Yekova Amangipai na Yona ni Zerangbaduse

Aboro aima du ni kere gbegberẽyo rogo gu ga aAsuro gbata nangia Nineve. Yekova agumba gupai fu gu gako nebi nangia Yona nga, ko ndu ku Nineve yo ka fu gu zahe fuyo nga si naida i aria gayo gene raka. Ono Yona aoro ku rogo gu kura gbata kia. Ko arimi ku rogo gu bakurungba naandu ku Tarusisa yo.

Ho gu bakurungba re adu ni bangiri baime, kere bavugumo atona ka manga, na si ki sa abagbe kurungba i du na gunde. I akpari fu gayo ambori na ki sanahe nga: ‘Tipagine gipai re amanga rani ti ni?’ Niyangaraha, Yona ape gupai fuyo nga: ‘Mi du si aida i bira re. Mi naora be gupai Yekova aya fere mi mangihe. Oni ba re ku baime yo, na bavugumo nika ruaru.’ Agu abagbe kurungba re aaidanga ka ba Yona te, ono ko aka kindi kuti gupai nga i ba ko. Ho i aba ko ni ku ime yo, bavugumo aru.

Yona aberẽhe tigako nga ko nika kpi akpi. Ho ko aarindo ni ku ime yo, ko akpari fu Yekova. Fuoho, Yekova akedi bakiki tĩo, u mbiri Yona, ono ka ko akpingo ya. Ho Yona adu ni vuru tĩo yo ko akpari nga: ‘Mi kidohe kaa giasangba ro ti aregbo dũ.’ Yekova abanda Yona vuru tĩo yo tipa arame biata na ki sa gu tĩo re u suku Yona ku auru ugu sende.

Wa duhe nga Yekova aima banda Yona, ya mo gure aayugo gupai nga ka ko ndunga ku Nineve yo berewe ya? Wagusa te. Yekova ape gupai fu Yona nga ko ndu berewe koyo. Bara gere, Yona agisangba Yekova. Ko andu koyo na ki pe gupai fu gu gbegberẽ aboro naadu yo nga: ‘Fuo arame 40, i nika gbarasa Nineve.’ Sidu, pai amangi nga gu boro aaberãnga paha ya​—aboro Nineve adegetuyo na ki aria gayo gene raka. Bakindo Nineve ape gupai fu aboro nga: ‘Oni kpari fu Mbori, na ki sa berãroni. Da inihe singia ko agbarasanga rani te.’ Ho Yekova abihe ni nga aboro Nineve ima sa berãyo, ko aagbarasanga Nineve te.

Rago agberẽ ti Yona nga i aagbarasanga Nineve te. Mo berẽnga kurii gipai re: Yekova amangipai na zerangbaduse gbiati inapai fu Yona, ono Yona aadunga na inapai fu aboro Nineve te. Kuba gure, Yona akuru kusayo ti gbata ki sungu tii nzereme nagbanga na kaa erã. Fuani, gu nagbanga re augu kusayo na Yona kidu na bakere zinga. Sidu, Yekova ape gupai fuko nga: ‘Mo naberãpa gi nagbanga re kisusi pa aboro Nineve. Mi ayugu inapai fuyo na i ki bati.’ Ginipai ko aaida ka yugoho? Aboro Nineve payo anyaki kisusi pa nagbanga.