibiri rogo raka yo na aˈuru dũ. Si nanyakasa aKristano i bandatiyo be gu “[toro] nga ga zegino” gbiati bibiriko mangaapai. (1 Kor. 2:12) Vurube Ngbaõbambu Sinziri, si nafu vovo giarogopai furani nibipa agu ayugopai nga ga Baibiri gbiati sangbaanebi, na si nasarani ani ndu sa na gu vovo ayugopai nga ga Baibiri na ki nye ngba gu gene nga ga ruru aboro. (Tam. 97:11; Snz. 4:18) Du pati Wisigo Ngbaõbambu Sinziri na kini karagapai baha yo rengbe ka undo rani ani du na ga Yekova maabangirise tipa vovo zegino. (Rom. 12:12; 2 Pet. 3:13) Gaani kodatise nga ga awirina naundo rani ani sonosi azuzu toro na kini nyakasi rani ani du na nyemu mangasunge fu Yekova kakaka. (Gara. 5:22, 23) Si nanyakasa rani ani hi asada na ki undo rani ani gbata gu ‘wene nyanyakihe sa gu rago nika ye yo’ wa ka ani “nye anye na gu unga nga ndikidi unga.”​—1 Tim. 6:19; 1 Pet. 1:6, 7.

¹³ Ginipai rengbe ani ka mangaha tipa ka gbia bakere undo ti gi riahe nga ga toro re? Si naida ani mbakadi gu wirikapai re mbata fu regbo, singia ni sarani watadu wa aborokporo, ki gedi agu averesi du rogoho, na ti regbo adunguratise ani kini karagapai kina boro ngbaduraniyo. Gere nika sa gupai nga rengo rimi ku ngbaduraniyo, na kura aboro ki gbia undo ti gia gaani akaragapai nga ga idapase. Ka ani adegaturani wenengai kuti agu akaragapai aboro afuhe, ani nikaa gbia undo ti gu wirikapai re na aposo dunduko.

GU DUNGURATISE NGA GA BEBERE POSO

¹⁴ Rogo aposo ni basasa, dungurati naye ku Bambu Kindo yo tipa gu mbakadapai nga ga Gaani Raka Nga ga AKristano na Gaani Sunge. Gi dunguratise du na paparaha biata re, i mbakadihe si undo rani wa ka ani “rengbe na gi sunge re” wa abamangisunge fu Mbori. (2 Kor. 3:5, 6) Gu mbakadapai du tipaha gbiati agu apai ani ka wirikaha nikaa kura na adiwi dunduko rogo Gaani Raka Nga ga AKristano na Gaani Sunge. Gu Waraga Dunguratise Nga ga Gaani Raka na Sunge a na akpia wai ka tungusapai rogoho.

¹⁵ Bambata papara gi dunguratise re nga Aũkumuko Rogo Fugo Mbori Yo, si nika undo rani ani inidi tirani na agu apangbanga nga ga Baibiri na ani ini wai ka mangapai na ni rogo gaani raka yo. Gi dunguratise re nakoda gumbapai, gedapai, na sakapai du mburuhe rii gu geda Baibiri nga ga poso. Agu avidio na asura (photo) gbiati agu agumbapai naundo rani ani rugutirani wenengai na agu apai re gu du rogo Waraga Dunguratise Nga ga Gaani Raka na Gaani Sunge. Gi dudunguro wisigo Baibiri re naundo rani ni basasa rogo gaani raka yo gbiati gaani yugopai, tipa wa ka “aũ manga wene apai dunduko [du berani].”​—2 Tim. 3:16, 17.

¹⁶ Gu ue papara dunguratise nga, Mo fu Tiro Sa Sunge Tungusapai, si tipa ka fu momu fu aboro dunduko tipa i mbakaditiyo tipa tungusapai, na ki mbakadi gayo abirĩ tungusapai gbiati yugopai. Kupati gu sunge nga ga agude sukuru, avidio a kina rogoho du na kpia wai ka tungusapai. Gi papara dunguratise re naundo rani ani du na ‘mirãse wa ga aguyo i ayugupai fuyo’ wa ka ani ‘ini waĩ ka songoda [karagapai] gu ni nambu ni wene fugo.’​—Yes. 50:4.

¹⁷ Gu biata paparaha nga Raka ni AKristano, nasakapai tipa wai rengbe ani ka mangapai kuti gu bangua arengo nga ga Baibiri rogo gaani raka yo na aˈuru dunduko. (Tam. 119:105) Gu kura nyanyakipa papara gi dunguratise re nga gu Wisigo Ziazia Kekeapai Nga ga Dungurati. Ani namangaha wakina Wisigo Ngbaõbambu Sinziri, si nga gu sakapai nga ga sanahe na karagapai.

¹⁸ Rogo adiwi dunduko ho Waraga Dunguratise Nga ga Gaani Raka na Gaani Sunge ada ni, barii gu rondo nga ga abaakumba watadu gu bakumba naundo ko, nangera riihe wenengai na ni ki mangi mbakadapai. Rogo aposo ni basasa, gu bakumba nga wene bayugupai nga gu ni gu rondo nga ga abaakumba nasia ni ni nadu ni basungu-rii-kiti nga ga dunguratise. Gako sunge nga ka bi gupai nga dunguratise tona ti regbo na ki nyasi bangiri regbo yo na ka fu tambuahe gbiati rugute fu agu agude sukuru nimangi agumbapai.

¹⁹ Ka ani ambakada adunguratise dedede, ni ye tipaha, na kini mangi agu asunge i afuhe furani rogo gu Dunguratise Nga ga Gaani Raka na Gaani Sunge, ani nagbia inohe rogo Ziazia Kekeapai, na ki rugutirani na abangua rengo nga ga Baibiri, na si nasarani ani tungusipai zaaza na kidu na inohe tipa ka sa aboro ni abawiriki. Agu aboro naye tipaha ata ziongo bapatiza ki da ni aDezire Yekova ya i nagbia undo ti gu wene kodatise gbiati gu wene asakapai nga ga toro nga gu nafu ngarasaro. Tipa ka undo rani ani mbakaditirani tipa gi dunguratise re gbiati agu akuraha, ani ima rengba ka mangasunge na, Watchtower Library, JW Library^®, Watchtower ONLINE LIBRARY^™ (ka si du nga si kina rogo fugoro yo), gbiati gu ba-abuku du Bambu Kindo yo. Gu ba-abuku nga ga Bambu Kindo na agu awaraga nga ga aDezire Yekova rogoho, wa gu nga, Watch Tower Publications Index watadu Research Guide for Jehovah’s Witnesses, kodihe na gu kura sasa afugo aBaibiri, agu awaraga nayugo bara apai, na gu kura abuku rengbe ka undo. Aboro dunduko du na rengo beyo tipa ka mangasunge na ni mbata fu dunguratise watadu ti ngbafuo ho.

DUNGURATISE TIPA SUNGE TUNGUSAPAI

²⁰ Ti aregbo ni bakiakia vuru poso yo, na ti digido aposo, abadona nga ga abatungusipai nadunguratiyo tipa guru regbo tipa gu dunguratise nga ga sunge tungusapai. I namanga agi adunguratise re dedede rogo akporo watadu agu aba daada. I ima rengba ka manga gu dunguratise re Bambu Kindo yo a. Padu na abadona nga ga tungusapai ni dunguhe rogo gu dagbarago nga ga tungusapai rengbe ka undo awirina i ye tipa gu dunguratise nga ga tungusapai rogo gayo dagbarago. Abatungusipai rengbe ka mbakadatiyo ni ipo na ki ndu ku rogo gu dagbarago nga ga tungusapai. Si rengbe ka mbugene a fu gu babiapai nangerakurii gu badona re ko ngerefuo agu awirina du ho wenengai. Wa vura duhe nga wene ndupai kinaho du ti mbu abadona si nimangi gaha dunguratise nga ga tungusapai ni bakiakia, gu kura apai ima rengba ka sa gupai nga dungu abadona dunguratihe ku rogo ba sa. Ni kpiapai, ka si du nga bebere poso kina bete abatungusipai naye tipa tungusapai, si angba gbe ka i kodi abadona watadu ka sa abadona dunduko i niye ku Bambu Kindo yo watadu ka dunguratiyo ku rogo gu kura wene ba. Rogo gi gene re, abatungusipai rengbe ka du na badiangbayo nga ga tungusapai. Dungurati ima rengba ka bihe a ni wenepai tipa ka dunguratiyo tipa tungusapai ti regbo aˈuru ongoda nga ga zegino ku Bambu Kindo yo. Watadu abadona ima rengba ka dunguratihe fuo Wisigo Ngbaõbambu Sinziri tipa gu dunguratise nga ga tungusapai.

²¹ Ka abadona mangi gaha dunguratise ni bakiakia, gu babiapai nangerakurii badona na nungusa gu dunguratise du tipa tungusapai. Ti gu kura aregbo, gu babiapai re ima rengbe ka fu gu sunge re fu dufuo ko watadu gu kura wirina naima rẽ ni nungusihe. Si naida banungusi he mbakadi gupai rengbe ko ka sakaha tipa si undo aboro gene tungusapai yo. Ko nakparaka aboro tipa tungusapai, na boro sa ki mangi kparakpee. Fuani, awirina ki ndu nibasa tipa tungusapai. Si naida gu dunguratise re du tipa aminiti bisue gbua watadu saba, ono ka sidu nga si mangi fuo gu dunguratise nga ga dungurati, si naida si du ni guruhe. Si naida gu dunguratise re ngarasi aboro, si du na kpia mangimangi pai rogoho, watadu rugapai fu agu aboro nandu ka tungusapai. Si naida vovo aboro watadu agu aboro naida na undo mangisunge na agu abatungusipai du na bakere inohe tipa wa ka i raba yo.

DUNGURATISE NGA GA VOVO DUNGURATI WATADU TOONI DUNGURATI

²² Wa dungu aboro ada ni abawiriki, bange adungurati nange kina kumbatayo a. Babi rimbasa du nahiiso gu fuomu du tipa sanahe tipa vovo dungurati. Ono tie, ti gu kura aregbo, si rengbe kadu ni wenehe fu tooni badona i nikoditiyo na gu dungurati du barambeda ho.

²³ Ti gu kura aregbo, tooni dungurati rengbe kadu na kina agu awirina rogoho nga adee. Ka pai du wa gure, gu wirina nga dee namanga kparakpee watadu na nungusa dunguratise rengbe ka mangaha na riri ni dadidadihe, ringbisihe kuti gu mbakadapai nga ga Ziazia Kekeapai. (1 Kor. 11:3-16) Dedede, si naida ri sungu rii ba kini ngere koyo du aboro ni. Agu awirina nga adee amanganga gu gumbapai du gbaiga ti regbo dunguratise te. Kuba gure, i nagedapai rogo agu awaraga riigbu nafuhe na kini fu karagapai watadu i rengbe ka sakapai tipaha watadu ka mangaha rogo yuguyugu kpiapai. Be-basunge rengbe ka sia wirina sa nga dee ri ngerekurii agu awaraga be-basunge akedaha fu dungurati na ri kini ngerefuo adunguratise. Fuo bete regbo kusa, ka wirina nga kumba rẽ tipa manga agu apai re, ri nambu agu atindiro re fuko.

BAKERE DUNGURATISE NGA GA URU SA

²⁴ Rogo agarã ni basasa, mbakadapai namanga tipa agu adungurati du rogo bangisa badona adungurati dunguratihe tipa ka manga bakere dunguratise nga ga uru sa. Gi bakere dunguratise re nafu momu fu aboro dunduko i ‘za ngbaduyo’ yo tipa gu kodatise nga ga aKristano. (2 Kor. 6:11-13) Wa duhe nga ga Yekova riigbu ima ino agu azingo du awirina na ni, si nambakada agu arii-apai du mburuhe ri Baibiri gbiati gu kura ambakadapai ni bakiakia. Agu ayugopai du yo i namangaha rogo agumbapai, ayugopai na akpiapai, afura nisase, gbiati sasana boro. Gi ngbatunga yugopai re nanyakasa agu aboro dunduko ye tipaha. Gi bakere dunguratise re a nafu momu fu vovo abawiriki i zi bapatiza tipa ka yugo gayo kparatise fu Yekova.

BAKERE DUNGURATISE NGA GA AˈURU BIATA

²⁵ Kikindigi adunguratise namanga bara sa rogo garã yo. Dedede, si nga gu bakere dunguratise nga ga aˈuru biata, nga gu nakoda adungurati rogo dungu badona nga ga adungurati. Si ni wenepai fu agu abe-basunge angenga gaha adungurati ya, agu adungurati re ye dũ tipa bakere dunguratise ku rogo bangisa ba. Rogo gu kura aringara, gu mbakadapai du tipa bakere adunguratise re ima rengba kadu kia ringbisihe kuti gu rugapai riigbu nafuhe. Ti gu kura aregbo, bakere dunguratise nga ga dungu aringara watadu kparakpara bakere dunguratise nga ga a′uru biata namanga rogo kura aringara na aDezire Yekova nga bawe akutu rogo kura aringara nandu tipaha. Tipa dungu agarã, dungu aboro aima ye ka wirikapai tipa gu wene pangbanga nga ga Kindo mbiko takapande gu bakere adunguratise nga ga aDezire Yekova.

²⁶ Tipa gu ga Yekova aboro naima kpara gayo raka fuko, bakere adunguratise nga ga aˈuru biata nga regbo kodatise rogo irisombori yo. Si nga gu regbo ani agia vovo sakarogopai yo tipa agu apai nga ga rengo. Pati gu kura bakere adunguratise nga ga aˈuru biata, vovo awaraga nakura rengbe boro ka wirikapai nisani rogoho watadu dungurati, gbiati mangasunge na ni gene tungusapai yo. Bakere adunguratise a nga regbo bapatiza. Si a na nyanyakipaha mbiko si naundo rani ani sono rogo toro yo. Si nafu gu goapai a nga ga Yekova aboro ima kpara gayo raka fuko nzunzu ni kodikodi yo rogo zegino dunduko na kini yugu yo nzunzu ni ga Yesu Kristo abawiriki.​—Yo. 13:35.

²⁷ Ho ani aye ni tipa adunguratise nga ga dungurati gbiati bakere dunguratise nga ga uru sa watadu gu nga ga aˈuru biata, ani nanyakasa tirani tipa ka manga gupai Yekova akpinyemuhe. Gure a nabanda gaani idapase nga ga aKristano be gu gbegberẽ maapai kurii nga ga gi zegino re. Ngbatunga agu adunguratise du wa gure dunduko nafu taarimo fu Yekova. (Tam. 35:18; Snz. 14:28) Si naida ani du na tambuahe nga Yekova ima fu ngbatunga ambakadapai wa gure tipa si ni zambuasi agu aboro kparatiyo fuko rogo toro yo rogo gi yangara arame re.

GA GBIA RIAHE NGA GA NYEMU

²⁸ Bara sa rogo garã yo rogo gu uru Yesu akpi ti ni, adungurati dunduko nga ga aDezire Yekova rogo zegino namanga Tingida Pakpio Yesu watadu ga Gbia Riahe Nga ga Nyemu. (1 Kor. 11:20, 23, 24) Gere nga nyanyakipa dunguratise rogo garã yo fu ga Yekova aboro. Baibiri nazinahe furani tipa ani mangi Tingida Pakpio Yesu.​—Rk. 22:19.

²⁹ Uru Tingida Pakpio Yesu nandu sa na gu uru nangia ga Pumbo Susiri kina wai du he rogo Ziazia Kekeapai. (Gate 12:2, 6; Mt. 26:17, 20, 26) AYisaraere anaamanga Pumbo Susiri bara sa rogo garã yo ka tingidapa kura yo ringara Ezipeta yo rogo gu garã nangia 1513 M.B.K. Ti gu regbo re, Yekova asia 14 uru nga ga gayo bambata diwi ni gu uru si aaida i ri kandoro Pumbo Susiri na ki guari be sunge kanga Ezipeta yo. (Gate 12:1-51) Tipa ka ino gu uru re, i natona geda arame 13 tona ho fogo diwi akura ni gbiati gu uru du baima yuru na uru kina sa Yerusarema yo. Dedede, Tingida Pakpio Yesu namanga ti gu regbo kpakpu diwi akura naabaha na rogo gu uru baima uru na yuru adu kina sa.

³⁰ Matayo 26:26-28 napepa wai afugo Yesu ayugo wai si aida Tingidapa kpioko mangi. Anga si gbua nga gu kungbo mangapai nga ga pambori te, ono gu ndikidi riahe agu aboro i nayambu yo i du ni abazogo na Yesu Kristo rogo gu Kindo du ngbangbaturũ yo arihe. (Rk. 22:28-30) Agu aKristano dunduko kpara gayo raka fu Mbori kodihe na agu aboro du na nyemu rengo, i nangarasa yo i ye tipa ga Gbia Riahe ni adu pati pai. Ho i aye ni kupati ni, i nayugo gayo tambuahe tipa gu gamahe Yekova Mbori afuhe tipa aboro dunduko gbia undo ti ni vurube Yesu Kristo. Mbata fu Tingidapa Pakpio Yesu, i namanga kparakpara gumbapai nga gu nika ba nyemupai ti aboro na ki ba nyemu wisigo Ziazia Kekeapai tiyo a.

³¹ ADezire Yekova naangera kumbatayo na ngbarago tipa agu aregbo i adunguratiyo ku rogo ba sa tipa adunguratise, si nga gu ba “ani [aberãpa] akuarani ka nyakasa yo kuti nyemuse na wene mangaapai” rogoho. (Eb. 10:24) Ruru kangara moyambu namaabangiriyo nyanyaki tipa ka mbakada ngbatunga agu adunguratise re tipa gaani zingo nga ga toro. Ga Yekova amoyambu dũ kodihe na agu aboro du na nyemu rengo i angarasa yo i bi gi mbakadapai re na nyanyakipaha na kini ye tipa agu adunguratise re dedede. Ho ga Mbori amoyambu ayugo gayo bakere tambuahe ni ngbaduyo yo tipa agu agamahe Yekova afuhe rogo gako riigbu, i nadu na kodatise. Gu nyakipaha anyaka gbe nga, ani na sambuo Yekova na kini fu taarimo fuko.​—Tam. 111:1.