WIRIKAPAI 46
Tipagine si Aida ti ni Boro Mangi Kparatise na ki Zi Bapatiza?
Mo nakpara tiro fu Yekova ni manga mo kidohe fuko rogo kparakpee yo nga mo nikaa iriso kina ko sa na ki nimoi gupai ko akpinyemuhe ni bambatapai rogo gamo raka yo. (Atambuahe 40:8) Tifuoho tie, mo ki zi bapatiza. Ni manga mo ho wo, mo nayugo gupai fu kura aboro nga mo ima manga kparatise. Gu diaberã nga ka kpara tirani fu Yekova nga gu nyanyaki pa diaberã rengbe ani ka mangaha rogo gaani raka yo. Ginipai rengbe ka fõ ngbaduroyo mo mangi gu nyanyakipa diaberã nga gu rengbe ka aria gamo raka re?
1. Ginipai nafõ ngbadu boro yo nimangi kparatise?
Nyemuse du nafõ rani ani kpara tirani fu Yekova. (1 Yoane 4:10, 19) Baibiri nazungadi rani nga: ‘Mo kpi nyemu Gbia nga ga Mbori kpotoro yo dunduko, na mbisimoro dũ, na ga berã dũ, na omero dũ.’ (Marako 12:30) Ani nayugo gupai nga ani ima kpinyemu Mbori angianga na kina agu apai ani apehe sa ya ono na agu apai ani amangaha a. Kina wai agu aboro naima kpinyemu tiyo na ninaamanga rogatise sidu, gaani nyemuse tipa Yekova nafõ rani a ani kpara gaani raka fu ko na ki zi bapatiza.
2. Gini amaku Yekova afuhe fu gu gako aDezire naima zio bapatiza?
Ho mo azio bapatiza ni, mo nika da ni papara gu ga Yekova aborokporo du na ngbarago. Mo nika bi gako nyemuse tipa ro ngba dungu agene, na mo nika mbeda na ko gbe kisusi wai mo nambedi na ko ti gi regbo re. (Mo gedi Maraki 3:16-18.) Kurii gu nga ga du na Yekova ni Bamo, mo nika du na agu aborokporo nga ga toro yo nga awirina rogo zegino dunduko nga aguyo kpinyemu ko na ki kpinyemu ro a. (Mo gedi Marako 10:29, 30.) Rengo nga ha nga, kura adiandue kinaho du wa ka mo mangihe mbata fu mo zi bapatiza. Si naida mo wirikipai tipa Yekova, ki kpinyemu ko, na ki du na idapase kuti Wiriko. Ni yangaraha tie, mo du wa ka mo kpara gamo raka fu Yekova. Ka mo mangi agu adiandue re na ki zi bapatiza, mo nika du ngba gu gene nga ga gbia ngbarago ti raka nyeanye kindi. Fugo Mbori nape gupai nga: Bapatiza ‘nga gu he nabatasa roni.’—1 Petero 3:21.
MO WIRIKI KURA DUNGU APAI
Mo wisigingo ndu gupai du he ti ni ni nyanyakipa pai foro mo mangi kparatise fu Yekova na ki zi bapatiza.
3. Ani dunduko du wa ka ani sia gu boro ani nika iriso ni
Rogo gu ringara aYisaraere nadumbata, bete gu kura aboro aberẽ gupai nga i ima rengba ki ta iriso Yekova na kini irisi gu ziree mbori nangia Bara. Ono Yekova akedi gu gako nebi nangia Eriya tipa ko rugusi gu iraira berãpai re. Mo gedi 1 Abakindo 18:21, na tifuoho, mo ki sakipai tipa gi sanahe re:
Gini siapai si aaida aYisaraere mangihe?
Wakina agu aYisaraere naadu mbata, ani areme a du wa ka ani sia da ani aida ka iriso ni. Mo gedi Ruka 16:13, na tifuo- ho, mo ki sakipai tipa agi asanahe re:
Tipagine ka ani airiso nga Yekova ti ni na kini irisi gu kura boro watadu gu kurahe ya?
Waigu ani ayugoho fu Yekova nga ani ima sia ka iriso ko?
4. Mo berẽkurii ga Yekova nyemuse tipa ro
Yekova ima fu badungu agamahe furani nga gu du na nyanyakipaha. Ginihe rengbe ani ka fuhe fuko? Mo bi gu VIDIO re.
Gini bete agene Yekova nayugu nyemuse foro ngbaha? Mo gedi Atambuahe 104:14, 15 na 1 Yoane 4:9, 10, na tifuoho, mo ki sakipai tipa agi asanahe re:
Gini agamahe be Yekova du mo na bakere ngbarago gbe tipaha kisusi?
Gini bipai agu agamahe re asa ro mo du na ni tipa ko?
Ho ani naagbia gamahe ni nga gu ani nakpinyemuhe gbe, ani naaida ka yugo gaani tambuahe fu gu boro nafuhe furani. Mo gedi Pa Fu Rugute ni Ue he 16:17, na tifuoho, mo ki sakipai tipa gi sanahe re:
Ho mo aberãpa agu apai ni dunduko Yekova namangihe foro, si nika fõ ro mo fu ginihe fu ko?
5. Kparatise naye na dungu amaku
Dungu aboro idi kuti gupai nga worimo, wene sunge, watadu marã nika sayo i du na ngbarago. Ya mo rengo du nga gipai re? Mo bi gu VIDIO re, na tifuoho, mo ki sakipai tipa agu asanahe ngbefuoho.
Wa vura duhe nga gu bangi mbaro nidu rogo gu vidio re aima kpinyemu ta kandi gbe, tipagine ko ambu gu sunge re ti ni?
Ko adiberã tipa ka manga kparatise, angianga fu ta kandi ya, ono fu Yekova. Ya mo mo nabihe nga wene diaberã du ko amangihe re? Tipagine mo abihe ti ni wo?
Mbata fu gu mokedi nangia Pauro da ni Kristano, ko aagbata gu sunge ka ye na worimo fu ko. Ko aima wirika agu andiko nga ga aYudo be gu bayugupai aboro ainiko gbe. Ono ko ambu agi apai re dunduko ni giiko tipa ka da ni Kristano. Ya mo Pauro anaabira tiko? Mo gedi AFiripoio 3:8, na tifuoho, mo ki sakipai tipa agi asanahe re:
Tipagine du Pauro ape gupai ti ni nga agu apai ko amangihe mbata fu ko da ni Kristano angia “mirĩ ahe,” watadu gugudo?
Kuba gure, gini he ko agbiaha?
Waigu rengbe mo ka ringbisa wai du mangasunge fu Yekova na gu kura agene rengbe mo ka mangasunge na gamo raka ngbaha?
Ho Pauro ada ni ni Kristano, agu ahe ko agbiaha adu na nyanyakipaha kisusi gu ko ambupaha
GU KURA ABORO NAPE GUPAI NGA: “Si arẽnga mo kpara gamo raka fu Mbori te.”
Tipagine du mo aberã gupai ti ni nga si rẽarẽ mo kparatiro fu Yekova?
GINIPAI MO NAWIRIKIHE?
Nyemuse nafõ rani ani kpara tirani fu Yekova na ki zi bapatiza.
Fugöpai
Tipagine rẽ Yekova ti ni na gu nyemuse naye kina boro kpotorani yo gbiati gaani iriso?
Waigu Yekova afu mosoro fu gu gako aDezire naima zio bapatiza?
Ya mo mo nakpinyemu ka kparatiro fu Yekova?
MO WETEKE GU KURA APAI
Mo bingo gu ndupai nasa nabi bia gbiati bangimbaro i sia ka kparatiyo fu Yekova.
Agu Asanahe Paranga Aboro Naasanaha—Ginipai Mi Nika Mangaha na Gimi Raka?—Ngera Kusayo (6:54)
Mo bingo gu kura nduapai rengbe ka sa boro nimangi kparatise.
“Tipagine Si Aida Ti Ni Oni Kpara Gaoni Raka Fu Yekova?” (Ngbaõbambu Sinziri, Ngi 1, 2010)
Rogo gi manzigo nga ga bia re, mo bingo gu ngbarago nga ga agu aboro nga aguyo nakparatiyo fu Yekova.
Rogo gu pangbanga nga “Tipa Dungu Agarã, Mi Aabaka Bangire nga, ‘Tipagine du Ani Ane Ti Ni?’” mo bingo gupai nafõ gu kura dee ri berẽpa gupai du na nyanyakipaha fu ri.
“Ziazia Kekeapai Rengbe Arengba Ka Aria Gaoni Raka” (Ngbaõbambu Sinziri, Ngbangba 1, 2012)