Waigu Agu Adunguratise Nga ga ADezire Yekova Narengbe ka Undo Ro?

Ya mo i ayambu ngo ro tipa agu adunguratise nga ga Adezire Yekova? Ka si du nga mo ata dunga pa ti ni te, mo ima rengba kaa gunde tipa ka ndu ku pa ti ni ti bambata regbo. Mo ima rengba kaa bakabangiro nga: ‘Ginipai namanga ti regbo agu adunguratise re? Tipagine duhe ti ni na nyanyakipaha? Tipagine si aida mi du ti ni pa ti ni?’ Rogo gi wirikapai re, mo nika wirika wai padu mo pati adunguratise na kura aboro narengbe ka mbedisa ro na Mbori na ki undo ro nitiro.

1. Gini bangua ndupai duho ani adunguratirani ti ni ku rogo ba sa?

Mo bingo wai bake Baibiri sa apepa gu nyanyaki ndupai duho tipa dungura ani tirani na akuarani: ‘Mi asámbua Yekova dagba arika rimbasa aboro yo.’ (Atambuahe 26:12) Wakina gure a, aDezire Yekova nagbia bakere ngbarago ti dunguratiyo ku rogo ba sa. Rogo zegino dunduko, i naadunguratiyo na aposo dunduko kaa taasarimo Mbori, kaa bibia na kini mangi kparakpee. Vuru agarã yo dunduko, i naamanga kikindigi adunguratise nga ga irisombori.

2. Ginipai mo nika wirikaha ti regbo gaani adunguratise?

Ti regbo adunguratise, ani naagbeberã rani kuti Fugo Mbori, ‘kini yugu paha.’ (Mo gedi Nemaya 8:8.) Ti regbo gaani adunguratise, mo nika wirikapai tipa Yekova gbiati gako wene asino. Wa mo nikaa wirika badungu apai tipa gako nyemuse foro, mo nika mbeda na ko gbe. Mo nika bi wai a ko narengbe ka undo ro mo raki gu raka du ni wenehe.—Yesaya 48:17, 18.

3. Waigu rengbe mo ka gbia undo ti koda mo tiro na kura aboro ti regbo gaani adunguratise?

Yekova naya furani we, ‘ani bérẽ pa akuarani ka nyakasa yo kuti nyemuse na wene mangaapai. Ka ani hé nga dungura tirani na akuarani’ ya. (AEbere 10:24, 25) Ti regbo gaani adunguratise, mo nika gbia agu aboro nga aguyo naberãpa akura yo aberã nzunzu, na nga aguyo du wakina ro na nyemu ka wirika dungu apai tipa Mbori. Mo nika giayo i nifura tipa gu wene aberãpai nga ga ngarasaro du rogo Baibiri yo. (Mo gedi ARomo 1:11, 12.) Mo nika du a na momu ka fura na agu aboro namangapai kini dibe agu akpakarapai abakuparanga agbiatiyo na ni watadu arogotise. Gere nga gu bete nduapai Yekova aida gupai ti ni nga ani nidungura tirani ku rogo ba sa dedede!

MO WIRIKI KURA DUNGU APAI

4. Agu adunguratise nga ga aDezire Yekova

Rogo bambata sa kama agarã, aKristano anaadunguratiyo dedede kaa iriso Yekova. (ARomo 16:3-5) Mo gedi AKorosaio 3:16, na tifuoho, mo ki sakipai tipa gi sanahe re:

• Waigu agu aKristano naadu mbata anaairiso Yekova?

VIDIO: Ginipai Ninaamanga Bambu Kindo Yo? (2:12)

• Gini awiratise mo abihe dagba agu apai namanga Bambu Kindo yo na gupai mo agedaha ane rogo AKorosaio 3:16?

• Rogo gu vidio re watadu gu sura re, ya mo mo nibingo gupai yo nga gu rengbe ka ngba tiro ti regbo adunguratise?

Mo gedi 2 AKorindo 9:7, na tifuoho, mo ki sakipai tipa gi sanahe re:

• Tipagine aDezire Yekova aroganga marã ti ni ti regbo gayo adunguratise ya?

Oni wisigi gupai kina sa na gamo bayugu Baibiri nga gu nika manga ti regbo gu dunguratise du rogo gi poso re.

• Gini papara dunguratise mo aberãha nga si nika ngba gbe tiro watadu mo nika gbia undo ti ni?

Ya mo mo iningo gipai re?

Rogo jw.org, mo ima rengba ka gbia gu ba na gu regbo adunguratise amanga ti ni rogo zegino dunduko.

1. A. Gaani adunguratise nakoda gumbapai, mangimangi kpiapai, na avidio. Adunguratise naatona na kini digi na bia gbiati kparakpee

2. B. Ti regbo kura apapara dunguratise, i naasana agu aboro du pati ni i fuku akaragapai

3. D. Aboro dunduko i adiayo kugume—aborokporo, abakuparanga, sosono aboro, gbiati agude

4. E. I atumongo tipa gaani adunguratise te. ADezire Yekova aroganga marã be aboro watadu kaa ta na kurungbu ba gamahe te

5. Si naida boro mangi ome amanga kaa ndu tipa adunguratise

Mo berẽnga kurii gupai nadu tipa ga Yesu aborokporo. Tipa i nindu tipa gu dunguratise naamanga na agarã dunduko, i anaandu ni nduyo tipa amairo 60 rogo agu agene naadu na agangara tona Nazareta yo ki da ku Yerusarema yo. Mo gedi Ruka 2:39-42, na tifuoho, mo ki sakipai tipa agi asanahe re:

• Ya mo mo nabihe nga si anaaida i mangi ome amanga ka ndu gi nunguro re ku Yerusarema yo?

• Tipagine mo abihe ti ni nga si naida mo mangi ome amanga kaa ndu tipa adunguratise?

• Ya mo mo nabihe nga si ni wenepai mo naamanga ome kaa ndu tipa adunguratise apai ki vura du vurũ ni kpakarakpa- karaha? Tipagine mo abihe ti ni wo?

• Tipagine si aida ani nidu ti ni pati adunguratise dedede?

GINIPAI MO NAWIRIKIHE?

Ndu tipa adunguratise nika undo ro mo wiriki dungu apai tipa Yekova, na ki kiisi gamo pabakure na ko, na kini irisiko na kura aboro.

Fugöpai

• Tipagine Yekova angarasa rani ti ni ani nidungura tirani ku rogo ba sa?

• Ginipai mo nika wirikaha ti regbo agu adunguratise nga ga aDezire Yekova?

• Gini kura gene berewe mo abihe nga mo rengbe ka gbia undo ti ni ti du pati adunguratise?

MO WETEKE GU KURA APAI

Na ka si du nga zee namanga ro amanga ka ndu tipa adunguratise? Mo bingo wai gu kumba kina gu bangisapai re adu tipa ko aye ka kpinyemu adunguratise.

Bangirani Agonga ti gu Sene re Te (4:16)

Mo bingo wai paranga kumba agbia ngbarago ti adunguratise na gupai ko amangihe tipa kaa ndu kindi tipa ha.

Mi Ima Kpinyemu Adunguratise ni Bakerehe Gbe! (4:33)

Mo bingo wai kura aboro abi nduge tipa adunguratise.

“Tipagine Si Aida Mo Naandu ti ni Tipa Adunguratise Bambu Kindo Yo?” (Gu kekeapai du rogo gaani bangiriba nga ga Internet)

Mo bingo wai gu raka nangia ga kere boro zuu aˈaria tihe tifuo ko tona nduge tipa ga aDezire Yekova adunguratise.

“Mi Anaandunga ku Rogo ai Ba Zanga gi Bundu Te” (Ngbaõbambu Sinziri, Bamburu 1, 2014)