Tona Awere Ka Ndu Kumbatayo, Oni Naangera Angera Susi Gu Nidu Mbata!

‘Ka ani ranga wa aguyo ara ya, ono ani ningere angera na kini rugutirani na pa apai.’—1 ATESARONIKO 5:6.

1, 2. (a) Gini ngbatunga abagbata nangia Pompeii na Herculaneum? (b) Gini zahe araki Pompeii na Herculaneum yo abasaha, na sangbanaha angia gine?

ROGO bambata sa kama agarã ti gi Gaani Regbo re, Pompeii gbiati Herculaneum angia ga aRomo kumukokumuko agbata tibaraha ue pati gu Bagangara rimoho angia Vesuvius. Tipa agu aRomo nangia airakumuko, tiimburu gu gangara re angia gu rago i anandu kurogoho na gayo ongoda. Gayo abangimbaro aduku nibakikindigihe ki rengbe ka dia bange aboro susi kutu sa, na rogo gu gbata nangia Pompeii, bakere bangimbaro adu yo nga gu narengbe ka dia agu aboro dunduko naaraka rogo gu gbata re. Agu aboro nageteke gu rago Pompeii adu mbata rogoho, abi gupai nga, abambirabuda aduku yo 118, agu akuraha dagba gure aduku tipa baake na tipa kodaba ti marã. Wasiro gbiati nyemu aũzegino amoipai rogo gu gbata re, a wa gu kekekeke kpiaahe duku ti avurobambu ayugoho.

² Rogo Buza ti rameru 24, rogo gu garã nangia 79 ti Gaani Regbo, gu zaragazaraga fofoi-ime-mbia nadu vuru gu gangara nga Vesuvius re atona ka gbada. Agu aboro ninaawisigopai tipa agu agangara nasusumbo kini kusi kere uturo rago, idi kuti gupai nga, gu bambata su gi gangara re asu nani, nga gu zaragazaraga fofoi-ime-mbia gbiati kuke agbadi kuari ti ni na ki na wa mai kurii agu agbata ue re, si awiranga gupai nga si arengbe ka kiso gene be agu aboro naaraka rogo agu agbata re i oro ka bata te. Nirengo, dungu aboro aima mangaha wo. Ono tie, tipa kura aboro tigayo, nga aguyo nabi gupai re gbua taata, i abasa agu arugute abasa i afuhe fuyo na ki nye anye. Fuo gure, bara ku bebere-yuru, kere fofoi uturo rago, na zaragazaraga fofoi-ime-mbia agbadi na bakere ome, ki na wa mai kurii Herculaneum kini imi agu aboro dunduko nanye rogo gu bagbata re. Ngbatutu wiso, gu kuraha wa kina gure agbadi, ki na wa mai kurii Pompeii ki imi agu aboro dunduko nadu yo. Nagbere gu sangbana basa arugute re!

Digido gu Sino Mangaapai Nangia ga AYuda

3. Gini wiratise duho ti gu gbarasarago namangi Yerusarema yo na gu namangi Pompeii na Herculaneum?

³ Gu kerepai namangi Pompeii na Herculaneum ambedanga na gu namangi Yerusarema ho i agburuwaha ni mbata fu agarã ribua kusayo te, wa si avura du nga, gu gberangbii naye kuriihe re si aye be aboro, angianga be gu ome nga ga zegino ya. I naringbisa paha ya si angia “nguru sa dagba gu kere anguru i aruhe wa zegino aenge,” ya i aimi aYuda bangeyo asusi mirioni sa. Ono, wa kina gu gberango nati kurii Pompeii na Herculaneum, pa gbarasa Yerusarema ayenga zanga i za aboro tipaha te.

4. Gini sangbanebi Yesu afura tipaha nikpiapai ya ka apefuo ko ta bihe si nika yugo gupai fuyo nga zegino mbedi ka digo, na wai si adigi nibambataha rogo bambata sa kama agarã?

⁴ Yesu Kristo aima fura kumbatayo tipa pa gbarasa gu bagbata re, na ki ima fura a tipa gu fudifudiapai si adu nga si nika manga mbata fu gu regbo re, ngbatunga gu du wa avura, zingo riahe, abazigizo, na pa kuondiko. Si adu a nga zire anebi nika maapai, ono, gu wene pangbanga nga ga ga Mbori Kindo, i nika tungusaha atungusa rogo zegino dunduko. (Matayo 24:4-7, 11-14) Wa vura duhe nga, afugo Yesu na bakere digisidigisihe areme, si aima duna tooni digisidigisihe ti gu regbo nadu kusayo mbata re. Kuru pangbanga na keke pa ngbongi rogoho nga gu namangi ringara Yuda yo. (Amokedi 11:28) Gu ga aYuda bakeke kuru apangbanga du rimoko nga Yozefasi natingida gupai nga, bazigizo amangi rogo ringara Yerusarema ngbutuko mbata fu gbarasa yo gu bagbata re. Wa digido Yerusarema aambeda, wo rukutu avura aamanga dagba agu aYuda nadu rogo agu ariigbu nga ga birĩ zogarago, na i kini imi dungu aboro nga aYuda gbiati aGendiria rogo dungu abagbata nadu na vunduvundu rikaaboro rogoho. Wa agi apai re avura kaa manga, i aatungusa gu wene pangbanga atungusa nga ga Kindo “rogo arago [dũ] tii ngbangbaturũ yo.”—AKorosaio 1:23.

5, 6. (a) Gini afugo Yesu ko agumbaha nisangbanebi kumbatayo nadigi rogo gu garã nangia 66 ti Gaani Regbo? (b) Tipagine bange agu aboro nakpiki rogo 70 ti Gaani Regbo adu ti ni nibakerehe gbe ho Yerusarema ati ni?

⁵ Niyangaraha, aYuda asamungu kuti aRomo rogo gu garã nangia 66 ti Gaani Regbo. Ho Sesitosi Garosi angbe ni mbatayo fu gako riivura ka ndu ka vo nguru pati Yerusarema, apefuo Yesu atingidi sangbako, nga gu ko agumba ki ya: “Ho oni ka bi Yerusarema ni i nikisi he kirikiri na aboro vura, oni ki ini he, ya rago gbarasa ha mbedi. Agu aboro ka du Yuda yo i ki oro ku abaagangara yo; agu yo ka du bakporo yo i guari yo; agu yo ka du ringara yo ka i rimi nga ku rogo bakporo yo ya.” (Ruka 21:20, 21) Si adu nga, ho apai ka duni wa gere, si naida aboro kuru kusayo Yerusarema yo, ono wai ka i arengbe ka kura? Garosi akaraga tiko na gako aborovura zanga aboro ini nga ko nika ga, si kini zakigene fu agu aKristano nadu Yerusarema yo na Yuda yo i gisangba Yesu na ki oro ku pavuru abaagangara yo.—Matayo 24:15, 16.

⁶ Kusa, fuo susa agarã biama, ti regbo Pumbo Susiri, ga aRomo aborovura akaraga tiyo berewe tiibe gu Barutiriivura nangia Tito, nga guko nadiberã ka digiso gu samungu aYuda aguari nani. Gako riivura ake pati Yerusarema na ki ‘ba nduka kirikiri pati he.’ (Ruka 19:43, 44) Wa serekpo vura kuti araki Yerusarema yo avura du, agu aYuda nadu rogo ga aRomo Ngbii nabaha atiria ku Yerusarema yo tipa Pumbo Susiri. Fuo duhe were, i akengedi yo koyo. Kuti gupai Yozefasi agumbaha, agi ageno re angia gu dungu aboro nakpiki be gu nguru aRomo aruhe.a Ho Yerusarema ati ni, sa dagba saba nga ga bange agu aYuda dunduko nadu rogo ga aRomo Ngbii akpiki. Pa gbarasa Yerusarema na gaha yekaru angia digido gu zogarago nangia ga aYuda na digido gayo pambori a nga gu mburuhe adu rii ga Mose Ndiko.b—Marako 13:1, 2.

7. Tipagine ruru aKristano abati ti ni ho i agbarasi Yerusarema ni?

⁷ Rogo gu garã nangia 70 ti Gaani Regbo, wa ka agu aYuda nangia aKristano adunga na rubangirise ya, ka i aimi yo aimo watadu ka sa yo ni akanga wa kina gu kura aboro nadu Yerusarema yo. Ono tie, kuti gu gopai du rogo kuru pangbanga, i airisi agu arugute Yesu afuhe fuyo mbata fu agarã 37 kusayo. I ambu gu bakporo re na ka i akaraganga tiyo berewe kurogoho ya.

Gu Zahe Nga ga Amokedi Aye ti Regboho

8. Ginipai Petero akpariapai tipaha nga si aida i mangipai sani, na gini afugo nga ga Yesu navura du berã ko yo?

⁸ Areme, banaru gbarasarago napido aboro, nga gu nika digiso gi zegino re nabaha. Agarã sita mbata fu gbarasa yo Yerusarema, gu mokedi nangia Petero afu gu rugute naaida i mangipai sani niipiipihe na nangia gu rugute naye ti regboho, na gu rugute re a tipa agu aKristano du areme: Nga, i ta sungo kini ngere angera! Petero abi gupai nga, si aida aKristano zingisi gayo “ziazia aberã” tipa ka i abasanga pa “gu rugute nga ga Gbia” nga Yesu Kristo ya. (2 Petero 3:1, 2) Ningarasa Petero aKristano i ta sungo kini ngere angera, si nawiraha nga, gupai nadu berã ko yo angia gupai ko agihe ngba Yesu ko nigumbaha fu Gako amokedi na bete arame mbata fu Kpioko nga: “Oni [ni]ngére angera ki nikpari; bambiko oni aina nga ragoho te.”—Marako 13:33.

9. (a) Gini kere sino rengbe kura aboro ka sonosaha? (b) Tipagine du gu sino berã nga ga kapa kuti apai ti ni nikerepai?

⁹ Areme, kura aboro nasanahe rogo wia niyaa: “Wari du gu kidohe ni [du] tipa ye ko berewe?” (2 Petero 3:3, 4) Wa gopai ayugoho, agu aboro re nabi gupai nga, apai a’arianga tihe nirengo te, ono si anye a wa si adu ho i akusi zegino ni. Ngbatunga gu kapa kuti pai re nikerepai. Ka ani akapa kuti apai, si rengbe ka rungburasi rani ka ani amanganga pai berewe niipiipihe ya, kini moipai kurii rani ani mere gene kakaka manga agu apai du tipa kina bororani. (Ruka 21:34) Kurii gure, a wa Petero agumbaha, bangiri ngbatunga agu aboro wia re ima go ti gu Ime Akangbii namangi ti rago Noa, nga gu nagbarasi zegino dunduko. Apai aima ariatihe nirengo fuo manga gipai re!—Bambata Pai 6:13, 17; 2 Petero 3:5, 6.

10. Gini afugo Petero angarasi agu aboro nani nadu wa i na zerangbaduse te?

¹⁰ Petero aundo agu aboro naageda gako waraga i duna zerangbaduse nitingida ko yo na pa ndugupai Mbori naaguaringa ti ni ka mangapai nibasa ya. Nibambatapai, Petero aya: “Uru sa . . . bangiri Gbia wa agarã 1000, agarã 1000 ki du wa kina uru sa.” (2 Petero 3:8) Wa duhe nga Yekova naraka nyeanye kindi, ko rengbe ka ngera rii agu apai dunduko du tipa pai na fuo gure, ko ki sia gu regbo ngbaa gbe tipa ka guari na gako sunge. Fuo gure, Petero afura tipa gupai Yekova akpinyemuhe be aboro nga, wa du yo rogo arago dunduko, i sa gayo berã. Padu Mbori na zerangbaduse naye na bata fu agu aboro ka ima kpiko wa ka ko aima mangapai niipo bakuru kusayo. (1 Timoteo 2:3, 4; 2 Petero 3:9) Wa vura duhe wo, anga padu Yekova na zerangbaduse nayugo gupai nga, ko anye anye zanga mangapai te. Petero nayaa: “Gu uru nga ga Gbia si ayé wa batuka.”—2 Petero 3:10, gu kekepai duni pigipigihe re, ani du pigihe.

11. Gine rengbe ka undo rani ani ta sungo kini ngere angera rogo toroyo, na wai rengbe guhe ngaha re ka ‘ipiso’ ga Yekova uru?

¹¹ Gu gene Petero aringbisipai rogoho na kuraha nagbeberã rani. Si naadunga taata aboro zi airadii te, ono tie, gu basinzirirago nata sungo kini ngere angera rengbe ka bi iradii niipo ti guni nayukuro ayukuro ti kura aregbo. Wai rengbe basinzirirago ka sungo kini ngere angera? Ta kuari naundo boro ni naangera angera tigu nga ka sungo sande yuru ti aregbo dunduko. Teketeke a, padu ani zaaza rogo toroyo nika undo rani nga aKristano ani ta sungo kini ngere angera. Si du fugo Petero angarasa rani ti ni ani zi tirani kuti manga “ziazia apai na sinombori.” (2 Petero 3:11) Ngbatunga gu mangaapai re nika undo rani ani zi tirani kuti “[ngera] tipa ye gu uru nga ga Mbori ki niipisi he.” (2 Petero 3:12) Rengo ngaha nga, ani arengbanga ka aria ga Yekova ringbisiringbisi regbo tipa mangaapai te. Gako uru aye ti kina gako ringbisiringbisi regbo. Ono tie, ka ani dingiso tirani kurogo gako sunge, gu regbo tona awere ka da ti gu uru re, ani bihe wa si naoro aora niipo.—1 AKorindo 15:58.

12. Wa du ani nibasasa, wai rengbe ani ka gbia undo be gu sino Yekova nga ga zerangbaduse?

¹² Sidu, i nangarasa agu aboro dunduko nabi gupai nga Yekova nakeesa akeesa i irisi ga Petero arugute kini pidi ga Yekova ringbisiringbisi regbo na zerangbaduse. Nirengo, ani rengbe arengba ka mangasunge nitatamana na gu kura regbo ga Mbori zerangbaduse afuhe re. Nikpiapai, ani rengbe arengba kaa sonosa gu nyanyakipa asino nga ga aKristano wa sa na tungusa wene pangbanga fu dungu aboro nga aguyo ka ani narengbanga ka tungusapai fuyo ya wa ka si nadunga mbiko gu zerangbaduse nga ga Mbori re ya. Ka ani sungu kini ngere angera, Yekova abi rani abi ti digido gi zegino re “zezeredi, ka wiri biriko he adú nga ti [rani] barangba ko na sirõ a ya.” (2 Petero 3:14, 15) Nangbaa gu maku nikangia ha re!

13. Gini afugo Pauro akehe fu agu aKristano nangia aTesaroniko nga gu daada areme tipa rani?

¹³ Pauro, rogo gu gako bambata waraga ko akehe fu agu aKristano nangia aTesaroniko afura a tipa ani ta sungo kini ngere angera. Fugoko naruga rani niyaa: ‘Ka ani ranga wa aguyo ara ya, ono ani ningere angera na kini rugutirani na pa apai.’ (1 ATesaroniko 5:2, 6) Areme, nga wai si aida ani ta sungo kini ngere angera wa digido gi zegino re aambeda wa pai! Airisi Yekova naraka rogo gu zegino adunga aboro rogoho na nyemu agu apai nga ga toro tiyo ya, na gipai re rengbe arengba ka mera fuo yo. Si du fugo Pauro aruga rani ti ni niyaa: “Ani rúgu tirani, niukadi gu marã ngbaduse nga idapase na nyemuse; maabangirise tipa bata ki du ni gaani kpakpari vura.” (1 ATesaroniko 5:8) Pa wisigo ani Fugo Mbori dedede na kini kodi tirani dedede na awirinarani ti regbo adunguratise nika undo rani ani irisi ga Pauro rugute na si aundo rani a ani zi tirani kuti gu gaani berã nga ga mangapai niipiipihe.—Matayo 16:1-3.

Dungu Aboro gu Duho Nata Sungo Kini Ngere Angera

14. Gini anamba nayugo gupai nga, dungu aboro kinaho areme nairisa ga Pauro arugute tipa sungo kini ngere angera?

¹⁴ Ya mo dungu aboro ho areme nairisa agu arugute naye be ga Mbori toro nga gu nangarasa aboro i ta sungo kini ngere angera? Ii, i kinaho. Vuru gu garã nga ga sunge nangia 2002, bange abatungusipai ada ti 6,304,645, na kini yugu gupai nga, bangeyo kii kisusi gu nadu rogo gu garã nangia 2001 na 3.1 rii kama. Na gi bangeyo re nga gopai ya i ata sungo kini ngere angera mbiko i adi bange asaa nga 1,202,381,302 kaa fura fu aboro tipa ga Mbori Kindo. Tipa agi aboro re, gi sunge re angianga gu kungbo sunge boro nimangihe ti kura regbo te. Si angia banguapai rogo gayo raka. Gu berã du yo nani, si niyuguyuguhe ti gu kumba nga Eduardo gbiati diako nga Noemi nga agu arogotise naraka El Salvador yo.

15. Gini pangbanga namangi El Salvador yo nayugo gupai nga, dungu aboro yo nangera angera rogo toroyo?

¹⁵ Bete agarã kusayo, Eduardo gbiati Noemi akparia agu afugo Pauro nga: “Pa gi zegino re nago ago.” (1 AKorindo 7:31) I asa gayo raka si du taata na ki zi sunge tungusapai ti aregbo dũ ni azakigene. Wa regbo aasusa, i agbia gu maku nga ga ta kaa biko adungurati na kaa biko adisitirikiti. Wa Eduardo gbiati Noemi avura gbia tiyo na kpakarakpakaraapai, i abiranga tiyo ti gupai nga, i ambu gu dodoroma raka nga gu ka aũzegino arengbe ka fuhe fuyo ki diberã ka rimo sunge tungusapai ti aregbo dunduko te. Dungu agu abatungusipai du bangeyo nga 29,269, kodihe na agu abazakigene du bangeyo nga 2,454 du El Salvador yo ayugu kina gu bangisa sino nga ga mbupa gayo apai re, nga gu duni ndupai sa dagba agu akuraha kii bange abatungusipai ti ni rogo gu ringara re na 2 rii kama ti gu garã naye mbata fu gugorö.

16. Gini berã paranga ayuguhe du Côte d’Ivoire yo?

¹⁶ Rogo gu ringara nga Côte d’Ivoire, kina gu bangisa berã re nadu ti paranga kumba yo ni Kristano nga guko nake waraga kurogo gu biroo nga ga be-basunge ki ya: “Mi namangasunge ni moyambu undo rogo dungurati. Ono, mi arengbanga ka ya fu awirina wee i rimi sunge ni azakigene ka mi amaanga wene kpiapai fuyo nitire ya. Si du mi ima mbu gu sunge marã i aatumo re rogoho wenengai, awere mi namanga gu sunge du kina re nga bairaha, nga gu sunge nambu re mi duna regbo tipa sunge tungusapai.” Gi paranga kumba re angia guni sa dagba agu azakigene du bangeyo nga 983 namangasunge tungusapai Côte d’Ivoire yo, nga gu ringara natingidipa bange abatungusipai rogoho gugorö nga 6,701, bakio bangeyo nga 5 rii kama.

17. Wai degude ni Dezire du Belgium yo ayugu gupai nga, gunde azionga ri mbiko gu sogote aboro adu nani tipa aDezire te?

¹⁷ Manga aboro zanga hipai fuyo, sogote, kparakapai dagba aboro, ni agu apai nafuda agu abatungusipa Kindo kindi du bangeyo nga 24,961 du Belgium yo. Wa vura duhe wo, i natungusapai kindi zaaza zanga gunde. Ho Dezire du garãri nga 16 agi gupai ni ti regbo wirikapai sukuru yo ya aDezire Yekova ni aboro gu pambori du bairayo nga boro, ri asanahe tipa i idihe furi ri gumbanga rengo tipa yo. Nimanga ri sunge na gu vidio nga, Jehovah’s Witnesses—The Organization Behind the Name na gu burosua nga, ADezire Yekova, Ada Nga Yo?, ri arengbe ka sakarogo ada nzunzu nga aDezire. Aboro aduna ngbarago tiyo na gupai i abi, na rogo gu poso naye fuo gure, i afu asada fu agude nga gu agu asanahe dunduko nadu rogoho adu tipa kina gu pambori nga ga agu aKristano nga aDezire Yekova.

18. Gini gopai duho nayugo gupai nga, zingo mosoro afudanga agu abatungusipai du Argentina na Mozambique yo ti mangasunge fu Yekova te?

¹⁸ Dungu aKristano apai amanga yo kini sa yo i ningere bangiriyo na kere fudifudiapai rogo gi yangara arame re. Wa vura duhe wo, i na’asada tiyo kindi ka zanga du nifudifudiyo. Wa vura du zingo mosoro ni gupai aboro naima ino pai tipaha rogo arago dunduko, gu ringara nga Argentina atingidipa vovo bange aDezire yo nga 126,709 gugorö. Rungo gu du adu kindi Mozambique yo. Wa vura duhe wo, agu awirina du yo du bangeyo nga 37,563 atingidi gupai nga i aima manga sunge dezirepai gugorö, gu bangeyo re, si nga 4 rii kama kii kisusi gu nadu rogo gu garã naye mbata fu gugorö. Raka nikpakarakpakaraha fu dungu aboro Albania yo, wa vura duhe wo, gu ringara re atingidipa kio bange abatungusipai yo nga 12 rii kama susi gu nadu rogo gu garã naye mbata fu gugorö, na vovo bangeyo nga 2,708. Si tie ziazia nga, kpakarakpakaraapai akandasinga ga Yekova toro ho gako amoyambu amaa agu apai ni nga ga Kindo mbata te.—Matayo 6:33.

19. (a) Gine nayugo gu gopai nga, dungu aboro gu du kinaho kindi du wa avusende duna gomoro tipa gu rengo nga ga Ziazia Kekeapai? (b) Gine nga gu kura futufutuapai tipa gu tingidapai nga ga garã nayugo gupai nga, ga Yekova amoyambu nata sungo kini ngere angera rogo toroyo? (Oni bi gu kekeapai du dagba gbakigbaki agene ti kpewaraga tona ti 22 ki da kurogo 25.)

¹⁹ Gu dedede bange aboro rogo diwi nga 5,309,289 nga aguyo nawisigo Ziazia Kekeapai i atingidi payo gugorö rogo zegino dunduko, nayugo gupai nga, dungu agu aboro du wa avusende kinaho kindi duna gomoro tiyo tipa gu rengo nga ga Ziazia Kekeapai. Tipa agu aboro naye tipa Tingidapa Kpio Yesu vovo bangeyo angia 15,597,746, badungu yo kindi ata tonanga mangasunge fu Yekova te. I susinga asusa kumbatayo kaa gbia inohe tipa Yekova na kini kpinyemu ko na kini kpinyemu gako amoyambu a. Si ni gupai nafu wasa fu rani ka bi “bakere rimbasa aboro” nga “kura avusende” i nindu kumbatayo kindi kaa zuka wa i amangasunge fu Bakusiahe “uru na yuru rogo gako yekaru” rogo kodabee na agu awirinayo du nimbedimbediyo.—Yugoti 7:9, 15; Yoane 10:16.

Ani Wirikipai be Roto

20. Ginipai ani awirikaha be gu kpiapai nadu tipa Roto na diako?

²⁰ Rengo ngaha nga, zavura ga Mbori ruru amoyambu, pai rengbe arengba ka sa yo tipa bete regbo i mbu mangapai niipo. Oni berẽnga pa gu wiri unvuru fu Abarayama nangia Roto. Ko aima ruga tiko na gupai nga Mbori nika gbarasa Sodomo na Amora ngba agu amaraika ue naye ka bi ko. Sidu, gi pangbanga gbarasarago re arengbanga ka iriwo ti Roto te, nga guko ‘naarungo arungo bakere gbe be gu wasiwasi mangaapai nangia ga gbegberẽ aboro.’ (2 Petero 2:7) Wa si avura du wo, ho agu amaraika nadu ue re aye ni fuo ko tipa ka kusa ko kusayo Sodomo yo, ko “aima aima.” Si aidi agi amaraika re zi ko ti beko ka gbe ko kusayo rogo gu bakporo re gbiati gako aborokporo. Fuo gure, dia Roto abasa gu zahe maraika afuhe fuyo nga ka i ngerenga kusayo ya. Ri akpi mbiko gari keretu. (Bambata Pai 19:14-17, 26) Yesu afu rugute ki ya: “Oni tíngidi pa dia Roto.”—Ruka 17:32.

21. Tipagine si aida gupai ti ni nga, tona awere kaa ndu kumbatayo, si naida ani naangera angera susi gu nidu mbata?

²¹ Gu gberango namangi Pompeii gbiati Herculaneum na agu apai nadu tipa gburuwa Yerusarema, kodihe na gu Ime Akangbii namangi ti rago Noa na gu gberangbii namangi ti rago Roto, si ti baraha dunduko nayugo gupai nga, si naida aboro bi agu arugute nga ga zahe ninyanyakipa pai. Wa du ani niga Yekova amoyambu, ani ima ino agu apai nayugopa digido zegino. (Matayo 24:3) Ani aima kpara tirani kusayo ti zire pambori. (Yugoti 18:4) Wa kina agu aKristano nadu rogo bambata sa kama agarã, si naida ani “[ni]ngere tipa ye gu uru nga ga Mbori ki niipisi he.” (2 Petero 3:12) Ii, tona awere ka ndu kumbatayo, si naida ani naangera angera susi gu nidu mbata! Gini apai si aida ani mangihe, na gini asino si aida ani sonosihe tipa ka sungo kini ngere angera? Gu paparaha naye fuo gere nika wisigo agu apai re.

[Gu rukutu kekeapai du bandu kpewaraga yo]

Gaoni Karagapai Nga Gine?

• Ginipai namangi nga gu nazakigene fu agu aYuda nangia aKristano i bati be gu gbarasa Yerusarema namangi?

• Wai gu rugute du rogo agu awaraga aPetero na Pauro akehe aundo rani ani ta sungo kini ngere angera?

• Gini aboro nayugo gu gopai areme nga i nata sungo kini ngere angera?

• Ginipai ani awirikaha ti gu pangbanga namangi tipa Roto na diako?

[Gu kpiahe du ti kpewaraga 26]

Pa zio aKristano tiyo kuti gayo sunge zaaza naundo yo i ta sungo kini ngere angera