‘Oni Ningére Angera’
“Oni ngére [angera] tie, bambiko oni aina nga ni gu uru gaoni Gbia ka ye te.”—MATAYO 24:42.
1. Waigu ga Yekova amoyambu nga aguyo naima digo nindusunge ko tipa gbanga regbo aberã tipa gayo kparakpara sunge nga ga dungu agarã? Oni funga kpiapai.
DUNGU ga Yekova amoyambu nga aguyo naima digo nindusunge ko tipa gbanga regbo awiriki rengo ho i aduni kindi ni paranga akumba na paranga adee. Wa kina gu babagiahe nga guko nakuru bara gu mbia fongo duna nyanyaki genoho na ki bagi agu ahe dunduko nadu beko tipa ka ngbehe, gu kakaka Abawisigi Baibiri re ambupa tiyo na ki kpara gayo raka fu Yekova. (Matayo 13:45, 46; Marako 8:34) Ginipai i aberãha tipa pa sungodo yo pa bi ga Mbori aringbisapai tipa gbanga regbo si nidigi tipa kpotosende susi gu i aberẽhe? I abiranga tiyo te! I idi sangba gu Wirina nangia A. H. Macmillan, nga guko nagumba gupai fuo agarã mbembedii kuti 60 nga ga kparakpara sunge fu Mbori nga: “Mi ima nyakasatire susi gu nidu mbata tipa ka ndu kumbatayo rogo gimi idapase. Si sa gupai fere nga mi niiraki. Si naundo re kindi tipa mi ngere kumbatayo zanga gunde.”
2. (a) Gini rugute Yesu afuhe fu apefuoko ti wene regbo? (b) Gini asanahe ani ka wisigoho rogo gi papara kekepai re?
2 Ginipai tipa roni? Zanga bipa garã roni, oni makianga afugo Yesu: “Oni ngére [angera] tie, bambiko oni aina nga ni gu uru gaoni Gbia ka ye te.” (Matayo 24:42) Gu taata gumbapai re na nyanyakipa rengo rogo. Ani ainonga gu regbo Gbia ka ye tini tipa ka gbarasa gi gbegbere sinoraka te re, na si a nidingisoro fu rani ani inihe te. Ono si naida ani raki rogo gu gene ka sa gupai nga ho ko ka ye ni, ka ani abiranga tirani ya. Gini kpiaapai ani abihe Baibiri yo tipa gipai re nga gu nika undo rani ani ningere angera? Waigu Yesu ayugukpia gipai si aida ani mangihe re? Na gini gopai du berani nga gu nayugo gupai nga ani naraka rogo yangara arame nga ga gi zegino du zanga sinombori re?
Gu Kpiapai Nafu Zahe
3. Waigu dungu aboro areme awira kina aguyo nadu rogo ga Noa uru?
3 Rogo dungu agene, agu aboro naraka areme wa kina agu akumba na adee nga aguyo naaraka rogo gu uru nangia ga Noa. Ti gu regbo re, kpotosende ahi be zuu, na gu berã nadu ngbadu aboro yo ki du “ni kina gbigbita ha kindi.” (Bambata Pai 6:5) Dunguyo adingiso tiyo na kina gu gayo apai nga ga raka. Ono tie, mbata fu ko ye na gu bakere Ime Akangbii re, Yekova afu mamu fu aboro i sa berã. Ko afu asiahe fu Noa ko tungusapai, na Noa ki irisihe—kini mangisunge ni “batungusi rurupai” isoke tipa agarã 40 watadu 50 watadu susi gure a. (2 Petero 2:5) Ono tie, aboro abasa ga Noa tingidapai nga ga zahe. I angeranga te. Ni yangaraha tie, kina Noa na gako aborokporo nabati be ga Yekova manga sapangbanga.—Matayo 24:37-39.
4. Rogo gini gene rengbe ani ka ya ga Noa sunge aduna diabese, na waigu rengbe yo ka gumba kina gu bangisapai re tipa gaoni sunge tungusapai?
4 Ga Noa sunge aduna diabesee? Ka oni berẽnga kina pa gu wiri umba bange aboro nga aguyo nakaragapai sani ya. Nirengo, ga Noa tungusapai aima manga ndu gupai si adu tipaha, zanga bipa ga aboro karagapai sani. Tipagine? Bambiko si afu mamu fu aboro ni bakerehe tipa i duna siapai singia i andusunge Yekova watadu i amanganga ha wo te. Ginipai tipa gu rago oni naatungusapai rogo? Ka si vura du nga wene karagapai ho gbua tooni, oni ima duna bakere diabese. Tipagine? Bambiko nitungusa oni pai, oni natakapande ga Mbori zahe, nimangaha wo, oni kini digisi gu asiahe Yesu afuhe fu apefuoko.—Matayo 24:14; 28:19, 20.
Basa Sangba ga Mbori Anebi
5. (a) Gini apai namoipai Yuda yo rogo agu auru nangia ga Abakuka, na waigu aboro akaragapai sa gako tingidapai nga ga sangbanebi? (b) Waigu agu aboro nadu Yuda yo aduni kereyo fu ga Yekova anebi?
5 Akama agarã fuo Ime Akangbii, gu kindo nga ga Yuda adu rogo kereapai nga ga ringara. Iriso kpiahe, iraira sarangbanga, rungosi aboro, na zavura imo aboro arengbe na arago dunduko. Yekova afu sunge fu gu nebi nangia Abakuka ko za aboro ya ka i asanga berã ya, gberango nika manga yo nga gu nika ye be aKasado, watadu aBabero. (Abakuka 1:5-7) Ono aboro aka gupai aka nga ka degatuyo. Isoke i avura berãha ya, ‘Ha, agarã susi kusayo kama, gu nebi nangia Yesaya agumba kina ngbatunga gu zahe re, ono pai ho mangi te!’ (Yesaya 39:6, 7) Anga dungu gu kikindigipa aboro nangia ga Yuda yo re adu gbua na kina zanga nyemu gu tingidapai re te, ono i adu a ni kereyo koyo du agu amokedi ni re. Ti kura regbo sa, i a’asadi ka imo gu nebi nangia Yeremaya, na ka i amangihe amanga wo ka Aikama arimisonga tiko kurogo gupai re ya. Fuo ngbaduko imi be kura tingidapai nga ga sangbanebi, Bakindo Yoyakima asa gupai nga i imi gu nebi nangia Uria.—Yeremaya 26:21-24.
6. Waigu Yekova anyakasi Abakuka?
6 Ga Abakuka tingidapai adu a zanga gunde, zanga ngba ti aboro wa kina gu ga Yeremaya adu a, nga guko ga Mbori toro agumbapa gbarasa Yuda fuko tipa agarã 70 mbata fu si mangi. (Yeremaya 25:8-11) Sidu tie, ani rengbe ka rugatirani na pa ga Abakuka gberarago wa ko akpari niyaa: “Ako Yekova, mi ka akpara ni gbanga ha waĩ tipa undahe, ka mo agia nga ha ya? Watadu kpara foro mbiko pa zuu; ka mo abatasa nga re ya?” (Abakuka 1:2) Ni nunga, Yekova akaragapai fu Abakuka ni agi afugo nga gu nangarasa idapase re: “Yuguyugupai nasunguda ragoho kindi; si naipisa tihe sa digidaha—si aré nga zire te. Ka si du wa si ayé yee, mo súngudi he; si ayé aye ni rengo, si aíma nga te.” (Abakuka 2:3) Sidu Yekova aduna ‘siasia regbo’ beko tipa digiso iraira sarangbanga gbiati rungosi. Kangia apai awiri kaa keesa, si aidanga kpoto Abakuka yo zere te, si aidanga a ko mbu sunge te. Kuba gure, si aidi ko ‘nisungudihe,’ kini raki na auru dunduko na gupai bangiriko nga ga mangaapai gbäräkägbäräkä. Ka ga Yekova uru aimanga te!
7. Tipagine i ambakadipa kura gbarasahe tini berewe tipa Yerusarema rogo bambata kama agarã ti Gaani Regbo?
7 Mbembedii wa agarã 20 fuo Yekova fura fu Abakuka, i agbarasi ga Yuda bakporo, nangia Yerusarema. I amehe kusa, na i ki rugu dungu gu gbegbere apai nga gu nasa gberarago ni bakerehe gbe ti Abakuka. Ono tie, rogo bambata kama agarã ti Gaani Regbo, gu bakporo re adu berewe tipa gbarasaha mbiko gu zanga rurupai nangia ga araki rogoyo. Ni inapai, Yekova ambakadipai tipa agu aboro nadu na ruru ngbaduyo yo i bati. Ti gi regbo re, ko amangisunge na gu bakere nebi nga Yesu Kristo tipa ko gumba gi tingidapai re. Rogo 33 ti Gaani Regbo, Yesu agumba gupai fu apefuoko nga: “Ho oni ka bi Yerusarema ni i nikisi he kirikiri na aboro vura, oni ki ini he, ya rago gbarasa ha mbedi. Agu aboro ka du Yuda yo i ki oro ku abaagangara yo.”—Ruka 21:20, 21.
8. (a) Ginipai nawiri manga tipa kura aKristano wa regbo aasusa fuo kpio Yesu? (b) Waigu afugo Yesu nga ga sangbanebi tipa Yerusarema adigi?
8 Wa agarã aasusa, gu bete aKristano nadu Yerusarema yo avura bakabangiriyo nga gini regbo nzunzu ga Yesu sangbanebi nika digo. Na wai tie, oni berẽnga pa agu apai bete yo ambupaha zanga tikö. Isoke i avura ka tipa ka manga gu wene sunge amarã nga gu i agumbapaha fuyo bambiko pa gayo diaberã kaa ngera angera kindi. Wa regbo aasusa, kpotoyo yo azere? I adigisihe kuti gupai nga i agbarasa gayo regbo agbarasa, kini berẽ gupai nga afugo Yesu adu tipa kura rikaaboro kumbatayo, sidu angianga yo ya? Rogo 66 ti Gaani Regbo, ga Yesu sangbanebi atona ka digo ho ga aRomo ariivura arunguru ni pati Yerusarema. Agu aboro naangera angera kindi abi gupai i aino pa apai tini, ki oro kusayo rogo gu bakporo re, na i ki batasi yo ti susa rogo gbarasa Yerusarema.
Yugo Kpiapai Tipa Gupai nga Si Naida Ani Ningere Angera Kindi
9, 10. (a) Waigu rengbe oni ka guruso ga Yesu kpiapai tipa agu amoyambu nga aguyo nasungudi baira yo tipa ko yego gene gako diadee yo? (b) Tipagine rengbehe ka du tini nga sungudo gu baira yo re aduni kpakarakpakaraha fu agu amoyambu re? (d) Tipagine si adu tini na undo fu agu amoyambu re i duna zerangbaduse?
9 Ni nyakasa ko gupai nga si naida ani ningere angera, Yesu aringbisi gako abawiriki kuti agu amoyambu nga aguyo naasungudo bairayo tipa ko yego gene diadee yo. I aini gupai nga ko ayego ayego rogo kura yuru sa—ono ti gini saa? Ti regbo gu bambata asaa nga ga yuru?a Gu uehe? Gu biataha? I ainongoho te. Yesu ayaa: “Ka ko [baira yo] yega bebere yuru, ka ngia ngbatutu wiso, ko ki bi yo i ningere ti ko, aboro maku [ngbarago, NW ] nga yo!” (Ruka 12:35-38) Oni berẽnga pa gu maabangirise nga ga agi amoyambu re. Aworo ahe dunduko, kirimo ahe dunduko ka rengbe ka kiiso gayo maabangirise: ‘Baira rani du ka du tee?’
10 Ginipai ka mangi ka baira yo ayego ti regbo ue asaa nga ga yuru, nga gu natona ti saa ribua da ku bebere yuru? Ya mo ka amoyambu adu dunduko ho barambeda ka paa kuti ko, kodihe na aguyo naima digo nimangisunge nyanyakii tona ngbatutu wiso, watadu ka beteyo adu rameyo? Ginipai ka mangi ka baira yo ayego ti regbo biata asaa nga ga yuru—nga gu regbo natona ti bebere yuru ki da bara ti saa biata nga ga yuru? Ka kpoto bete amoyambu yo azere, watadu rago ki gbere tiyo tipa gupai naawiraha ya baira yo nakeesa akeesa?b Kina aguyo sa ka i abiyo i ningere angera ho baira yo ada ni, i ka i ayambu yo nga aboro ngbarago. Agu afugo nga ga Asanza 13:12 ki rengbe nirengo ka du tipa yo: ‘Gu maabangirise i agbisigoho nafu kaza ngbaduse, ono ho gu he nida ni i akpi nyemu he, si nidu wa ngua unga.’
11. Waigu rengbe kparakpee ka undo rani ani ningere angera kindi?
11 Ginipai ka undo apefuo Yesu i ningere angera, ti gu regbo nga gu naawira regbo keesa re? Ho ko aduni rogo gu ati nga Getesemane ngbutuko mbata fu i zi ko, Yesu agumba gupai fu aguyo biata dagba gako amokedi nga: “Oni ngére ki nikpari, oni ka rima ku rogo asada.” (Matayo 26:41) Fuo bete agarã kusa, Petero, nga gu boro naduho ti gu regbo re, afu kina ngbatunga gu rugute re fu akurako aKristano. Ko akepai ya: “Ono digida apai dunduko nambeda. Wa du he were tie oni rúgu gaoni aberã ki niso gima kpe.” (1 Petero 4:7) Ziazia tie, si naida kakaka kparakpee duni papara gaani sino nga ga aKristano. Nirengo, si naida ani nisana Yekova kindi ko undo rani tipa ani ningere angera.—ARomo 12:12; 1 ATesaroniko 5:17.
12. Gini kparapai duho dagba rungba berã na gupai nga kaa ngera angera?
12 Oni kparia gupai a nga Petero ayaa: “Digida apai dunduko nambeda.” Waigu mbedihe? Gene be aboro wa ka i ringbisi ndikidi uruhe gbiati saa ha te. (Matayo 24:36) Ono kparapai kinaho dagba gupai nga kaa rimisotise kurogo rungba aberã, nga gupai Baibiri angarasanga mangaha ya, na gu nga kaa maabangirise tipa digido rago, nga gupai si angarasapa mangaha. (Oni ringbisingaha na 2 Timoteo 4:3, 4; Tito 3:9.) Gene sa nga gu rengbe ani kaa ngera tipa digida rago rogo nga gine? Si nga ni maa ani berã rani gbe kuti gu gopai nga digida rago ima mbeda. Sidu tie, ani ngerenga rii goapai sita nga gu nayugo gupai nga ani naraka rogo yangara auru nga ga gi zegino du zanga sinombori re.
Gene Goapai Sita nga gu Nanyasa Kango
13. Waigu gu ga Pauro sangbanebi duni kekehe rogo 2 Timoteo kapita 3 asa roni oni idi gupai nga ani naraka rogo ‘yangara arame’?
13 Ni bambata pai, ani bi pa digo gu sangbanebi nga ga gu mokedi nangia Pauro ziazia nga gu du tipa ‘yangara arame.’ Pauro akepai ya: ‘Rogo yangara arame gbegberẽ rago nikpakarakpakaraha ka mangapai sani ayé. Bambiko aboro akpi kina nyemu tiyo, ki du ni airakpinyemumarã, airaruka, airarekangose, agberẽngba yo, abasasangba avunguyo, atambua nga he ya, airazanga ziaziapai, airasakparakpa, aguaurundika, airasoapai, airazanga rugatise, airaerã, akpi nga nyemu wenepai ya, airabiriki, airanyakari, airaabiatise, i akpí nyemu sangba borose susi nyemu Mbori; ki nika kuti kpia sinombori, ono i ati kango tandu he. Oni kpára tironi ti agi yo re a. Ono gbegberẽ aboro agbérã ki susi na airanangahe a, ki ninangi aboro, aboro ki ninangi yo a.’ (2 Timoteo 3:1-5, 13) Ya mo ani abinga gi sangbanebi re si nidigi ti gaani regbo tee? Kina agu aboro sa natikango rengo, i rengbe ka ya si amanganga te!c
14. Waigu agu afugo nga ga Yugoti 12:9 nga gu du tipa Bakitingbanga adigo arame, na ginipai nika manga bambeda tipa ko?
14 Ni ue pai, ani nabi sangbana pa kusa Satana kusayo na gako adaimona ngbangbaturũ yo ku sende no, ni digisa agu afugo du rogo Yugoti 12:9. Yo ngaha re, ani nageda gupai nga: “Were i ki ba bakere daragona ku sende yo, nga gu bakuru wo, nga gu ko i aniya ti ko, Bakitingbanga nga Satana, nga banangi aboro kpotosende yo dunduko; i ki niba ko ku sende yo na gako amaraika a.” Sangbana gere nga bakere rungo tipa kpotosende. Nirengo, bakere rungo niduho namanga ngbatunga aboro, gbe natona rogo 1914. Ono gu sangbanebi nga ga Yugoti re nagbia gupai kuti ni nga, ho i aba Bakitingbanga ni ku auru kpotosende, ko ini gupai nga “kina bete rago nye fu ko.” (Yugoti 12:12) Ti gi regbo re, Satana nasovura na mbedimbedi apefuo Kristo. (Yugoti 12:17) Nirengo, ani ima bi sangbana gako zubohe ti gaani regbo.d Ono tie, bambedaa, i akiso Satana kurogo gu due zanga mburuhe tipa “ka ko ananga nga arikaaboro berewe wa sa ya.”—Yugoti 20:1-3.
15. Waigu Yugoti 17:9-11 afu gopai nga ani naraka ti digido regbo?
15 Ni biata pai, ani naraka ti regbo gu muambe ‘bakindo’ nga gu yangara ko, nga guko gumbayo pako rogo sangbanebi keyo ho rogo Yugoti 17:9-11. Gu mokedi nga Yoane nagumbapa abakindo herẽ saba, nga aguyo narukuba aome zegino saba—nga Ezipeta, Asurio, Babera, aMadio na aParaso, ringara aGiriki, Roma, na gu kodikodi ome zegino nangia ga aNgirisi na Amerikani. Ko nabi gu ‘muambe bakindo’ a nga guko ‘nakura ti aguyo du saba.’ Gi muambe bakindo re—nga gu yangara ko Yoane abiko rogo yuguyugupai—naru awere kuba Kpamiakpamia Aringara. Yoane nagumba gupai nga gi muambe bakindo re “nandu sa kpio,” nga gu ko i agumbanga pa kura abakindo nga ga kpotosende yo berewe fuoko ya.e
16. Waigu pa digo agu arengo du paha rogo ga Nebukadenesara mosumo nga ga kpiahe ayugo gupai nga ani naraka rogo yangara arame?
16 Ni biama pai, ani naraka ti gu regbo yuguyo kpiaha ni ndu gu kpiahe nadu rogo ga Nebukadenesara mosumo. Gu nebi nangia Daniere asakirogo gu iiriwo mosumo nga ga gi banaru kpiahe nadu wa boro re. (Daniere 2:36-43) Agu apapara kpiahe du biama rogo marã re narukuba aome zogarago nibakiakia nga ga zegino, natona ti riihe (nangia ga aBabero Ngbii) kini ndu ki da ti nduhe na awirinduhe (nga agu azogarago nazoga zegino awere). Agu aome zegino dunduko gu kpiahe re arukubaha aima kura. Ani naraka ti gu regbo yuguyo kpiaha ni ndu gu kpiahe re. I agumbanga pa gu kura aome nga ga zegino berewe nga gu nika kura te.f
17. Waigu gaani sunge tungusapa Kindo afu kura gopai nga ani naraka rogo digido rago?
17 Ni bisue pai, ani nabi tungusapai rogo zegino dunduko i nimangihe, nga gu Yesu aya tipaha si amanga ngbutuko mbata digido rago nika da. Yesu ayaa: “Gi wene pangbanga nga ga ngbi [kindo, NW ] re i atungusa ha rogo zegino dunduko mbiko ndika fu arikaaboro dũ; ragoho ki digi adiga.” (Matayo 24:14) Areme, gu sangbanebi re nadigo rogo gu gene nga gu si aamanganga mbata rogo ya. Rengo ngaha, arago kinaho kindi nga gu i ata tungusanga pai rogo ya, na si rengbe ka du nga ti ga Yekova ringbisiringbisi regbo, bakere ngbadimo azaka nga gu nandu sa bakere sunge. (1 AKorindo 16:9) Si ki vura du wo, Baibiri agumbanga gupai nga Yekova nika sungo daho i ka tungusapai ni fu aboro nibasasa auru kpotosende te. Kuba gure, si naida i tungusi wene pangbanga kuho Yekova aidaha kuho ni. Fuo gure, digido rago ki ye.—Oni ringbisingaha na Matayo 10:23.
18. Wa gopai ayugoho, ginipai nika du nirengo tipa bete gu mbedimbediyo ho bakere gberangbii nika tona ni, na waigu rengbe ani ka ino gere?
18 Ni sita pai, bange ndikidi mbedimbedi abawiriki nga ga Kristo yo naumba, wa vura duhe nga beteyo adu adu kindi auru kpotosende ho bakere gberangbii nika tona ni vurũ. Dungu gu yangara yo ima gbinza, na vuru agu agarã nga gu susi, bange aguyo nidu nirengo nga mbedimbediyo naumba kina kumbatayo. Si ki vura du wo, nifura ko tipa bakere gberangbii, Yesu ayaa: “Ka Mbori agurusa nga gu rago re ya, ka boro abati nga te; ono i agúrusa gu rago re tipa siasia aboro.” (Matayo 24:21, 22) Ziazia tie, bete ga Kristo “siasia aboro” adu adu auru kpotosende ho bakere gberangbii nika tona ni.g
Ginipai Du Kumbatayo?
19, 20. Tipagine duhe tini ni ipiipihe awere fu rani susi gu nidu mbata tipa ani zingi rameyo na kini ngere angera kindi?
19 Ginipai du kumbatayo tipa rani? Wene aregbo kindi kumbatayo. Pauro agumba gupai nga ‘ga Gbia uru naye teketeke wa iradĩ naye yuru.’ Nifura ko tipa agu akumba nga aguyo nayugo tiyo fu aboro wa i na tatamana nga ga zegino, ko nayaa: “Ho i ka ya ni, ‘Zereda, ngba barani angba,’ gberãngbi ki ye ku ri yo ni ba sa.’ ” Were, Pauro nangarasa agedi gako waraga ya: ‘Ka ani ra nga wa agu yo ya, ono ani nikparia rago ki nirugu tirani.’ (1 ATesaroniko 5:2, 3, 6) Nirengo, aguyo nangera kube agu ariigbu nga ga aboro tipa si ye na zereda gbiati ngbabase nabasa gupai nga rengo. Ngbatunga agu aboro re nara wa pai!
20 Pa gbarasa gi sinoraka re nika ye ni gu tunguotunguopai duni iiriwoho. Sidu tie, oni ningere kindi tipa ga Yekova uru. Mbori nitiko agumba gupai fu Abakuka nga: “Si aíma nga te”! Nirengo, si aadunga mbata ni ipiipihe wa duhe awere tipa ani ningere angera kindi te.
[Gu rukutu kekeapai du bandu kpewaraga yo]
a ARomo anakparaka yuru kurogo apaparaha biama, gu bambata asaa nga ga yuru anatona saa 6 nyemu da ti saa 9 yuru, gu uehe anatona saa 9 yuru da ti saa 12 bebere yuru, gu biataha anatona saa 12 bebere yuru da ti saa 3 yuru, gu biamaha anatona saa 3 yuru da ku saa 6 wiso.
b Baira agu amoyambu re aambakadanga pa regbo na yo te. Sidu, si aaidanga ko sakirogo gako mangaapai nabaha te, si adunga a fuko ni dingisoro ko sakirogo ndu gupai ko awiri keesa tini te.
c Tipa futufutu sakapai tipa gi sangbanebi re, oni bi kapita 11 nga ga gu buku nga Gu Inohe Nandu sa Nyenye Unga, nga gu Watchtower Bible and Tract Society of New York, Inc. akusihe.
d Tipa ka gbia kura tingidapai, oni bi akpewaraga 180-186 nga gu buku nga Yugoti—Bakere Digisoho Ima Mbeda!, nga gu Watchtower Bible and Tract Society of New York, Inc. akusihe (rogo pa-Ngirisi).
e Oni bi gu buku nga Yugoti—Bakere Digisoho Ima Mbeda!, akpewaraga 251-254.
f Ono bi kapita 4 nga ga gu buku nga Oni Moi Berãroni Kuti ga Daniere Sangbanebi!, nga gu Watchtower Bible and Tract Society of New York, Inc. akusihe (rogo pa-Ngirisi).
g Rogo gu sanza nga ga avusende na ameme, Wiri boro naye rogo gako taarimo ti regbo bakere gberangbii na ki sungu tipa sapangbanga. Ko nasapangbanga aboro riimburu gupai nga singia i asongodi mbedimbedi awirina Yesu. Ngbatunga gi sapangbanga re arengbanga ka duna rogoyo tini te ka si du nga ti regbo sapangbanga, awirina Yesu aima guari kusayo auru kpotosende bakuruyo.—Matayo 25:31-46.
Oni Natingidaha
• Gini kpiaapai nga ga Kekeapai rengbe ka undo rani ani ningere angera kindi?
• Waigu Yesu ayugu kpiapai tipa gupai nga si naida ani ningere angera kindi?
• Gini gene goapai sita nayugo gupai nga ani naraka rogo yangara arame?
[Gu kpiahe du ti kpewaraga 3]
A. H. Macmillan andusunge Yekova niruruhe tipa agarã mbembedii wa sita bawe
[Gu kpiahe du ti kpewaraga 4]
Yesu aringbisipa gako abawiriki kuti agu amoyambu naangera angera kindi