Ndu Zio Bapatiza Nga Gine?

“Oni ndú . . . ki sa arikaaboro dunduko ni abawiriki, ki nibapatizi yo.”—MATAYO 28:19.

1, 2. (a) Rogo gini ngbatunga agene i afuku bapatiza fu kura aboro? (b) Gini asanahe nakura tipa bapatiza?

CHARLEMAGNE nangia Bakindo aFarakisi amangi agu aboro i ayamba yo nga aSakizoni ngbaome i zi bapatiza nabayo natona rogo gu garã nangia 775 da kurogo 777 ti Gaani Regbo. Gu bake kuru apangbanga nga John Lord akepai tipa ko ki ya: “[Charlemagne] amangi agu aboro re ngbaome i sa tiyo ni aKristano ti kina rimo gbua.” Teketeke a, fuo gu bazogo nangia ga Russia ko rimoko angia Vladimir gu bambata ko di wiri bakindo rogo gu garã nangia 987 ti Gaani Regbo nga guri nadu rogo gu pambori nga Greek Orthodox, ko arũndiko ya avuruko dunduko du wa ka i sa tiyo ni “aKristano.” Ko arũndiko ya i naabapatizi bakere rimbasa avuruko ti aregbo nibasasa, guni ka idanga ha ya, i ki de goni ni basape!

² Ya mo ngbatunga agu abapatiza re aru aru? Ndikidi rogoyo tini? Ya mo si naida aboro dunduko zi bapatiza?

Wai I Afu Bapatiza fu Boro?

3, 4. Tipagine migido boro na ime watadu ka uka ime kuri boro angianga ruru gene fu bapatiza nga ga aKristano tini ya?

³ Ho Charlemagne gbiakuti Vladimir gu bambata ko amangi aboro ni ngbaome i zi bapatiza, agu abazogo re aamanganga pai na ngbanya kuti Fugo Mbori te. Nirengo, anga wenepai ho namanga ho i abapatizi boro ni ni migido yo ni na ime, ka uka ime kurii ni, watadu ka rindosi ni ku ime yo te, ka i ayugonga gu rengo nga ga Ziazia Kekeapai funi ya.

⁴ Oni berẽnga pa gupai namangi ho Yesu nangia boro Nazareta andu ni fuo Yoane bafu Bapatiza rogo gu garã nangia 29 ti Gaani Regbo. Yoane aabapatizi aboro rogo gu Di nga Yaradene. I nisayo nanaye fuo ko tipa bapatiza. Ya mo gupai ko anamangaha gbua nga ka rugusa yo Yaradene yo kini uka bete ime kuriyo watadu ka migido yo nani? Ginipai namangi ho Yoane abapatizi Yesu ni? Matayo natingida gupai nga, fuo i bapatizi Yesu, “ko ki guari [kuari, NW] ime yo ni ba sa.” (Matayo 3:16) Ko adu tii ime yo, fuo rindosi yo ko kurogo gu Di nga Yaradene. Teketeke a, i abapatizi gu banyaki nangia boro Etiopia rogo “[dudunguro, NW ] ime.” Si aidi dudunguro ime duho, mbiko gu bapatiza nangia ga Yesu na ga gako abawiriki aaida i rindosi kpotoyo dunduko kutii ime yo.—Amokedi 8:36.

5. Wai bambata aKristano anabapatizi aboro?

⁵ Gu pa-Giriki i asaha nga “bapatiza,” watadu “badisimo,” si nafura tipa rindosihe kutii ime yo, zoga he kutii ime yo, watadu rimisohe kutii ime yo. Gu buku nga Smith’s Bible Dictionary nayaa: “Rogo gu fugo yo nga Bapatiza nzunzu nga rindosihe kutii ime yo.” Si du gu kura sasa afugo Ziazia Kekeapai afura tini tipa ‘Yoane ya ko angia Barindosi aboro kutii ime yo’ na ‘bazogo aboro kutii ime yo.’ (Matayo 3:1, Rotherham, The Emphatic Diaglott, interlinear) Augustus Neander, rogo gako buku du rimoho nga, History of the Christian Religion and Church, During the Three First Centuries nayaa: “Ti tonatonaha, i anafu bapatiza fu aboro ni rindosi yo kutii ime yo.” Gu buku i akehe rogo Faransée nga, Larousse du XX^e Siècle (Paris, 1928) nayaa: “Bambata aKristano anazio bapatiza ni rindosi yo yo kutii ime yo rogo agu arago dunduko ime anidu ni.” Na gu kura buku nga New Catholic Encyclopedia nayaa: “Si ziazia nga, i anafu Bapatiza fu aboro rogo bambata Kanisa ni rindosi yo kutii ime yo.” (1967, Volume II, page 56) Sidu areme, pa fu bapatiza fu boro ni da ni guni sa dagba aDezire Yekova, nga gupai kina boro aidaha nitini i kini mo ka rindosi kpotoni nabaha dunduko kutii ime yo.

Vovo Ndupai Tipa Zio Bapatiza

6, 7. (a) Ndu fu Yoane bapatiza fu aboro nangia gine? (b) Gini vovopai nadu rogo gu bapatiza nangia ga apefuo Yesu?

⁶ Gu bapatiza Yoane anafuhe fu aboro ndu mangaha adu kia ti gu apefuo Yesu anamangaha. (Yoane 4:1, 2) Yoane anabapatizi aboro ni yugo yo pa gayo saberã gbaiga ti agu aingapai i amangihe kuti ga Mose Ndiko.a (Ruka 3:3) Ono gu bapatiza apefuo Yesu anamangaha aduna vovopai rogoho. Ti rago Pendekote rogo 33 ti Gaani Regbo, gu mokedi nangia Petero angarasi agu aboro naadegatuyo koyo du ko ni ki ya: “Oni sá gaoni berã i ki bapatizi roni dunduko ti rimo Yesu Kristo i di gaoni ingaapai ti roni.” (Amokedi 2:37-41) Wa si avura du nga Petero aafura fu aYuda na fu agu aboro nasa tiyo kurogo gu pambori nga ga aYuda, anga ko aangarasa yo i zi bapatiza ki sa gayo berã ti gu ingapai i amangihe kuti ga Mose Ndiko te; na ko aberãnga gupai a nga, pa zio boro bapatiza ti rimo Yesu nagiriso ni be gani ingapai te.—Amokedi 2:10.

⁷ Ti gu regbo re, Petero amangisunge na gu bambata agu “arifungura gu ngbi nga ga ngbangbaturũ.” Na gini nduhe? Tipa ka yugo gu inohe du tipa gu mamu nga ga rimo gu Kindo nga ga ngbangbaturũ nga gu nazaki fu agu aboro naadegatuyo koyo du ko ni. (Matayo 16:19) Wa si adu nga aYuda aima ka Yesu ni Masiya, pa sa yo berã yo na ki duna idapase kuti ko angia vovopai na ki duni nyanyakipa pai rogo gbata gene Mbori mbupai fuyo. I arengbe ka yugo go gu gayo idapase re gbaiga ni rindosi yo yo kutii ime yo ti rimo Yesu Kristo. Rogo gu gene re, ka i arengbe ka yugopa gayo kparatise fu Mbori rogo Kristo yo. Agu aboro dunduko areme naida Mbori idi na gayo pai du wa ka i duna idapase wa kina gure, ki kparatiyo fu Yekova Mbori, na ki zi gu bapatiza nga ga aKristano ka yugo nani ya i ima kparatiyo na ngbaduyo yo dunduko fu gu Mbori nga Bahe Kisusi.

Ruru Inohe na Nyanyakipaha

8. Tipagine adunga gu bapatiza nga ga aKristano tini tipa aboro dunduko ya?

⁸ Anga aboro dunduko rẽ tipa gu bapatiza nga ga aKristano te. Yesu arugu gako abawiriki ki ya: “Oni ndú . . . ki sa arikaaboro dunduko ni abawiriki, ki nibapatizi yo ku rogo rimo Mbori nga Ba na [ti rimo] Wiri na [ti rimo] Ziazia Toro; ki nirugu yo a i niká kuti agu apai dunduko mi arugu roni kuti ni.” (Matayo 28:19, 20) Mbata fu i bapatizi aboro, si naida i ‘yugupai fuyo i kakuti agu apai dunduko Yesu arugu gako abawiriki nani.’ Sidu, pa bapatizi aboro ngbaome nga aguyo adunga na idapase du mburuhe rii ruru inohe nga ga Fugo Mbori ya na wiri undo tini te, na si kia ti gu sunge Yesu afuhe fu apefuo ko.—AEbere 11:6.

9. Pa fu yo bapatiza fu boro “ku rogo rimo Mbori nga Ba” na gini rogoyo tini?

⁹ Pa fu yo bapatiza fu boro “ku rogo rimo Mbori nga Ba” na gini rogoyo tini? Si nayugo gupai nga, gu boro naida ka zio bapatiza re ima idapa gu ba na pa gu pagbia nga ga gu Barani nga ga ngbangbaturũ ko. Rogo gi gene re, ni kini idipa Yekova Mbori ni Bakusirani ni “Bahe ki susi auru kpotosende dunduko” na ni Bakere Bakindo zegino dunduko.—Atambuahe 83:18; Yesaya 40:28; Amokedi 4:24.

10. Pa fu yo bapatizi fu boro ‘ti rimo Wiri’ na gini rogoyo tini?

¹⁰ Tipa i bapatizi boro ‘ti rimo Wiri’ nayugo gupai nga, gu boro nazio bapatiza re ni ima inopa ga Yesu ba na pa gako pagbia ni gu Wiri Mbori nga gako bangisa vungu. (1 Yoane 4:9) Agu aboro rẽ tipa bapatiza naidapa Yesu ni gu boro Mbori nafu ko ko “tumo dungu yo ni ungako.” (Matayo 20:28; 1 Timoteo 2:5, 6) Si naida gupai a nga, agu aboro naida ka zio bapatiza idipa gu ‘tumbatumba ba’ Mbori atumba Wiriko kurogoho. —AFiripoio 2:8-11, NW; Yugoti 19:16.

11. Ginipai i aberãha na pa bapatizi yo boro ‘ti rimo ziazia toro’?

¹¹ Nyakapa bapatizi yo boro ‘ti rimo ziazia toro’ nga gine? Gere nayugo gupai nga, gu boro naida ka zio bapatiza re ima idapa ziazia toro ni ga Yekova zaza ome nga gu ko amangasunge nani rogo dungu agene nibakiakia ka manga gako ringbisapai. (Bambata Pai 1:2; 2 Samuere 23:1, 2; 2 Petero 1:21) Agu aboro rẽ tipa bapatiza idi gupai nga, ziazia toro naundo yo i girogo “gu dudungura apai nga ga Mbori,” ka undo yo i susi kumbatayo na sunge tungusapa Kindo, na si naundo yo a i yugu azuzu toro nga, “nyemuse, na ngbarago, na zereda, na hipai, na mangapase, na weneringise, na . . . [idapase], na zera, rugatise” rogo gayo raka.—1 AKorindo 2:10; AGaratio 5:22, 23; Yoere 2:28, 29.

Saberã na Aria Ida Na Nyanyakipaha

12. Wai du gu bapatiza nga ga aKristano nikodikodihe kuti saberã?

¹² Kpara kina Yesu sa naangianga boro ingapai ya, bapatiza nga gupai Mbori afuhe tipa aboro yugupa gayo saberã nani. Ho ani asaberã ni, ani nabira tirani nibakerehe, watadu ani narungo kpotoraniyo ni bakerehe riipa gupai ani amangihe watadu riipa gupai ani akpa ti mangaha. Si aidi agu aYuda nadu rogo bambata sa kama agarã nga aguyo naaida ka fu ngbarago fu Mbori sa gayo berã ti gu gayo ingapai i amangihe kuti Kristo. (Amokedi 3:11-19) Gu kura aidipase ni aGendiria nadu Korinda yo asaberã yo ti meteka, iriso kpiaahe, dii, na ti kura kere aingapai. Mbiko gayo saberã, i ‘azundu yo gigirii’ ni kure Yesu; na ki ‘sa yo ziazia,’ watadu ki kpara yo tipa ga Mbori sunge; na ki ‘dipai kusayo riyo’ ti rimo Kristo na mbiko ga Mbori toro. (1 AKorindo 6:9-11) Sa boro gani berã nga nyanyakipa pai tipa ni gbia wene sangbakpotoyo na ki gbia gu undo Mbori afuhe tipa ka zeresa gu rungo du ni nani tipa gu ingapai ni amangihe.—1 Petero 3:21.

13. Nibipa bapatiza, aria boro gani ida naida ginipai beni?

¹³ Ani du wa ka ani aria gaani ida mbata fu zio ani bapatiza kini mo ka da ni aDezire nga ga Yekova yo. Aria boro gani ida nga gupai ni amangaha nitini nga gu boro diberã na ngbaduniyo dunduko ka pefuo Kristo Yesu. Ngbatunga agu aboro re nambu gu gayo iraira gene raka nadu mbata na kini diberã ka manga gupai du bangiri Mbori niruruhe. Rogo Ziazia Kekeapai, gu fugo Giriki na fugo Ebere du tipa aria ida na gu rogoyo nga, ka karagatise kusayo, ka ariatise kubani. Gi mangaapai re nayugo gupai nga, boro mbu iraira gene ki aria ti ni koyo du Mbori ni. (1 Abakindo 8:33, 34) Pa aria boro gani ida naida gupai beni nga “nimangi agu apai rengbe na saberã.” (Amokedi 26:20) Si naida gupai nga ani mbu kungbo irisombori, ki mangipai na ngbanya kuti ga Yekova arugute, na ki kpara tirani fu kina ko sa. (Pa Fu Rugute ni Ue he 30:2, 8-10; 1 Samuere 7:3) Pa aria ani gaani ida naida gupai a nga ani aria gaani berãpai, ani aria gupai ani aida ka mangaha na ki aria sino rani. (Yezekere 18:31) Ani ‘nasa tirani kubani’ nimbu ani agu apai angianga sinombori ya kini ukadi vovo borose kubaha.—Amokedi 3:19; AEfeso 4:20-24; AKorosaio 3:5-14.

Kparatise na Ngbaduseyo Dunduko Ni Nyanyakipa Pai

14. Gu kparatise nga ga apefuo Yesu nayugo gine?

¹⁴ Si naida i fu bapatiza fu apefuo Yesu a kina fuo kpara yo tiyo na ngbaduyo yo dunduko fu Mbori. Gu fugo nga kparatise fu Mbori wa mangi ani sunge nani herẽ, rogoyo nga, ka kparahe tipa ka manga ziazia sunge nani watadu ka kparahe tipa gu ringbisapai du ziazia. Gipai re ni nyanyakipa pai sidu si kini idi ani gumbapa gaani diaberã fu Yekova rogo kpee yo ya ani ima kpara tirani fu kina ko sa nyeanye kindi. (Pa Fu Rugute ni Ue he 5:9) Rengo ngaha, anga sunge kpara ani tirani tipaha te watadu boro kpara ani tirani funi te, ono kpara ani tirani fu kina boro Mbori.

15. Tipagine i arindosi agu aboro tini naida ka zio bapatiza kutii ime yo?

¹⁵ Ho ani akpara tirani ni fu Mbori rogo Kristo yo, ani nayugo gaani diaberã ka manga gupai Mbori akpinyemuhe rogo gaani raka a wa duhe rogo Ziazia Kekeapai. Ni yugo yo gupai nga i ima kparatiyo fu Mbori, agu aboro naida ka zio bapatiza naru ime yo tipa i rindosi yo ku tiihe yo, a wa i abapatizi Yesu rogo gu Di nga Yaradene ko kini yugu gupai nani nga ko aafu tiko fu Mbori. (Matayo 3:13) Gupai nagbeberã rani nga, Yesu aakparakpee ti gu nyanyakipa regbo re.—Ruka 3:21, 22.

16. Wai rengbe ani ka yugo gaani ngbarago rogo iriiri gene ho ani abi aboro ni i ni zi bapatiza?

¹⁶ Ga Yesu bapatiza angia nyanyakipa pai ono ni pa ngbarago fuko. Sidu, kinawo a du gu bapatiza nga ga aKristano areme. Ho ani abi aboro ni i niyugu kpia gayo kparatise fu Mbori, ani rengbe ka yugo gaani ngbarago ni ta ani berani rogo irisa na ki tambua yo tipa gupai mangi yo ho re. Ono tie, ani nane takangbaa, vu vuture, na ngbatunga apai wa gure ni yugo ani irisa tipa iropa gu gene agi aboro ayugo gayo idapase ngbaha re. Ani nayugo gaani ngbarago rogo iriiri gene.

17, 18. Gine naundo ka yugoho singia boro rẽ tipa bapatiza watadu ni arẽnga te?

¹⁷ Anga aDezire Yekova wa agu aboro namigido fogo agude na ime watadu ka manga rimbasa aboro ngbaome i zi bapatiza nga agu aboro ainonga pai tipa Ziazia Kekeapai ya te, i azionga boro sa bapatiza te. Nirengo, i abapatizanga agu aboro arẽnga kuti gupai Ziazia Kekeapai aidaha beyo ya te. Mbata fu boro da kandara ni gu batungusi wene pangbanga azionga bapatiza ya, agu aKristano nga abaakumba naruga tiyo na gupai mbata nga gu boro re ima giarogo gu bambata yugopai nga ga Ziazia Kekeapai, na kini raki na ngbanya kuti ni, na ni karagapai kuti gu sanahe du wa, “Mo naida nirengo ka du nga guni sa dagba aDezire Yekova?” ni nakaragapai ki ya, “ii.”

¹⁸ Kpara kusayo kina bete aboro gbua, ho aboro amangasunge tungusapa Kindo ni wenengai na ki ya i na nyemu zio bapatiza, agu aKristano nga abaakumba nasungo na yo ka sakapai tipa ka ruga tiyo na gupai nga, agi aboro re ima da ni aidipase ki ima kpara gayo raka fu Yekova na kingia agu aboro namanga gupai Mbori akpinyemuhe be agu aboro naida ka zio bapatiza. (Amokedi 4:4; 18:8) Fuo i fuku agu akaragapai naye ngbaduyo yo kuti asanahe susi 100 nga agu asanahe du tipa gu yugopai nga ga Ziazia Kekeapai, si naundo abaakumba i ini singia agu aboro nasanahe tipa bapatiza re namanga gupai Ziazia Kekeapai aidaha watadu i amanganga ha te mbata fu i rindosi yo kutii ime yo. Gu kura aboro naarẽnga te, sidu ka i aidanga ha fuyo i zi gu bapatiza nga ga aKristano ya.

Pai Ho Naka na Oni?

19. Kuti sangba Yoane 6:44, ada nika du ti gu zogarago nga ga Kindo na Yesu?

¹⁹ I nivura gumba gupai fu gu rimbasa aboro i amanga yo ngbaome i zi bapatiza ti regbo sa ya ho i ka kpi ni i nika ndu ku ngbangbaturũ yo. Ono tie, tipa apefuo nduko, Yesu ayaa: “Anga boro sa ka ye kono du mi ni gbua te, kina Buba nakedi re ka gbe ni.” (Yoane 6:44) Yekova ima ye na aboro 144,000 koyo du Kristo ni nga aguyo nika du ti gu zogarago nga ga Kindo ngbangbaturũ yo na ko. Gu bapatiza i amangaha ngbaome, si ambakadanga pa boro tipa ngbatunga gu ba nga ga taarimo re rogo gu mbakadapai nga ga Mbori mbata te.—ARomo 8:14-17; 2 ATesaroniko 2:13; Yugoti 14:1.

20. Ginipai rengbe ka undo gu kura aboro ata zionga bapatiza ya?

²⁰ Natona gbe bebere agu garã nangia ga 1930, ndurumo aboro nga aguyo duna gu maabangirise nga ga bata rogo “bakere gberãngbi” na kini raki auru kpotosende nyeanye kindi ima koda tiyo kuti ga Yesu “kura avusende.” (Yugoti 7:9, 14; Yoane 10:16, NW ) Agi aboro re naarẽ tipa bapatiza mbiko i naraka na ngbanya kuti Fugo Mbori na kini kpinyemu ko ‘na ngbaduyo yo dunduko, na mbisimoyo, na ome dunduko, na gayo berã dunduko.’ (Ruka 10:25-28) Wa vura duhe nga kura aboro ima kparia gupai nga, aDezire Yekova ‘nairisa Mbori ni toro gbiati rengo,’ i ata penga fuo gu kpiapai nga ga Yesu ki yugu gupai gbaiga nga i na ndikidi nyemu Yekova tiyo na ki kpara gayo raka fu kina ko sa na ki zi bapatiza te. (Yoane 4:23, 24; Pa Fu Rugute ni Ue he 4:24; Marako 1:9-11) Isoke, ka si vura du nga, kparakpee zukazuka tipa kina gi nyanyakipa pai re nga gupai si aida i mangihe tipa si fõngbaduyo yo na ka ngarasa yo i mangipai nabaha wa Fugo Mbori aidaha, ki kpara gayo raka fu Yekova Mbori na ngbaduyo yo dunduko na ki zi bapatiza.

21, 22. Gini nduapai nadingiso kura aboro ti kpara yo tiyo fu Mbori na ki zi bapatiza?

²¹ Gu kura aboro aidanga ka kparatiyo fu Mbori na ki zi bapatiza te mbiko i ima fu tiyo dunduko tipa agu apai nga ga zegino watadu i naora fuo kumuko sidu kina bete regbo gbua ki du beyo tipa agu apai nga ga toro. (Matayo 13:22; 1 Yoane 2:15-17) Nga gu ngbarago ka i du nani ka i aria gayo bipai na agu apai i aida ka mangaha! Pa mbeda yo koyo du Yekova ni rengbe ka kumukosi yo rogo toroyo, si rengbe ka zeresa agu abakabangirise du yo nani, na ki rengbe ka ye na gu zereda gbiati ngbarago naye fu boro mbiko ni namanga gupai Mbori akpinyemuhe.—Atambuahe 16:11; 40:8; Asanza 10:22; AFiripoio 4:6, 7.

²² Gu kura aboro naya i nakpinyemu Yekova akpi ono i akparanga gayo raka fuko na ki zi bapatiza te mbiko i naberãha ya, ni zanga manga yo agi apai re i ane ga Mbori sarangbanga. Ono ani nibasasa nika karagapai akaraga fu Mbori. Ani aima tinda gu tindiro nga ga manga fugo Yekova ho ani agihe ni. (Yezekere 33:7-9; ARomo 14:12) Ni ‘siasia aboro,’ agu aYisaraere nadu mbata angia agu aboro i avungu yo ku dagba gu rikaaboro naima kparatiyo fu Yekova, na i ki du tii dingisoro ka mangasunge fuko niruruhe ringbisihe kuti gako andiko. (Pa Fu Rugute ni Ue he 7:6, 11) Anga boro ho vungu yo ni areme kurogo gu rikaaboro du wa aguyo re te, ono ka si du nga ani ima gbia ruru arugute nga ga Ziazia Kekeapai, si naida ani irisi gu rugute re rogo idapase.

23, 24. Gini agunde si aidanga si dingiso aboro ti zio yo bapatiza ya?

²³ Gu kura aboro nagunde ti zio bapatiza ya kiinga gayo inohe te. Wa vura duhe wo, ani dunduko duna dungu apai kindi ka wirikaha, mbiko anga ‘boro ho nika ino gu mangaapai nga ga Mbori ti tonatonaha ki dati digidoho te.’ (Batungusipai 3:11) Oni berẽnga pa gu banyaki nangia boro Etiopia. Ni du ko ni gu boro nasa ti ni kurogo gu pambori nga ga aYuda, ko aima duna bete inohe rogo Ziazia Kekeapai yo, ono ko arengbanga ka karagapai tipa agu asanahe dunduko du tipa gu ringbisapai nga ga Mbori te. Ono tie, fuo ko wirikipai tipa ga Yekova mbakadapai tipa ka batasa aboro nga gu naye mbiko gu motumo tumorii nga ga Yesu, gu banyaki re azi bapatiza nibasa.—Amokedi 8:26-38.

²⁴ Du kura aboro adu dindikodindiko ti kparatiyo fu Mbori mbiko i nagunde i ka ti kusayo rogo rengo. Monique du garãri 17 nayaa: “Mi naaka ka zio bapatiza mbiko mi nagunde ya mi arengbanga ka raka ringbisihe kuti agu arugute nga ga gimi kparatise te.” Ono tie, ka ani kido kuti Yekova na ngbaduraniyo dunduko, ‘ko arúga gaani agene aruga nzunzu.’ Ko aundo rani aundo ani “nita rogo rengo” ni gu gako ruru amoyambu naima kparatiyo fuko.—Asanza 3:5, 6; 3 Yoane 4.

25. Gini sanahe si aida ani wisigihe awere?

²⁵ Mbiko gu ndikidi kido du aboro nani kuti Yekova na mbiko gu nyemuse naye ngbaduyo yo du yo nani tipa ko, akutu aboro rogo agarã nibasasa nakparatiyo fuko na ki zi bapatiza. Na nirengo, ga Mbori amoyambu dunduko nga aguyo naima kparatiyo fuko naida ka du niruru yo fuko. Wa vura duhe wo, ani naraka rogo gbegbere aregbo na kini gbia tirani ti dungu a’asada nga ga idapase nibasasa. (2 Timoteo 3:1-5) Ginipai rengbe ani ka mangaha tipa ani raki ringbisihe kuti gaani kparatise fu Yekova? Ani nika wisigo gipai re rogo gu paparaha naye fuo gere.

[Gu rukutu kekeapai du bandu kpewaraga yo]

Oni Natingidaha?

• Wai i amanga gu bapatiza nga ga aKristano?

• Gini inohe si aida boro du nani tipa ni rẽ tipa bapatiza?

• Gini apai si aida boro mangihe mbata fu ni zi gu bapatiza nga ga ndikidi aKristano?

• Ginipai nadingiso kura aboro ka i zinga bapatiza ya, ono wai rengbe yo ka gbia undo?

[Gu kpiahe du ti kpewaraga 24]

Oni ini gupai pa fu yo bapatizi fu boro ni ‘rimo Baa, na ti rimo Wiri, na ti rimo ziazia toro’ ayugoho?