Aparangaa Oni Nasona Rogo Toroyo?
“WA MI avura kaa du pati agu adunguratise nga ga aKristano, nyemu mangasunge fu Yekova adunga tire gbe te,” wogu Hideo agumbaha wa ko aaberãpa gu regbo ko adu rogo bakere sukuru. “Gupai mi anaberãpa tire ya si ka mi nidu rogoho nga nyemure du ti agu akuare du mi na yo rogo gimi riko sukuru yo na kaa ndu bangiri gene na nakureami wa kikiipa boro. Anga asásá ho mi amoinga ha tipa ka da ti ni te, na mi adunga na nyemu ka sona rogo toroyo a te.” Wa kina Hideo, si nawira dungu aparanga nangbuo angbuo gbua rogo gayo raka, zanga i duna nyemu ka da ti agu asásá duna rogoyo ti ni watadu ka sonanga rogo gu kurapai ka du.
Kangia mo nga paranga, si nawira rago naangba angba tiro ho mo naangimbaro ni watadu ho mo naamanga gupai ni ngba tiro. Ono tie, ho si ada ni ti gu mangaapai nga ga toro, si rengbe ka du nga mo naadunga na ngbarago tiro wa gure te. Ya mo boro rengbe arengba ka duna ngbarago be agu asásá nga ga toro? Mo makianga agu afugo nga ga bake Atambuahe nga gu nayaa: “Gu dezirepai nga ga Yekova du ni nyanyaki he, ki nisa azangainahe i du ni airatatamana . . . sangba Yekova . . . ziazia, ni hasi bangirise.” (Atambuahe 19:7, 8) Fugo Mbori rengbe ka yugo gene fu “azangainahe” i mangipai nitatamana, kini ‘hasi bangiriyo.’ Ii, mo rengbe arengba ka gbia ngbarago be agu apai nga ga toro. Ono gine si aida mo mangihe tipa ka gbia gu ngbatunga ngbarago re? Wari si aida mo tonaha ni?
Si Naida Pai Duho Nika Fõngbaduroyo Tipa Mo Mangisunge fu Mbori
Nibambatapai, si naida pai duho nika fõngbaduroyo. Mo makianga gupai nadu tipa gu paranga Bakindo aYuda nangia Yosiya. Ho i akuru bara ga Yekova buku ni nangia ga Ndiko yekaru yo, Yosiya asa boro ni gedihe fuko, na gupai ko agihe rogoho afõngbadukoyo gbe. Nisangbana gipai re, “Yosiya . . . [arogodi] kere gbigbita kpiahe dunduko [kusayo] rogo aringara nga ga awiri aYisaraere.” (2 Pekapai 34:14-21, 33) Pa geda Yosiya Fugo Mbori nafõngbadukoyo ko sonosi ziazia irisombori.
Mo rengbe arengba a ka sonosa nyemu mangasunge fu Yekova ka mo gedi Ziazia Kekeapai na kini berẽkurii gupai mo agedaha. Gure nangia gupai nafõngbadu Hideo yo. Ko atona kaa koda tiko na boro nangia unvuru fuko dagba aDezire Yekova, nangia bazakigene, nga gu boro natungusapai ti aregbo dũ. Gu bazakigene re angia ngangara bawisigi Ziazia Kekeapai na kini mangi asadatise nyanyakii ka manga sangbaha rogo gako raka. Fuo gi kpiapai nga ga gi bazakigene re ngarasi Hideo bakere gbe, ko atona ka manga kina gu bangisapai re a na ki sonosi nyanyaki nyemu mangasunge fu Mbori na fu kura aboro. Pa sona ko rogo toroyo aye na gu raka fuko nadu na rogoyo ti ni.
Geda Ziazia Kekeapai na a’uru dunduko rengbe ka fõngbadu paranga aboro yo. Paranga nga Takahiro nasakarogoyo niyaa: “Ti agu aregbo dunduko mi naandu ka pi, fuo bi mi gupai nga mi nagedanga Ziazia Kekeapai rogo gu uru re te, mi niguari berewe ka ndu ka gedaha. Nisangbana gipai re, mi nabi gupai nga Yekova nayugo gene fere. Pa geda mi Ziazia Kekeapai na a’uru dunduko afu bee tipa mi sono rogo toroyo. Fuo mi diberã tipa ka mangasunge fu Yekova nibakerehe gbe, mi atona ka tungusapai nibazakigene ti aregbo dunduko ngbutuko fuo nyasa mi na bakere sukuru. Mi nagbia ngbarago awere behe bakere gbe.”
Ku pati geda Ziazia Kekeapai, gini kurahe berewe rengbe ka nyakasa ro tipa mo taasirimo Yekova? Navungu Tomohiro nayugu gu rengo nga ga Ziazia Kekeapai fuko. Ko nayaa: “Ga Yekova nyemuse na ga Yesu motumo tumorii afõnga ngbadureyo te da kinaho mi agedi gu buku ni sirisiri nga, Life Does Have a Purpose ho garãre ada ni ti 19. Gu tambuahe mi adu nani tipa ga Mbori nyemuse tipa rani re nafõngbadureyo mi kiisi gimi sunge fuko. (2 AKorindo 5:14, 15) Wa kina Tomohiro, dungu aparanga i angarasa yo i sono rogo toroyo niwisigo yo Ziazia Kekeapai nisanaga yo zanga nyomoro.
Na wa ka si du nga, wa vura manga mo ho wo, nyemu mangasunge fu Yekova ngbaduroyo te, ginipai ka mo mangi? Boro ho rengbe mo ka ndu fuo ni tipa undo? Gu mokedi nangia Pauro akepai ki ya: “Bambiko Mbori nga gu ko namanga pai rogo roni yo, sa ida pai na manga ha mbiko wene sangbako.” (AFiripoio 2:13) Ka mo kparikpee fu Yekova tipa undo, ko afu gako ziazia toro afu foro, nga gu nika funga kina ome foro tipa mo ‘mangipai’ sa ya, ono tipa mo ‘idipai’ a. Gere nayugo gupai nga, ga Mbori ziazia toro azingisa gu nyemu mangasunge fu Yekova du ngbaduroyo na si ki undo ro mo sono rogo toroyo. Nirengo, mo kido kuti gu ome nga ga Yekova na ki nyakasi ngbaduroyo!
Mo Moi agu Asásá Nga Gamo
Fuo dia mo berã kindi tipa ka mangasunge fu Yekova wenengai gbe, si naida mo moi agu asásá nga gamo tipa ka sona rogo toroyo. Mana, nga paranga degude ni Kristano ayaa: “Pa maa mi asásá afu bakere undo fere. Kuba gupai nga mi naakaraga tire kusayo, mi aagbisa kina kumbatayo na ngara. Fuo maa mi gimi asásá ku berã re yo, mi akparikpee fu Yekova kakaka tipa ko yugu gene fere, na mi arengbe ka sona rogo toroyo zanga pai fudi re.”
Si naida gamo asásá du ni gupai daada na rengbe mo arengba ka da ti ni. Ka geda kapita sa nga ga Ziazia Kekeapai rogo a’uru nibasasa rengbe ka du nga gu sásá daada. Mo rengbe arengba a ka tona gu sunge nga ga wetekapai. Ani yugunga kpia gipai re na gupai duho rogo pa-Ngirisi, mo rengbe ka wisigo agu asino Yekova tangara yo ho tii gu umba riipai nga, “Qualities by Name (Asino ti Arimoho)” du tii gupai nga “Jehovah (Yekova)” rogo gu buku nga Watch Tower Publications Index. I rimisi apai tiihe wa 40 nga gu rengbe mo ka wetekaha, na zanga kapa, gu wetekapai re ambedisa ro ambedisa gbe koyo du Yekova ni na si ki fongbaduroyo mo idi ka manga kura apai tipa ko. Gu kura asásá rengbe mo arengba ka da ti ni nakoda karaga mo pai kandara bara sa ti regbo agu adunguratise nga ga aKristano nga gu naida sakapai na agu aboro du pati dunguratise, asadatise ka ino boro sa dagba aguyo du rogo dungurati ti regbo dungurati nibasasa, na ka zanga mbu uru sa si susi zanga mo kparikpee fu Yekova na ka fura tipa ko fu kura aboro.
Kangia mo ata kenga rimoro tipa Sukuru Nga ga Siokrasia te, gure angia wene sásá tipa ro. Mo aima digo nimangi sunge tungusapai? Ka si adunga wo ya, mo rengbe ka manga asadatise tipa ka da nigu batungusipai i ata bapatizi nga ni ya. Pa berã mo pa gamo pagume dagbaro na Yekova nyanyakii na pa kpara mo gamo raka fuko rengbe ka du nigu kura sásá. Dungu aparanga nidu na nyemu ka dia sunge tungusapai ku beyo kaa mangaha ti aregbo dunduko tipa si undo yo i nye kuti gayo kparatise fu Mbori.
Wa vura duhe niwenepai tipa mo duna asásá rogo gamo raka, ono si naida mo banda tiro ti sonosa mo gu berã nga ga manga abaangira na kura boro. Mo agbia bakere ngbarago rogo gupai mo amangaha ka mo aringbisanga tiro na kura boro ya.—AGaratio 5:26; 6:4.
Si nawira mo nabi tiro wa mo ainonga he te na kini bihe nimbumbuhe ka maa agu asásá daada. Kangia wo duhe, mo irisi agu arugute tie nga ga Ziazia Kekeapai nga gu nayaa: “Mo yé turo ka gia agu apai nga ga iratatamana, ki nimoi berãro sa gi inahe.” (Asanza 22:17) Mo sana avunguro watadu kura nyanyaki Kristano tipa undo. Rengo ngaha nga, si naida avunguagude gbiati kura aboro duna ruru berã na kini ngarasi awiriyo rogo gipai re. Ho paranga aboro abi gupai ni nga i nasosoda yo asosoda tipa i da ti kura asásá, si nafu kina gberarago fuyo na si rengbe a ka gbarasapa ndu gupai i amaa asásá ti ni fuyo. Si nga gupai namangi degude sa nga guri nayaa: “Avungure anamaa asásá fere ti mburu kuraha, ngbatunga gu du wa ke rimore rogo Sukuru Nga ga Siokrasia, du ti sunge tungusapai, zio bapatiza, na ka tona ka tungusapai ninazakigene. Mi amangi bakere asadatise ka da ti ni wa duhe nibasasa re. Ho mi anida ni ti gu sa, avungure anatambuanga re te, ono kuba gure, i anafu kina gu kura sásá fere mi oro fuoho. Nisangbana gipai re, mi abi tire nga i nasosoda re asosoda mi naada ti asásá. Omere abati na ka mi abinga tire wa mi mangi wiripai ya.” Ginipai tie naarunga ya? Agu asásá re adaada, ono si angianga gari te. Tipa mo rengbe ka duna diabese rogo gipai re, si naida pai fõngbaduroyo kina boro mo ki guari nga mo ka maa asásá tipa tiro!
Mo berẽnga pa Yesu Kristo. Ho ko aye ni ku auru kpotosende, ko aima ino gupai Bako nga Yekova akpinyemuhe beko. Pa manga Yesu gupai Yekova akpinyemuhe adunga fuko gbua nga sásá te, ono si angia gu sunge si aidi ko mangihe. Wai Yesu abi gu sunge i afuhe fuko? Ko ayaa: “Gi riahe nga manga kina gu pai gu ko akpi nyemu he nakedi re, mi nyasi gako sunge.” (Yoane 4:34) Yesu aduna ngbarago ka manga gupai Yekova akpinyemuhe na ko amangi kina gupai Bako akpinyemuhe beko. Si adu wa kina riahe fu Yesu, ko agbia ngbarago rogo nyasa gu sunge i aida ko mangihe. (AEbere 10:5-10) Mo rengbe arengba a ka gbia ngbarago ka manga gupai avunguro angarasa ro mo mangihe ka i ngarasi ro ngba ruru gene.
Ka Omero Batinga ti Manga Wenepai Ya
Fuo maa mo sásá kindi ku berã ro yo, mo mangi asadatise ka da ti ni. AGaratio 6:9 nayaa: “Ka ani mbú nga be manga rurupai ya, bambiko ka he amáka nga rani ya ani aké ahe ho regboho ka da ni.” Ka mo kidonga kina kuti omero watadu gamo birĩ mangaapai ya. Apai kinaho nika ida ka kiso gene bero na ti kura aregbo mo rengbe ka bi tiro wa apai ima diabero. Ono Ziazia Kekeapai nakido rani niyaa: “Mo rá fu [Mbori] rogo gamo apai dunduko, Ko arúga gamo apai foro nzunzu.” (Asanza 3:6) Yekova asongoda ro asongoda wa mo kaa manga asadatise ka da ti gu gamo asásá nga ga toro.
Ii, nisonosa mo nyemu ka mangasunge fu Yekova na nimanga mo asadatise ka maa agu asásá nga ga toro, pa manga mo ho were tie ka sa “ga susa na apai . . . [si] du ni yuguyugu he fu aboro dũ.” (1 Timoteo 4:15) Fuo gure tie, mo arengba ka gbia ngbarago be gu raka nga ga mangasunge fu Mbori nga gu duna rogoyo ti ni.
[Gu kpiahe du ti kpewaraga 31]
Pa geda mo Ziazia Kekeapai na kini berẽkurii gupai mo agedaha nika fõngbaduroyo mo mangasunge fu Yekova
[Gu kpiahe du ti kpewaraga 32]
Yesu amangi gupai Bako akpinyemuhe beko