BISUE PAPARAHA

Mo Karagatiro fuo ‘Babanda Mbisimoro’

Ya mo mo agbianga tiro na ngbatunga apai wagu fura ani tipaha rogo gi burosua re? Ka si du wo, mo ni saro te. Dungu gu ga Mbori amoyambu naadu mbata na aguyo du awere, aima gbiatiyo na ngbatunga gi kpakaraapai re. A wa Yekova aundo yo i dibe agi akpakarapai re, ko nika undo ro kinawo a.

Yekova nika undo ro aundo wa mo nika karagatiro fuoko

SI NAIDA mo du na gu kido nga Yekova ti aregbo dũ tipa ka undo ro wa mo nika karagatiro fuoko. Ko nika undo ro mo dibe bakabangirise, gbegberẽ sangbakpotoseyo, na mo ki gbia zereda berãroyo na ngbaduroyo mbiko du mo na gigiri sangbakpotoseyo. Mo ima rengba ka gbia ome berewe ka iriso Yekova wa sa na airisiko. Gupai du tipa ro wakina ga gu bete aKristano naadu rogo bambata sa kama agarã, nga aguyo gu mokedi nangia Petero akepai tipa yo ki ya: “Oni angbuo angbuo wa akandoro, ono awere oni yega koyo du gu ko ni nga Babanda mbisimoroni, nga gaoni Barumbatayo.”—1 Petero 2:25.

Karagatise fuo Yekova nga gu yangara wenepai rengbe mo ka mangaha. Tipagine? Mo nika fu ngbarago ku kpoto Yekova yo. (Asanza 27:11) A wa ini mo ho, rago naagberã agberã ti Yekova ho ani amanga agu apai ni angbanga tiko ya, ono ko nagbia ngbarago ho ani amanga wenepai ni. Ono tie, Yekova aziongo rani ngbaome ani kpinyemuko na kini mangisunge fuko te. (Pa Fu Rugute ni Ue he 30:19, 20) Wene bawiriki Ziazia Kekeapai sa afura wa gere: “Boro ho rengbe ka zaka ngbaduroyo foro te, kina ro si aida mo mangihe nitiro.” Ho ani airiso Yekova ni mbiko gu bakere nyemuse du ngbaduraniyo, gure nga ani nazakaha. Ho ani airiso Yekova ni mbiko nyemuse na ki nye ni rururani fuko, gure nga ani nafu nyanyakipa gamahe fuko nga gu nafu bakere ngbarago ku kpotokoyo. Nirengo, he ho ka ani ringbisihe na gu ngbarago ani agbiaha ho ani afu gu iriso ni fu Yekova rẽ ko na ni te.—Amokedi 20:35; Yugoti 4:11.

Awirina rogo dungurati nadia gu wirina kugume nazere rogo toro yo

Kurigure, ho mo nika tona irisombori ni berewe, mo nika mbiisa gu gamo azingo nga ga toro. (Matayo 5:3) Rogo gini gene? Dungu aboro rogo zegino nabakabangiriyo nga, ‘Tipagine du ani ti ni auru kpotosende ane?’ I nagbata akaragapai kuti agu asanahe du tipa raka. Wa duhe nga Yekova akusi aboro na nyemu gupai nga i raki nyeanye kindi, si du du yo na nyemu ka inopai tipa raka ti ni. Ko akusi rani ani naagbia ngbarago agbia rogo mangasunge fuko. Ngbarago ho rengbe ani ka gbiaha susi gu nga ino ani gupai nga ani nairiso Yekova mbiko gu nyemuse du ani na ni tipa ko te.—Atambuahe 63:1-5.

Si naida mo ini gupai nga Yekova naida mo karagatiro fuoko. Wai rengbe mo ka ino gipai re? Mo bingo gipai re: Ani amangi bakere kparakpee tipa ka ke gi burosua re. Si rengbe kadu nga bakumba watadu kura wirina naye na ni foro. Ngbaduroyo kini fõ ro mo gedihe na mo ki mangipai kuti gupai du rogoho. Agi apai re dunduko nayugo gupai nga bangiri Yekova agonga tiro te. Ko nagbe ro koyo du ko ni zezeredi.—Yoane 6:44.

Pa ino ani gupai nga bangiri Yekova agonga ti gu gako amoyambu ingi te nafu wasa afu furani. Gure nga gupai nangba ti gu wirina du rimori nga Donna. Ri aya: “Mi atona ka bitikpa ti rengo yeeye, ono mi anaaberã dedede kurii agu afugo du rogo Atambuahe 139:23, 24, nga gu naya: ‘Ako Mbori, mo wísigi pa re, ki ini pa kpotore yo! Mo asádi re, ki ini gimi berã pa apai! Mo ki bi he, si ngia gene gbegberẽpai rogo re yo, ki ngbe ku mbata yo fere ngba nyenye gene!’ Mi aima ino gupai nga bare aadunga zegiyo te, mi aarẽnga yo te, na mi aima ino gupai nga si naida mi du kina rogo ga Yekova riigbu. Mi atona ka bihe nga Yekova aambunga re te; mi du si aaida gupai nga mi karagatire fuoko. Na mi na bakere ngbarago nga mi ima mangaha wo!”

“Mi atona ka bihe nga Yekova aambunga re te; mi du si aaida gupai nga mi karagatire fuoko”

Ani namaa ro rogo gaani kpee yo nga mo gbia “ga Yekova ngbarago” agbia berewe. (Nemaya 8:10) Mo abiranga tiro mbiko karaga mo tiro fuo Yekova te.

Akaragapai Kuti agu Asanahe Du Tipa Karagatise fuo Yekova

MI NIKA TONAHA WARI?

Gu boro ima na kaza, si nadia ni adia na regbo tipa ní tona kaa mangaapai berewe. Wakina gure a, mo rengbe ka tona gbia ome rogo toro yo berewe ni asada mo kaa ri gu riahe nga ga toro rukutu na aˈuru dũ. Ka mo bingoho nga si naida mo mangi apai dunduko ti bangisa regbo ya. Mo ima rengba ka dia bete aminiti ka geda Ziazia Kekeapai watadu gaani awaraga. Na berewe, mo ki asadi kaa ndu tipa adunguratise. Gu susi gbe nga, mo kpari fu Yekova na ki sanako tipa gako undo. “Oni bá agu apai nafuda roni ku auru ko yo; mbiko ko naberã pa roni.”—1 Petero 5:7.

Wirina du rimori nga Eeva aya: “Fuo zera mi rogo toro yo, kina zee naamanga re ka kpara fu Yekova. Ho mi agbia ngarã ni ka kparakpee, bakumba sa rogo gaani dungurati aye ka bi re. Ko aundo re mi ini gupai nga Yekova aambunga re te. Gu bakumba re agumba gupai fere nga si naida mi tonaha na geda Ziazia Kekeapai na aˈuru dũ. Ho mi amangi gipai re ni, si afu ome fere mi tona nduge tipa adunguratise berewe. Fuo bete regbo, mi atona ka tungusapai berewe. Mi na bakere ngbarago nga Yekova aambunga re te.”

YA MO DUNGURATI ADIA RE KUGUME?

Si naida mo du na gu kido nga agu aboro du rogo dungurati nika diaro kugume na ngbarago. Kuba gupai nga i naabisira paro na kini biro kindi nga gbegberẽ boro, i nika yugo gayo nyemuse foro na ki mangi gupai rengbe yo ka mangaha tipa ka ngarãsaro.—AEbere 10:24, 25.

Wirina du rimoko nga Javier aya: “Zee aamanga re ni kerehe tipa ka ndu ku Bambu Kindo yo. Mi aabakabangire singia abakureami adia re kugume. Kura sosono wirina sa ni dee adi re kugume na gu fugo nga, ‘Wene yego foro Wire.’ Gi wirina re aima ino re agarã 30 kusayo mbata fu zera mi. Gipai re aima zio ngbadureyo nirengo. Mi aima yego nirengo ku kporo.”

Wirina du rimoko nga Marco aya: “Mi andu ku Bambu Kindo yo ki sungu kina boro sayo tipa ka boro iningo re ya. Ono tie, badungu aboro naima ino re. I adi re kugume na ki dungo re ni nunga nga gu nasa re mi gbia bakere zereda. Si adu wa mi amerẽ kini ka yego berewe ku kporo.”

WAI ABAAKUMBA NIKA UNDO RE?

Abaakumba nika mangapai na mo rogo weneringise yo. I nika tambua ro atambua tipa gu nyemupai du mo na ni ka karaga “ga bambata nyemuse.” (Yugoti 2:4) I nika undo ro rogo nunga yo mo mangi ariapai ti agu aingapai mo amangihe, na i nika manga wo “ni zera.” (AGaratio 6:1; Asanza 28:13) Abaakumba ima rengba ka manga mbakadapai tipa boro wiriki gu buku nga “Oni Bánda Tironi Rogo ga Mbori Nyemuse Yo” na mo. Mo du na gu kido nga abaakumba nika fu wasa foro na ki songodi ro rogo apai dunduko.—Yesaya 32:1, 2.

Wirina du rimoko nga Victor aya: “Vuru agu agarã 8 mi azere rogo toro yo, abaakumba anaagbata re agbata kindi. Rogo kura uru, kura bakumba ayugu agu asura fere ani adihe na ko. Agi asura re atingidi re na pa gu weneapai naadu ti gu regbo re, si ki sare mi tona ka berãpa gu ngbarago mi anaagbiaha ho mi aamangasunge ni fu Yekova. Abaakumba aundo re rogo nyemuse yo mi tona manga agu apai nga ga toro berewe.”

‘Ko Anyakasa Ro’

Gaani bukubia nga, Ani Bibia fu Yekova, si na badungu abia rogoho nga gu rengbe ka fu wasa foro na ki ngarãsiro wa mo nika tona manga agu apai nga ga toro berewe. Ni kpiapai, mo bingo afugo gu bia nga namba 60. Mburuhe rii agu afugo du rogo 1 Petero 5:10, bangua rii gu bia re nga “Ko Anyakasa Ro.”

Ndupai adu kinaho Yekova aye

Na rengo foro mo ki inihe.

Kpotoroyo, ko abi nyemu gbata ko

Na nyemu manga gako rurupai.

Mo akido ko ka manga pako;

Ko ki undo ro nisongodi ro.
Mbori afu wene bangisa Wiriko;

Ko naida wenepai tipa ro.

Wa ko akpinyemu ro ki fu Wiriko,

Ko nika fu ome afu foro.

Bangiriko agonga wa sa te;

Ti ga idapase na nyemuse.

(KOROSI)

Kure Yesu nangbe ro, mo nga ga Mbori ní.

Ko anyakasa ro, na ki ngarãsi ro.

Ko nika ngerafuoro, na kini banda ro.

Ko anyakasa ro, na ki ngarãsi ro.