WIRIKAPAI 52
Ndu Gupai du Gaani Vo Roko na Mbakadatise ti ni na Nyanyakipaha
Ani dunduko du na nyemu ka sia wai ani aida kaa voda tirani na kaa mbakada tirani. Ka ani peke fuo bete taata bangua arengo nga ga Baibiri, ani ima rengba ka sia gu ngbatunga aroko ani aidaha na kini sa ngbarago a ti Yekova. Ani bingo bete gu bangua arengo re.
1. Gini bangua arengo si aida si nungusi gaani siapai nga ga vo roko gbiati mbakadatise?
Si naida ani sia ka ‘ukadi tirani na gu roko adu nga na enda ti ni ya nizogo tirani na zera,’ na kini banda pa du gigirii ti kpotorani nga gu nayugo gaani “sinombori.” (1 Timoteo 2:9, 10, NW) Mo bingo gu bangua arengo du biama re: (1) Si naida gaani aroko du “zanga enda,” naida ka ya ani vo agu aroko rẽarẽ. A wa mo nabihe ti regbo agu adunguratise nga ga adungurati, ga Yekova aboro na gayo asiapai ni bakiakia, ono gaani vo roko gbiati wai ani ambakada rirani nayugo irisa fu gu Mbori ani airisoko. (2) Ani navo roko ngba “iriiri gene” naida ka ya gu gene ani ambakada tirani ngbaha si aidanga si ba nyemu kodaba ti aboro watadu ka gbeberã kura aboro kuti rani te. (3) Ani nayugo “rugatinapai” ho ani ameranga ni fuo agu agene voda aroko dunduko na mbakadatise nga gu nakura ya. (4) Si naida wai ani ambakada tirani dedede yugu gaani “sinombori,” na kini yuguhe fu kura aboro nga ani nairiso ndikidi Mbori.—1 AKorindo 10:31.
2. Waigu rengbe gaani votise ka du na maapai kurii akuarani aidipase?
Wadu he nga ani na ranirii ka sia ginihe si aida ani voho, si naida ani berẽpa gu maapai si nika du na ni kurii kura aboro. Ani namanga asadatise ka zanga ba gberãrago ti kura aboro, ono kuba gure, ani namanga ‘gu pai ngba angba ti akuarani sa wenepai, na nyakasa.’—Mo gedi ARomo 15:1, 2.
3. Waigu rengbe gaani votise ka ba nyemu ndikidi irisombori ti kura aboro?
Wa vura duhe nga ani naasada ka vo tirani ngba iriiri gene ti aregbo dũ, ani nagbe berãrani gbe kuti wai ani avo tirani ho ani andu ni tipa adunguratise gbiati tungusapai. Ani aidanga ka gbeberã aboro kusayo ti gu nyanyakipa pangbanga ani atungusaha fu yo te. Kuba gure, gaani mbakadatise ima rengba ka ba nyemu rengo ti kura aboro na ki ‘fongo gu yugopai nga ga Mbori Batasirani.’—Tito 2:10.
MO WIRIKI KURA DUNGU APAI
Mo bingo wai si aida gaani vo roko na wai ani ambakada tirani du ni iriirihe wangia ani aKristano.
Wai ani ambakada tirani nayugoho ayugo singia ani nairiso agu aboro du na pagbia beyo. Wa vura duhe nga Yekova nabi agu apai du kpotorani yo, gaani mbakadatise du wa ka si yugu irisa fu ko a
4. Wene mbakadatise nayugo irisa fu Yekova
Gini nyanyaki ndupai du ho furani si aida ani berẽpa gaani votise ti ni? Mo gedi Atambuahe 47:2, na tifuoho, mo ki sakipai tipa agi asanahe re:
Waigu du pa ino ani gupai nga ani naru kuba Yekova narengbe ka du na maapai kurii gu gene ani avo roko ngbaha?
Ya mo mo nabihe nga si rẽarẽ ani berẽpa gaani votise ho ani andu ni tipa adunguratise gbiati tungusapai? Tipagine mo abihe ti ni wo, watadu tipagine mo abingo ho ti ni wo ya?
5. Wai ka manga wene asiapai tipa vo roko na mbakadatise
Singia gaani aroko na kikii ginoho watadu na umba ginoho, si naida si du ni gigirihe na ki rẽarẽ rogo gu bangiriba du ani rogoho. Mo gedi 1 AKorindo 10:24 na 1 Timoteo 2:9, 10. Tifuoho, mo ki sakipai tipa ndu gupai si aida ani ne voda agu aroko ti ni . . .
du ni bibirikoho watadu du bau.
du ni gbidigbidihe, ni nzaranzara ha, watadu gu naba nyemu kodaba ti aboro.
Wa vura duhe nga aKristano tii ga Moize aNdiko te, si nayugo ga Yekova aberãpai ayugo. Mo gedi Pa Fu Rugute ni Ue he 22:5, na tifuoho, mo ki sakipai tipa gi sanahe re:
Wai du rengbe ani ka ne agu aroko gbiati mbakadatise nga gu nasa akumba i naabiyo wakina adee watadu gu nasa adee i naabiyo wakina akumba?
Mo gedi 1 AKorindo 10:32, 33 na 1 Yoane 2:15, 16, na tifuoho, mo ki sakipai tipa agi asanahe re:
Tipagine si aida ani du ti ni na rubangirise tipa ka gaani mbakadatise banga gberãrago ti agu aboro du rogo gaani dagbarago watadu du rogo dungurati ya?
Gini ngbatunga gene voda aroko gbiati mbakadatise moipai rogo gu rago mo araka rogo?
Ya mo mo nabihe nga gu ngbatunga gene voda aroko re ima rengba ka du ni gbegberẽhe fu Kristano? Tipagine mo abihe ti ni wo, watadu tipagine mo abingo ho ti ni wo ya?
Ani ima rengba kaa vo tirani na kini mbakadi tirani ngba dungu agene na kini fu ngbarago kindi fu Yekova
GU KURA ABORO NAPE GUPAI NGA: “Mi na rengo bere ka vo ai guhe mi aida ka voho.”
Ya mo mo idi kuti gupai re? Tipagine idi mo ti ni kutini watadu tipagine mo aidanga ti ni kutini ya?
GINIPAI MO NAWIRIKIHE?
Ho ani amanga wene asiapai ni tipa gaani mbakadatise, ani nayugo irisa fu Yekova gbiati kura aboro.
Fugöpai
Tipagine du gaani votise gbiati mbakadatise ti ni na nyanyakipaha fu Yekova?
Gini bete bangua arengo si aida si nungusi gaani adiaberã tipa wai ani ambakadatirani?
Waigu rengbe gaani mbakadatise ka du na maapai kurii wai kura aboro abi ndikidi irisombori?
MO WETEKE GU KURA APAI
Mo bingo agu apai rengbe kura aboro ka berãha tipa ro ho i abi gamo vo roko ni.
“Waigu Mi Ambakada Tire?” (Gu kekeapai du rogo gaani bangiriba nga ga Internet)
Mo bingo ndu gupai duhe ti ni nipa tatamana ka berã nyanyaki mbata fu mo gbaki he ti kpotoro.
“Ginipai Baibiri Apehe Tipa De Aze?” (Gu kekeapai du rogo gaani bangiriba nga ga Internet)
Mo bingo gu kura bangua arengo nga gu rengbe ka nungusa gaani adiaberã.
“Ya mo Gamo Gene Vo Roko Nafu Taarimo fu Mbori?” (Ngbaõbambu Sinziri, Mbirinvuo 2016)
Waigu kura dee sa asonosi ruru bipai tipa wai kura aboro asia ka vo tiyo?
“Wai Aboro Anaavotiyo na Kini Mbakadi Tiyo Anakotosa re Akotosa” (Awake!, Banduru 22, 2003)